Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Deteronoma 5:1-33

5  Kutani Muxe a vitana tiko hinkwaro ra Israyele+ a ri byela a ku: “Oho Israyele, yingisani swileriso ni swiboho swa vuavanyisi+ leswi ndzi swi vulaka etindleveni ta n’wina namuntlha, mi fanele mi swi dyondza naswona mi swi xiya leswaku mi swi endla.+  Yehovha Xikwembu xa hina u endle ntwanano na hina eHorebe.+  Yehovha a nga wu endlanga ni vatatana ntwanano lowu, kambe u wu endle na hina hinkwerhu lava hi hanyaka laha namuntlha.  Yehovha u vulavule na n’wina entshaveni, mi langutane na yena, a ri exikarhi ka ndzilo.+  Hi nkarhi+ wolowo a ndzi yime exikarhi ka Yehovha na n’wina leswaku ndzi mi byela rito ra Yehovha, (hikuva a mi chava ndzilo naswona a mi tlhandlukelanga entshaveni,)+ a ku,  “‘Hi mina Yehovha Xikwembu+ xa wena, loyi a ku humeseke etikweni ra Egipta, u huma endlwini ya mahlonga.+  U nga tshuki u va ni swikwembu swin’wana emahlweni ka xikandza+ xa mina.  “‘U nga tshuki u tiendlela xifaniso lexi vatliweke,+ xivumbeko+ xihi ni xihi lexi fanaka ni xilo xin’wana ni xin’wana lexi nga ematilweni ehenhla kumbe lexi nga emisaveni ehansi kumbe lexi nga ematini ehansi ka misava.  U nga tshuki u swi nkhinsamela kumbe u kongomisiwa ku ya swi tirhela,+ hikuva mina Yehovha Xikwembu xa wena, ndzi Xikwembu lexi lavaka ku tinyiketela loku hlawulekeke,+ lexi xupulaka vana hikwalaho ka xidyoho xa vatata wa vona, eka xitukulwana xa vunharhu ni le ka xitukulwana xa vumune eka lava va ndzi vengaka;+ 10  kambe lexi nga ni musa wa rirhandzu eka xitukulwana xa vugidi eka lava va ndzi rhandzaka, lava hlayisaka swileriso+ swa mina. 11  “‘U nga tshuki u khoma vito ra Yehovha Xikwembu xa wena hi ndlela leyi nga pfuniki nchumu,+ hikuva Yehovha a nge tshiki ku xupula la khomaka vito rakwe hi ndlela leyi nga pfuniki nchumu.+ 12  “‘Hlayisa siku ra savata leswaku u ri hlawulekisa, hilaha Yehovha Xikwembu xa wena a ku leriseke hakona,+ 13  u ta endla ntirho naswona u fanele ku tirha ntirho wa wena hinkwawo hi masiku+ ya tsevu. 14  Kambe siku ra vunkombo i savata ya Yehovha Xikwembu+ xa wena. U nga tshuki u endla ntirho+ wihi ni wihi, wena kumbe n’wana wa wena wa jaha kumbe wa nhwanyana kumbe hlonga ra wena ra xinuna kumbe ra xisati kumbe nkunzi ya wena kumbe mbhongolo ya wena kumbe xifuwo xin’wana ni xin’wana xa wena kumbe muluveri wa wena la nga endzeni ka tinyangwa+ ta wena, ku endlela leswaku hlonga ra wena ra xinuna kumbe ra xisati ri wisa ku fana na wena.+ 15  U fanele u tsundzuka leswaku u ve hlonga etikweni ra Egipta,+ kutani Yehovha Xikwembu xa wena a ku humesa kwalaho hi voko ra matimba ni hi voko+ leri tshambulutiweke. Hi yona mhaka leyi Yehovha Xikwembu a ku leriseke leswaku u hambeta u hlayisa siku+ ra savata. 16  “‘Xixima tata wa wena ni mana+ wa wena, hilaha Yehovha Xikwembu xa wena a ku leriseke hakona; leswaku masiku ya wena ma leha naswona swi ku fambela kahle+ emisaveni leyi Yehovha Xikwembu xa wena a ku nyikaka yona. 17  “‘U nga tshuki u dlaya hi vomu.+ 18  “‘Naswona u nga tshuki u endla vuoswi.+ 19  “‘Naswona u nga tshuki u yiva.+ 20  “‘Naswona u nga tshuki u humesa vumbhoni bya mavunwa ku kanetana ni munhu-kuloni.+ 21  “‘Naswona u nga tshuki u navela nsati+ wa munhu-kuloni. Naswona u nga tshuki u navela hi ndlela ya vutianakanyi yindlu ya munhu-kuloni, nsimu yakwe kumbe hlonga rakwe ra xinuna kumbe ra xisati, nkunzi yakwe kumbe mbhongolo yakwe kumbe xilo xin’wana ni xin’wana lexi nga xa munhu-kuloni.’+ 22  “Yehovha u vulavule Marito lawa ni nhlengeletano hinkwayo ya n’wina entshaveni a ri exikarhi ka ndzilo,+ epapeni ni le ku dzwihaleni lokukulu, hi rito lerikulu, naswona a nga engetelanga nchumu; endzhaku ka sweswo u ma tsale eswiphepherheleni swimbirhi swa maribye, a ndzi nyika wona.+ 23  “Kutani hi ku hatlisa loko mi twe rito ri huma exikarhi ka munyama, loko ntshava yi pfurha ndzilo,+ mi tshinele eka mina, varhangeri hinkwavo va tinyimba ta n’wina ni vakulukumba va n’wina hinkwavo. 24  Hiloko mi ku, ‘Waswivo, Yehovha Xikwembu xa hina u hi kombe ku vangama kakwe ni vukulu byakwe, hi twe rito rakwe ri huma exikarhi ka ndzilo.+ Namuntlha hi swi vonile leswaku Xikwembu xi nga vulavula ni munhu kambe a ya emahlweni a hanya.+ 25  Kutani hikwalaho ka yini hi fanele hi fa, hikuva ndzilo lowu lowukulu wu nga hi herisa?+ Loko ho tlhela hi twa rito ra Yehovha Xikwembu xa hina, entiyisweni hi ta fa.+ 26  Hikuva i mani eka nyama hinkwayo la nga tshama a twa rito ra Xikwembu+ lexi hanyaka ri vulavula ri huma exikarhi ka ndzilo, kambe a ya emahlweni a hanya? 27  N’wina tshinelani mi twa hinkwaswo leswi Yehovha Xikwembu xa hina a nga ta swi vula; mi ta vuya mi hi byela hinkwaswo leswi Yehovha Xikwembu xa hina a nga ta mi byela swona,+ kunene hi ta swi yingisa naswona hi swi endla.’ 28  “Hikwalaho Yehovha u twe rito ra n’wina loko mi vulavule na mina, Yehovha a ya emahlweni a ndzi byela a ku, ‘Ndzi wu twile mpfumawulo wa marito ya vanhu lava, lawa va ku byeleke wona. Va vulavule+ kahle eka hinkwaswo leswi va swi vuleke. 29  Loko ntsena vo endla leswaku mbilu ya vona yi ndzi chava+ naswona yi hlayisa swileriso+ swa mina hinkwaswo nkarhi hinkwawo, ku endlela leswaku swi ta va fambela kahle, vona ni vana va vona, hilaha ku nga riki na makumu!+ 30  Famba u ya va byela u ku: “Tlhelelani emintsongeni ya n’wina.” 31  Wena u yima laha na mina, ndzi ta ku byela nawu hinkwawo ni swileriso ni swiboho swa vuavanyisi leswi u faneleke u va dyondzisa swona,+ ni leswi va faneleke va swi endla etikweni leri ndzi va nyikaka rona leswaku va ri teka.’ 32  N’wina mi fanele mi khathalela ku endla hilaha Yehovha Xikwembu xa n’wina a mi leriseke hakona.+ Mi nga tshuki mi hundzulukela exineneni kumbe eximatsini.+ 33  Mi fanele mi famba+ hi ndlela hinkwayo leyi Yehovha Xikwembu xa n’wina a mi leriseke ku famba ha yona, ku endlela leswaku mi hanya naswona swi mi fambela kahle,+ hakunene mi lehisa masiku ya n’wina etikweni leri mi nga ta ri teka.

Tinhlamuselo ta le hansi