Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Deteronoma 4:1-49

4  “Kutani, N’wina Israyele, yingisani swileriso ni swiboho swa vuavanyisi leswi ndzi mi dyondzisaka swona leswaku mi swi endla, ku endlela leswaku mi hanya,+ hakunene mi nghena mi teka rifuwo ra tiko leri Yehovha Xikwembu xa vatata wa n’wina a mi nyikaka rona.  Mi nga tshuki mi engetela nchumu eka rito leri ndzi mi lerisaka rona, hambi ku ri ku susa nchumu eka rona,+ leswaku mi hlayisa swileriso swa Yehovha Xikwembu xa n’wina leswi ndzi mi lerisaka swona.  “Mahlo ya n’wina hi wona ma voneke leswi Yehovha a swi endleke emhakeni ya Bali wa Peyori,+ leswaku munhu un’wana ni un’wana la landzeleke Bali wa Peyori hi yena loyi Yehovha Xikwembu xa n’wina a n’wi loviseke exikarhi+ ka n’wina.  Kambe n’wina lava namarhelaka+ Yehovha Xikwembu xa n’wina ma hanya hinkwenu esikwini leri.  Maswivo, ndzi mi dyondzise swileriso+ ni swiboho swa vuavanyisi,+ hilaha Yehovha Xikwembu xa mina a ndzi leriseke hakona, leswaku mi endla hi ndlela yoleyo exikarhi ka tiko leri mi nga ta ri teka.  Mi fanele mi swi hlayisa naswona mi swi endla, hikuva leswi i vutlhari+ ni ku twisisa+ eka n’wina, emahlweni ka mahlo ya vanhu lava va nga ta twa swileriso leswi hinkwaswo, kunene va ta ku, ‘A swi kanakanisi leswaku tiko leri lerikulu i ra vanhu+ vo tlhariha ni lava va twisisaka.’  Hikuva hi rihi tiko+ lerikulu leri nga ni swikwembu leswi nga ekusuhi na rona, hi ndlela leyi Yehovha Xikwembu xa hina a endlaka ha yona eku n’wi vitaneni ka hina hinkwako?+  Naswona hi rihi tiko lerikulu leri nga ni swileriso ni swiboho swa vuavanyisi swo lulama ku fana ni nawu hinkwawo lowu ndzi wu vekaka emahlweni ka n’wina namuntlha?+  “Ntsena tivonele, u khathalela swinene moya-xiviri+ wa wena, leswaku u nga rivali swilo leswi mahlo ya wena ma swi voneke+ nileswaku swi nga suki embilwini ya wena masiku hinkwawo ya vutomi+ bya wena; u fanele u swi tivisa vana va wena ni vatukulu+ va wena, 10  siku leri u yimeke ha rona emahlweni ka Yehovha Xikwembu xa wena eHorebe,+ loko Yehovha a ndzi byele a ku, ‘Hlengeleta vanhu va ta eka mina leswaku ndzi ta va twisa marito+ ya mina, leswaku va ta dyondza ku ndzi chava+ emasikwini hinkwawo lawa va nga ta va va hanya emisaveni, leswaku va ta ma dyondzisa vana+ va vona.’ 11  “Kutani n’wina mi tshinerile mi yima ehansi ka ntshava, ntshava a yi pfurha ndzilo ku ya fika empfhukeni; a ku ri ni munyama, papa ni ku dzwihala+ lokukulu. 12  Yehovha a sungula ku vulavula na n’wina a ri exikarhi ka ndzilo.+ A mi twa mpfumawulo wa marito kambe a mi nga xi voni xivumbeko+—ku nga ri na nchumu, kambe ku ri ni rito+ ntsena. 13  Kutani a mi byela ntwanano+ wakwe, lowu a mi leriseke leswaku mi wu endla—Marito ya Khume,+ lawa endzhaku a nga ma tsala eswiphepherheleni swimbirhi swa maribye.+ 14  Hi mina loyi Yehovha a n’wi leriseke hi nkarhi wolowo leswaku a mi dyondzisa swileriso ni swiboho swa vuavanyisi, leswaku mi swi endla etikweni leri mi pelelaka eka rona ku ya ri teka.+ 15  “Mi fanele mi khathalela mimoya-xiviri+ ya n’wina, hikuva esikwini leri Yehovha a vulavuleke na n’wina eHorebe exikarhi ka ndzilo a mi vonanga xivumbeko,+ 16  leswaku mi nga endli hi mukhuva lowu onhakeke+ naswona entiyisweni mi nga tiendleli xifaniso lexi vatliweke, xivumbeko xa xifanekiselo xin’wana ni xin’wana, xa xifaniso xa waxinuna kumbe waxisati,+ 17  xa xifaniso xa xiharhi xin’wana ni xin’wana lexi nga emisaveni,+ xa xifaniso xa nyenyana yin’wana ni yin’wana leyi hahaka ematilweni,+ 18  xa xifaniso xa xilo xin’wana ni xin’wana lexi famba-fambaka emisaveni, xa xifaniso xa nhlampfi+ yin’wana ni yin’wana leyi nga ematini ehansi ka misava; 19  nileswaku mi nga tlakuseli mahlo ya n’wina ematilweni, hakunene mi vona dyambu ni n’weti ni tinyeleti, vuthu hinkwaro ra le matilweni, kunene mi kanganyiseka mi swi nkhinsamela, mi swi tirhela,+ swilo leswi Yehovha Xikwembu xa n’wina a swi aveleke vanhu hinkwavo lava nga ehansi ka matilo+ hinkwawo. 20  Kambe mi vanhu lava Yehovha a va tekeke leswaku a mi humesa ekheleni ra ndzilo+ ra nsimbi, aEgipta, leswaku mi va vanhu vakwe+ ku fana ni le sikwini leri. 21  “Kutani Yehovha u ndzi hlundzukerile hikwalaho ka n’wina,+ lerova a hlambanya leswaku a ndzi nge wu peli Yordani kumbe ndzi ya etikweni lerinene leri Yehovha Xikwembu xa n’wina a mi nyikaka rona ri va ndzhaka.+ 22  Hikuva ndzi fela etikweni+ leri. A ndzi nge wu peli Yordani, kambe n’wina ma wu pela, naswona mi fanele mi teka tiko leri lerinene. 23  Tivoneleni leswaku mi nga rivali ntwanano wa Yehovha Xikwembu xa n’wina lowu a wu endleke na n’wina,+ nileswaku mi nga tiendleli xifaniso lexi vatliweke, xivumbeko xa nchumu wun’wana ni wun’wana lowu Yehovha Xikwembu xa n’wina a mi leriseke ha wona.+ 24  Hikuva Yehovha Xikwembu xa n’wina i ndzilo lowu herisaka,+ i Xikwembu lexi lavaka ku tinyiketela loku hlawulekeke.+ 25  “Loko mo tshuka mi va vatata va vana ni va vatukulu, naswona mi tshame nkarhi wo leha etikweni kutani mi endla hi mukhuva lowu onhakeke,+ mi endla xifaniso lexi vatliweke,+ xivumbeko xa nchumu wun’wana ni wun’wana, kutani mi endla swo biha ematihlweni ya Yehovha Xikwembu+ xa n’wina, mi n’wi hlundzukisa, 26  namuntlha ndzi teka matilo ni misava+ swi va timbhoni ehenhla ka n’wina, leswaku hakunene mi ta lova hi ku hatlisa etikweni leri mi pelaka Yordani lowu ku ya ri teka. A mi nge andzisi masiku ya n’wina eka rona, hikuva hakunene mi ta lovisiwa.+ 27  Kunene Yehovha u ta mi hangalasa exikarhi ka vanhu,+ hakunene mi ta siyiwa mi nga ri vangani+ hi nhlayo exikarhi ka matiko lawa Yehovha a nga ta mi hlongolela eka wona. 28  Kutani kwalaho mi ta boheka ku tirhela swikwembu+ leswi endliweke hi mavoko ya munhu, hi ntsandza ni hi ribye,+ leswi swi nga voniki kumbe ku twa kumbe ku dya kumbe ku nun’hwetela.+ 29  “Loko mi lava Yehovha Xikwembu xa n’wina kwalaho, kunene mi ta n’wi kuma,+ hikuva mi ta vutisisa ha yena hi mbilu ya n’wina hinkwayo ni hi moya-xiviri+ wa n’wina hinkwawo. 30  Loko mi ri enhlomulweni lowukulu naswona marito lawa hinkwawo ya mi kumile eku heleni ka masiku, mi ta boheka ku tlhelela eka Yehovha Xikwembu+ xa n’wina naswona mi yingisa rito+ rakwe. 31  Hikuva Yehovha Xikwembu xa n’wina i Xikwembu+ lexi nga ni tintswalo. A nge mi tshiki kumbe a mi lovisa kumbe a rivala ntwanano+ wa vatata wa n’wina lowu a va hlambanyeleke wona. 32  “Sweswi, ndzi kombela mi vutisa malunghana ni masiku+ yo sungula lama veke kona emahlweni ka n’wina, ku sukela esikwini leri Xikwembu xi tumbuluxeke munhu emisaveni+ ni ku sukela emakumu man’wana ya matilo ku ya emakumu man’wana ya matilo, Xana ku tshame ku endliwa swilo leswikulu swo fana ni leswi, kumbe, xana ku tshame ku twiwa nchumu wo karhi wo fana ni lowu?+ 33  Xana va kona vanhu van’wana lava nga tshama va twa rito ra Xikwembu ri vulavula ri huma exikarhi ka ndzilo hi ndlela leyi fanaka ni leyi mi yi tweke, kutani va hambeta va hanya?+ 34  Kumbe, xana Xikwembu xi tshame xi ringeta ku titekela tiko exikarhi ka tiko rin’wana hi ku tivonakarisa,+ hi swikombiso,+ hi masingita,+ hi nyimpi,+ hi voko+ ra matimba, hi voko+ leri tshambulutiweke ni hi ku chavisa+ lokukulu ku fana ni hinkwaswo leswi Yehovha Xikwembu xa n’wina a mi endleleke swona aEgipta ematihlweni ya n’wina? 35  N’wina—mi kombiwile, leswaku mi tiva leswaku Yehovha i Xikwembu+ xa ntiyiso; a nga kona un’wana handle ka yena.+ 36  U endle leswaku mi twa rito rakwe ri huma ematilweni leswaku a mi lulamisa; naswona u endle leswaku mi vona ndzilo wakwe ehenhla ka misava, marito yakwe mi ma twile exikarhi ka ndzilo.+ 37  “Kambe [mi hambete mi hanya], hikuva u rhandze vatata wa n’wina lerova a hlawula mbewu ya vona leyi taka endzhaku ka vona,+ a mi humesa aEgipta mi ri ematihlweni yakwe hi matimba+ yakwe lamakulu, 38  leswaku a hlongola matiko lamakulu ni lawa ma nga ni matimba ma suka emahlweni ka n’wina, leswaku a mi nghenisa, a mi nyika tiko ra wona ri va ndzhaka ku fana ni le sikwini+ leri. 39  Mi swi tiva kahle namuntlha, naswona mi fanele mi swi tsundzuka embilwini ya n’wina leswaku Yehovha i Xikwembu xa ntiyiso ematilweni ehenhla ni le misaveni ehansi.+ A ku na un’wana.+ 40  Kutani mi fanele mi hlayisa swileriso+ swakwe ni milawu yakwe leswi ndzi mi lerisaka swona namuntlha, leswaku swi ta mi fambela kahle+ n’wina ni vana va n’wina lava nga ta ta endzhaku ka n’wina, ku endlela leswaku mi lehisa masiku ya n’wina emisaveni leyi Yehovha Xikwembu xa n’wina a mi nyikaka+ yona nkarhi hinkwawo.” 41  Hi nkarhi wolowo Muxe a hlawula miti yinharhu etlhelo ra Yordani leri languteke eku humeni ka dyambu,+ 42  leswaku loyi a dlayeke munhu a ta balekela kona, loyi a dlayeke munhu-kulobye a nga swi tivi+ kasi a a nga n’wi vengi;+ u fanele a balekela eka yin’wana ya miti leyi kutani a hanya,+ 43  ku nga, Beseri+ emananga, tiko leri andlalekeke ra va ka Ruveni na Rhamoti,+ eGiliyadi ri ri ra va ka Gadi na Golani+ eBaxani ri ri ra va ka Manase.+ 44  Kutani lowu i nawu+ lowu Muxe a wu vekeke emahlweni ka vana va Israyele. 45  Leswi i switiyisekiso+ ni swileriso+ ni swiboho swa vuavanyisi+ leswi Muxe a swi byeleke vana va Israyele loko va huma aEgipta, 46  exifundzheni xa Yordani enkoveni lowu nga emahlweni ka Beta-peyori,+ etikweni ra Sihoni hosi ya Vaamori, loyi a a tshama eHexiboni,+ loyi Muxe ni vana va Israyele va nga n’wi hlula loko va huma aEgipta.+ 47  Va teke tiko ra yona ni tiko ra Ogo+ hosi ya Baxani, tihosi timbirhi ta Vaamori leti a ti ri exifundzheni xa Yordani ku ya evuhuma-dyambu, 48  ku suka eArowere+ leri nga eribuweni ra nkova wa Arinoni, ku ya eNtshaveni ya Sayoni, hileswaku Herimoni,+ 49  ni Arabha+ hinkwaro exifundzheni xa Yordani ku ya evuxeni, ni ku ya fika elwandle ra Arabha+ ehansi ka magiyagiya ya Pisiga.+

Tinhlamuselo ta le hansi