Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Deteronoma 29:1-29

29  Lawa i marito ya ntwanano lowu Yehovha a wu leriseke Muxe leswaku a wu endla ni vana va Israyele etikweni ra Mowabu, ku nga hlayiwi ntwanano lowu a wu endleke na vona eHorebe.+  Kutani Muxe a vitana tiko hinkwaro ra Israyele a ri byela a ku: “Hi n’wina mi voneke hinkwaswo leswi Yehovha a swi endleke emahlweni ka mahlo ya n’wina etikweni ra Egipta, eka Faro ni le ka malandza yakwe hinkwawo ni le tikweni rakwe hinkwaro,+  ku tivonakarisa lokukulu loku mahlo ya n’wina ma ku voneke,+ swikombiso swoleswo leswikulu+ ni masingita.+  Hambiswiritano, Yehovha a nga mi nyikanga mbilu ya ku tiva ni mahlo ya ku vona ni tindleve ta ku swi twa ku ta fika esikwini leri.+  ‘Loko ndzi hambete ndzi mi kongomisa malembe ya 40 emananga,+ tinguvu ta n’wina a ti hlakalanga ehenhla ka n’wina ni phaxani ra n’wina a ri hlakalelanga enengeni wa n’wina.+  A mi dyanga xinkwa,+ naswona a mi nwanga vhinyo ni swakunwa leswi pyopyaka, ku endlela leswaku mi tiva leswaku hi mina Yehovha Xikwembu xa n’wina.’  Eku heteleleni mi te endhawini leyi, kutani Sihoni hosi ya Hexiboni+ na Ogo+ hosi ya Baxani va huma ku ta hlangana na hina enyimpini, kambe hi va hlurile.+  Endzhaku ka sweswo hi teke tiko ra vona hi ri nyika va ka Ruveni ni va ka Gadi ni hafu ya nyimba ya va ka Manase,+ ri va ndzhaka.  Hikwalaho mi fanele mi hlayisa marito ya ntwanano lowu, mi wa endla, leswaku swilo hinkwaswo leswi mi nga ta swi endla swi humelela.+ 10  “Hinkwenu mi yimisiwe emahlweni ka Yehovha Xikwembu xa n’wina namuntlha, varhangeri va tinyimba ta n’wina ni vakulukumba va n’wina ni valanguteri va n’wina, wanuna un’wana ni un’wana wa Israyele,+ 11  vana va n’wina ni vasati va n’wina+ ni muluveri wa n’wina+ la nga exikarhi ka nxaxa wa n’wina, ku sukela eka loyi a mi rhotelelaka tihunyi ku ya eka loyi a mi kelaka mati,+ 12  leswaku mi ta nghena entwananweni+ wa Yehovha Xikwembu xa n’wina ni le xihlambanyweni xa yena, lexi Yehovha Xikwembu xa n’wina a xi endlaka na n’wina namuntlha;+ 13  hi xikongomelo xa ku mi simeka mi va vanhu+ namuntlha nileswaku a tikombisa a ri Xikwembu xa n’wina,+ hilaha a mi tshembiseke hakona ni hilaha a hlambanyeleke hakona vatata wa n’wina Abrahama,+ Isaka+ na Yakobe.+ 14  “Kutani a ndzi endli ntwanano lowu ni xihlambanyo lexi na n’wina ntsena,+ 15  kambe ndzi wu endla ni loyi a yimeke laha na hina namuntlha emahlweni ka Yehovha Xikwembu xa hina, ni lava va nga riki na hina laha namuntlha;+ 16  (hikuva n’wina mi yi tiva kahle ndlela leyi hi tshameke ha yo-na etikweni ra Egipta ni ndlela leyi hi tsemakanyeke ha yona exikarhi ka matiko lawa mi tsemakanyeke eka wona.+ 17  A mi hamba mi vona swilo swa wona leswi nyenyetsaka ni swifaniso swa wona swa hava leswi hombolokeke,+ swa ntsandza ni swa ribye, swa silivhere ni swa nsuku, leswi a va ri na swona;) 18  leswaku ku nga vi na wanuna kumbe wansati exikarhi ka n’wina kumbe ndyangu kumbe nyimba, loyi mbilu yakwe yi fularhelaka Yehovha Xikwembu xa hina namuntlha, yi famba yi ya tirhela swikwembu swa matiko wolawo;+ leswaku ku nga vi na rimitsu exikarhi ka n’wina leri vekaka mbhandzu wa ximilana lexi nga ni chefu ni xibaha.+ 19  “Kutaku loko munhu a twe marito ya xihlambanyo lexi,+ naswona a tikatekisile embilwini yakwe, a ku, ‘Ndzi ta va ni ku rhula,+ hambileswi ndzi nga ta famba eku sihalaleni ka mbilu ya mina,’+ hi xikongomelo xa ku kukula loyi a kumaka mati yo tala swin’we ni lava va nga ni torha, 20  Yehovha a nge swi lavi ku n’wi rivalela,+ kambe ku hlundzuka ka Yehovha+ ni ku hiseka kakwe+ swi ta mbulukela ehenhla ka munhu yoloye,+ kutani xihlambanyo hinkwaxo lexi tsariweke ebukwini+ leyi xi ta tshama ehenhla ka yena, hakunene Yehovha u ta herisa vito rakwe ehansi ka matilo. 21  Yehovha u ta boheka ku n’wi hambanisa+ ni tinyimba hinkwato ta Israyele leswaku a weriwa hi khombo, hi ku landza xihlambanyo lexi hinkwaxo xa ntwanano lowu tsariweke ebukwini leyi ya nawu. 22  “Kutani xitukulwana xa n’wina xa nkarhi lowu taka, vana va n’wina lava va nga ta va kona endzhaku ka n’wina, va ta boheka ku vula, ni munhu wumbe la nga ta ta a huma etikweni ra le kule, hambiloko va vone makhombo ya tiko rero ni mavabyi ya rona, leswi Yehovha a ri vabyiseke ha swona,+ 23  xivavula ni munyu+ ni ku tshwa,+ lerova tiko ra rona hinkwaro a ri nge byariwi, kumbe ku hluka kumbe ku huma ximila xin’wana ni xin’wana eka rona, ku fana ni ku hluriwa ka Sodoma na Gomora,+ Adima+ na Seboyima,+ lawa Yehovha a ma hluleke hi ku hlundzuka kakwe ni hi vukarhi byakwe;+ 24  ina, matiko hinkwawo ma ta boheka ku vula ma ku, ‘Ha yini Yehovha a endle hi ndlela leyi etikweni leri?+ Ha yini ku ve ni ku hlundzuka loku lokukulu?’ 25  Va ta boheka ku vula va ku, ‘A ku ri hikwalaho ka leswi va tshikeke ntwanano+ wa Yehovha Xikwembu xa vatata wa vona, lowu a wu endleke na vona loko a va humesa etikweni ra Egipta.+ 26  Kutani va hambete va ya tirhela swikwembu swin’wana ni ku swi nkhinsamela, swikwembu leswi va nga swi tivangiki, leswi a nga va avelangiki swona.+ 27  Hiloko ku hlundzuka ka Yehovha ku pfurhela tiko rero hi ku tisa ehenhla ka rona ndzhukano hinkwawo lowu tsariweke ebukwini leyi.+ 28  Hikwalaho Yehovha u va simurile emisaveni ya vona hi ku hlundzuka ni hi vukarhi+ ni hi ku nyangatseka lokukulu, a va lahlela etikweni rin’wana ku fana ni le sikwini leri.’+ 29  “Swilo leswi fihliweke+ i swa Yehovha Xikwembu xa hina, kambe swilo leswi hlavuteriweke+ i swa hina ni vana va hina, hilaha ku nga riki na makumu, leswaku hi hetisisa marito hinkwawo ya nawu lowu.+

Tinhlamuselo ta le hansi