Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Deteronoma 19:1-21

19  “Loko Yehovha Xikwembu xa wena a dlaya matiko+ lawa Yehovha Xikwembu xa wena a ku nyikaka tiko ra wona, wena u ma hlongorile naswona u tshamile emitini ya wona ni le tindlwini+ ta wona,  u ta hlawula miti yinharhu exikarhi ka tiko ra wena leri Yehovha Xikwembu xa wena a ku nyikaka rona leswaku u ri teka.+  U ta tilunghiselela ndlela naswona u fanele u ava ndhawu ya tiko ra wena leri Yehovha Xikwembu xa wena a ku nyikeke rona leswaku u ri teka ri va swiphemu swinharhu, yi fanele yi va ya un’wana ni un’wana loyi a dlayeke munhu leswaku a balekela kona.+  “Leyi i mhaka ya loyi a dlayeke munhu, loyi a nga balekelaka kona a va a hanya: Loko a dlaye munhu-kulobye a nga swi tivi naswona a a nga n’wi vengi eku sunguleni;+  kumbe loko a famba ni munhu-kulobye enhoveni va ya rhotela tihunyi, kutani a tlakusa voko rakwe leswaku a tsema murhi hi xihloka ivi nsimbi yi hlomuka eka mbhinyi+ yi ba munhu-kulobye a fa, yena u fanele a balekela eka wun’wana wa miti leyi naswona u fanele a hanya.+  Loko swi nga ri tano, murihiseri+ wa ngati a nga n’wi hlongorisa hikwalaho ka leswi mbilu yakwe yi hisaka, kunene a kuma loyi a dlayeke munhu, tanihi leswi ndlela yi leheke; hakunene a nga ba moya-xiviri wakwe a wu dlaya kasi a ku na xigwevo xa rifu+ eka yena, hikuva a a nga n’wi vengi eku sunguleni.  Hi yona mhaka leyi ndzi ku byelaka ndzi ku, ‘U ta tihlawulela+ miti yinharhu.’  “Loko Yehovha Xikwembu xa wena a ndlandlamuxa ndhawu ya wena hilaha a hlambanyeleke vatata+ wa wena hakona, a ku nyike tiko hinkwaro leri a tshembiseke ku ri nyika vatata wa wena,+  hikuva u ta hlayisa nawu lowu hinkwawo lowu ndzi ku lerisaka wona namuntlha hi ku wu endla, leswaku u rhandza Yehovha Xikwembu xa wena nileswaku u famba etindleleni takwe nkarhi hinkwawo,+ kutani u fanele u tiengetelela miti yin’wana yinharhu eka leyi yinharhu,+ 10  leswaku ku nga vi na ngati+ leyi pfumalaka nandzu leyi nga ta halatiwa exikarhi ka tiko leri Yehovha Xikwembu xa wena a ku nyikaka rona ri va ndzhaka, nileswaku ku nga vi na nandzu wa ngati ehenhla ka wena.+ 11  “Kambe loko ko tshuka ku va ni munhu la vengaka+ munhu-kulobye, kutani a n’wi tumbelela naswona a n’wi pfukela a ba moya-xiviri wakwe, wu fa,+ munhu loyi a a balekele eka wun’wana wa miti leyi, 12  vakulukumba va muti warikwavo va fanele va rhumela rito leswaku a ya tekiwa kwalaho, va fanele va n’wi nyiketa evokweni ra murihiseri wa ngati, kutani u fanele a fa.+ 13  Tihlo ra wena ri nga vi na nsovo eka yena,+ u fanele u susa nandzu wa ngati leyi nga riki na nandzu eIsrayele,+ leswaku u va ni leswinene. 14  “U nga tshuki u tlhentlhisa ndzilakana wa munhu-kuloni+ loko vakokwana va ta va va veke mindzilakana endzhakeni leyi u nga ta yi dya etikweni leri Yehovha Xikwembu xa wena a ku nyikaka rona leswaku u ri teka. 15  “Ku hava mbhoni yin’we leyi yi nga ta pfukela munhu malunghana ni xihoxo xin’wana ni xin’wana kumbe xidyoho+ xin’wana ni xin’wana emhakeni ya xidyoho xihi ni xihi lexi a nga xi endlaka. Mhaka yi ta yima yi tiya+ hi ku sekeriwa hi nomu wa timbhoni timbirhi kumbe hi nomu wa timbhoni tinharhu. 16  Loko mbhoni leyi kunguhataka madzolonga yo tshuka yi pfukela munhu leswaku yi n’wi hehla hi ku n’wi pfukela,+ 17  vanhu vambirhi lava nga ni mholovo va fanele va yima emahlweni ka Yehovha, emahlweni ka vaprista ni vaavanyisi lava nga ta va va ri kona emasikwini wolawo.+ 18  Kutani vaavanyisi va ta lavisisa hi vukheta,+ loko mbhoni yi ri mbhoni ya vunwa naswona yi hehle makwavo hi vunwa, 19  mi fanele mi yi endla hilaha a yi bohe ku endla makwavo+ hakona, mi fanele mi susa swo biha exikarhi ka n’wina.+ 20  Hikwalaho lava va seleke va ta swi twa kutani va chava, naswona a va nge pfuki va endle nchumu wihi ni wihi wo biha lowu fanaka ni lowu exikarhi ka n’wina.+ 21  Tihlo ra wena ri nga vi na nsovo:+ moya-xiviri wu ta hakeriwa hi moya-xiviri, tihlo hi tihlo, tino hi tino, voko hi voko ni nenge hi nenge.+

Tinhlamuselo ta le hansi