Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Deteronoma 11:1-32

11  “Kutani u fanele u rhandza Yehovha Xikwembu+ xa wena, u hetisisa mfanelo ya wena eka yena ni milawu yakwe ni swiboho swakwe swa vuavanyisi+ ni swileriso swakwe nkarhi hinkwawo.  N’wina mi swi tiva kahle namuntlha (hikuva a ndzi vulavuli ni vana va n’wina lava va nga yi tivangiki naswona va nga yi vonangiki ndzayo ya Yehovha+ Xikwembu xa n’wina, vukulu+ byakwe, voko rakwe ra matimba ni voko+ rakwe leri tshambulutiweke,+  kumbe swikombiso swakwe ni swiendlo swakwe leswi a swi endleke exikarhi ka Egipta+ eka Faro hosi ya Egipta ni le tikweni rakwe hinkwaro;  kumbe leswi a swi endleke emavandleni ya nyimpi ya Egipta, etihancini takwe ni le makalichini yakwe ya nyimpi, leswi a endleke leswaku mati ya Lwandle ro Tshwuka ma funengeta swikandza swa swona loko swi va hlongorisa,+ kutani Yehovha a swi lovisa ku fikela esikwini+ leri;  kumbe leswi a mi endleleke swona emananga ku fikela loko mi fika endhawini leyi;  kumbe leswi a swi endleke hi Dathani, Abirama+ vana va Eliyabu, n’wana wa Ruveni, loko misava yi ahlamise nomu yi mita va mindyangu ya vona ni mintsonga ya vona ni xilo xin’wana ni xin’wana lexi hanyaka, lexi nga sala endzhaku ka vona exikarhi ka tiko hinkwaro ra Israyele);+  hikuva mahlo ya n’wina ma vone swiendlo hinkwaswo leswikulu swa Yehovha leswi a swi endleke.+  “Kutani mi fanele mi hlayisa nawu+ hinkwawo lowu ndzi mi lerisaka wona namuntlha, leswaku mi tiya, hakunene mi nghena mi teka tiko leri mi pelelaka eka rona ku ya ri teka,+  nileswaku mi lehisa masiku+ ya n’wina emisaveni leyi Yehovha a yi hlambanyeleke ku yi nyika vatata wa n’wina ni mbewu+ ya vona, tiko leri khulukaka ntswamba ni vulombe.+ 10  “Hikuva tiko leri mi yaka ku ya ri teka a ri fani ni tiko ra Egipta leri mi humeke eka rona, laha a mi hamba mi byala mbewu ivi mi cheleta hi ku tirhisa nenge ku fana niloko mi cheleta ntanga wa matsavu. 11  Kambe tiko leri mi pelelaka eka rona leswaku mi ri teka i tiko ra tintshava ni timbala.+ Ri nwa mati ya mpfula ya matilo; 12  i tiko leri Yehovha Xikwembu xa n’wina a ri langutelaka. Mahlo+ ya Yehovha Xikwembu xa n’wina ma le henhla ka rona nkarhi hinkwawo, ku sukela eku sunguleni ka lembe ku ya eku heleni ka lembe. 13  “Kutani loko hakunene mo yingisa swileriso+ swa mina leswi ndzi mi lerisaka swona namuntlha leswaku mi rhandza Yehovha Xikwembu xa n’wina naswona mi n’wi tirhela hi mbilu ya n’wina hinkwayo ni hi moya-xiviri+ wa n’wina hinkwawo, 14  kunene tiko ra n’wina ndzi ta ri nyika mpfula hi nkarhi+ lowu vekiweke, mpfula ya xixikana ni mpfula+ ya ximun’wana, kunene mi ta hlengeleta mavele ya n’wina ni vhinyo ya n’wina yo nandziha ni mafurha ya n’wina. 15  Kunene swifuwo+ swa n’wina ndzi ta swi nyika swimila ensin’wini ya n’wina, mi ta dya mi xurha.+ 16  Tivoneleni, leswaku mbilu ya n’wina yi nga tshuka yi yengiwa,+ ivi mi hambuka mi gandzela swikwembu swin’wana naswona mi swi nkhinsamela,+ 17  kutani ku hlundzuka ka Yehovha ku mi pfurhela, a pfala matilo leswaku ku nga ni mpfula,+ misava yi nga humesi swimila swa yona, n’wina mi boheka ku lova hi ku hatlisa etikweni lerinene leri Yehovha a mi nyikaka rona.+ 18  “Mi fanele mi tirhisa marito lawa ya mina embilwini+ ya n’wina ni le ka moya-xiviri wa n’wina, mi wa boha ma va xikombiso evokweni ra n’wina, ma fanele ma va vamba ra le mombyeni exikarhi ka mahlo+ ya n’wina. 19  Mi fanele mi wa dyondzisa vana va n’wina, leswaku mi vulavula ha wona loko mi tshame endlwini ya n’wina niloko mi famba egondzweni niloko mi etlela niloko mi pfuka.+ 20  Mi fanele mi wa tsala ehenhla ka marimba ya yindlu ya n’wina ni le tinyangweni+ ta n’wina, 21  leswaku masiku ya n’wina ni masiku ya vana va n’wina ma ta andza+ emisaveni leyi Yehovha a yi hlambanyeleke ku yi nyika vatata+ wa n’wina, ma fana ni masiku ya matilo ehenhla ka misava.+ 22  “Hikuva loko mi hlayisa swileriso+ leswi hinkwaswo leswi ndzi mi lerisaka swona hi ku tiya, mi swi endla, leswaku mi rhandza Yehovha Xikwembu+ xa n’wina, leswaku mi famba etindleleni+ takwe hinkwato naswona mi n’wi namarhela,+ 23  Yehovha na yena u ta hlongola matiko lawa hinkwawo hikwalaho ka n’wina,+ kunene mi ta hlongola matiko lamakulu ni yo tala ku mi tlula.+ 24  Ndhawu yin’wana ni yin’wana leyi nkondzo wa nenge wa n’wina wu nga ta yi kandziya, yi ta va ya n’wina.+ Ndzilakana+ wa n’wina wu ta sukela emananga ku ya eLebanoni, ku suka eNambyeni, nambu wa Yufrata ku ya elwandle ra le vupela-dyambu. 25  A ku na munhu la nga ta yima a tiya ku lwa na n’wina.+ Yehovha Xikwembu xa n’wina u ta veka ku chavisa ka n’wina ni ku chaviwa ka n’wina emahlweni ka xikandza xa tiko+ hinkwaro leri mi nga ta ri kandziya, hilaha a mi tshembiseke hakona. 26  “Maswivo, ndzi veka nkateko ni ndzhukano+ emahlweni ka n’wina namuntlha: 27  nkateko, ntsena loko mi yingisa swileriso swa Yehovha Xikwembu+ xa n’wina leswi ndzi mi lerisaka swona namuntlha; 28  ni ndzhukano,+ loko mo ka mi nga yingisi swileriso swa Yehovha Xikwembu+ xa n’wina kutani mi hambuka endleleni leyi ndzi mi lerisaka yona namuntlha, leswaku mi landzela swikwembu swin’wana leswi mi nga swi tivangiki. 29  “Kutaku loko Yehovha Xikwembu xa wena a ku tisa etikweni leri u yaka eka rona ku ya ri teka,+ u fanele u tlhela u huwelela nkateko eNtshaveni ya Gerizimu+ naswona u huwelela ndzhukano eNtshaveni ya Ebali.+ 30  Xana a ti le tlhelweni ra Yordani ku kongoma evupela-dyambu, etikweni ra Vakanana lava tshamaka eArabha,+ emahlweni ka Giligala,+ etlhelo ka mirhi leyikulu ya More?+ 31  Hikuva mi pela Yordani, mi ya nghena mi teka tiko leri Yehovha Xikwembu xa n’wina xi mi nyikaka rona, mi fanele mi ri teka naswona mi tshama eka rona.+ 32  Kutani mi fanele mi xiya ku hetisisa swileriso hinkwaswo ni swiboho swa vuavanyisi+ leswi ndzi swi vekaka emahlweni ka n’wina namuntlha.+

Tinhlamuselo ta le hansi