Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Daniyele 5:1-31

5  Loko ku ri Belxatsara+ lowa hosi, u endle nkhuvo lowukulu wa tindhuna takwe ta 1 000, naswona a a nwa vhinyo emahlweni ka tindhuna ta 1 000.+  Belxatsara, a ri karhi a twa vhinyo,+ a lerisa leswaku ku tisiwa swibya swa nsuku ni swa silivhere+ leswi Nebukadnetsara tata wakwe a swi suseke etempeleni leyi a yi ri eYerusalema, leswaku hosi ni tindhuna ta yona, vasati va yona lavatsongo ni vasati va yona van’wana, va nwela eka swona.+  Enkarhini wolowo va tisa swibya swa nsuku leswi a va swi susile etempeleni ya yindlu ya Xikwembu leyi a yi ri eYerusalema, kutani hosi ni tindhuna ta yona, vasati va yona lavatsongo ni vasati va yona van’wana va nwela eka swona.  Va nwe vhinyo, va dzunisa swikwembu swa nsuku ni swa silivhere, koporo, nsimbi, ntsandza ni ribye.+  Enkarhini wolowo ku humelela tintiho ta voko ra munhu, ti tsala emahlweni ka xo tlhoma rivoni ekhumbini leri phamiweke ra xigodlo xa hosi,+ hosi yi vona nhlanekelo wa xandla lexi a xi tsala.  Hi nkarhi wolowo, loko ku ri hosi, ku languteka ka xikandza xa yona ku hundzuka eka yona, miehleketo ya yona yi sungula ku yi chavisa,+ mahlangano ya masenge ya yona ma tsekatseka+ ni matsolo ya yona ma banana.+  Hosi yi huwelela ngopfu leswaku ku tisiwa vangoma, Vakalidiya ni vangoma va swilo swa le mpfhukeni.+ Hosi yi angula vavanuna vo tlhariha va Babilona, yi ku: “Un’wana ni un’wana loyi a nga ta hlaya leswi swi tsariweke, a ndzi nyika nhlamuselo ya swona, u ta ambexiwa swiambalo swa xivunguvungu,+ a veheriwa sindza ra nsuku enhan’wini, naswona u ta fuma a ri wa vunharhu emfun’weni.”+  Enkarhini wolowo ku nghena vavanuna hinkwavo vo tlhariha va hosi, kambe a va nga faneleki nikatsongo ku hlaya leswi tsariweke kumbe ku byela hosi nhlamuselo ya swona.+  Hikwalaho Hosi Belxatsara a chava swinene kutani ku languteka ka xikandza xa yena ku hundzuka eka yena; tindhuna ta yena ti pfilunganyeka.+ 10  Loko ku ri hosi ya xisati, hikwalaho ka marito ya hosi ni tindhuna ta yona yi nghene eholweni ya nkhuvo. Hosi leyi ya xisati yi angula yi ku: “Wena hosi, hambeta u hanya hilaha ku nga riki na makumu.+ U nga chavisiwi hi miehleketo ya wena, kumbe u hundzula ku languteka ka xikandza xa wena. 11  Ku ni munhu la fanelekaka emfun’weni wa wena loyi a nga ni moya wa swikwembu swo kwetsima;+ esikwini ra tata wa wena ku kumeke ku voninga ni ku twisisa ni vutlhari ku fana ni vutlhari bya swikwembu eka yena, Hosi Nebukadnetsara tata wa wena u n’wi veke a va murhangeri+ wa vaprista lava endlaka masalamusi, vangoma, Vakalidiya ni vangoma va swilo swa le mpfhukeni, tata wa wena, Wena hosi; 12  tanihi leswi eka yena ku kumekeke moya lowu nga tolovelekangiki ni vutivi ni ku twisisa ko hlamusela milorho+ ni ku hlamusela mawetana ni ku ntshunxa mafundzu,+ eka Daniyele, loyi hosi yi n’wi thyeke vito ra Beltexatsara.+ Kutani a ku vitaniwe Daniyele, leswaku a ta vula nhlamuselo ya kona.” 13  Hikwalaho Daniyele a tisiwa emahlweni ka hosi. Hosi yi ku eka Daniyele: “Xana hi wena Daniyele loyi a humaka eka makhumbi ya Yuda,+ loyi hosi, tata wa mina yi n’wi humeseke eYuda?+ 14  Nakambe ndzi swi twile malunghana na wena leswaku moya wa swikwembu wu le ka wena,+ ku voninga ni ku twisisa ni vutlhari+ lebyi nga tolovelekangiki swi kumeke eka wena. 15  Kutani, emahlweni ka mina ku tisiwe vavanuna vo tlhariha ni vangoma, leswaku va hlaya leswi swi tsariweke, ni ku ndzi byela nhlamuselo ya swona; kambe a va faneleki ku vula nhlamuselo ya marito lawa.+ 16  Mina ndzi twile malunghana na wena, leswaku wa swi kota ku nyika tinhlamuselo+ ni ku ntshunxa mafundzu. Kutani, loko u swi kota ku hlaya leswi swi tsariweke ni ku ndzi byela nhlamuselo ya swona, u ta ambexiwa swiambalo swa xivunguvungu, u veheriwa sindza ra nsuku enhan’wini, naswona u ta fuma u ri wa vunharhu emfun’weni.”+ 17  Enkarhini wolowo Daniyele a angula emahlweni ka hosi a ku: “Tinyiko ta wena a ti ve eka wena, tinyiko ta wena u ti nyika van’wana.+ Hambiswiritano, ndzi ta hlayela hosi leswi swi tsariweke, ndzi ta yi byela nhlamuselo ya swona.+ 18  Loko ku ri wena, Wena hosi, Xikwembu Lexi nge Henhla-henhla+ xi nyike Nebukadnetsara tata wa wena+ mfumo ni vukulu ni xindzhuti ni vukulukumba.+ 19  Hikwalaho ka vukulu lebyi xi n’wi nyikeke byona, vanhu hinkwavo, vanhu va matiko ni tindzimi a va rhurhumela, va chava emahlweni ka yena.+ A a dlaya loyi a a lava ku n’wi dlaya; naswona a a ba loyi a a lava ku n’wi ba; a a tlakusa loyi a a lava ku n’wi tlakusa; a a tsongahata loyi a a lava ku n’wi tsongahata.+ 20  Kambe loko mbilu yakwe yi titlakusile ni moya wakwe wu nonon’hwa, lerova a tikukumuxa,+ u xikisiwile exiluvelweni xa mfumo wa yena, xindzhuti xakwe xi susiwile eka yena.+ 21  U hlongoriwile eka vana va vanhu, mbilu yakwe yi endliwe yi fana ni ya xivandzana, a a tshama ni timbhongolo ta nhova.+ A va n’wi nyika swimila a swi dya kukota tinkunzi, miri wakwe wu tsakamisiwa hi mberha ya matilo,+ kukondza a swi tiva leswaku Xikwembu Lexi nge Henhla-henhla i Mufumi emfun’weni wa vanhu, nileswaku loyi xi lavaka ku n’wi veka eka wona, xa n’wi veka.+ 22  “Loko ku ri wena, n’wana wakwe Belxatsara,+ a wu yi tsongahatanga mbilu ya wena,+ hambileswi a wu swi tiva hinkwaswo leswi.+ 23  Kambe u titlakusile ehenhla ka Hosi ya matilo,+ emahlweni ka wena va tise swibya swa yindlu ya yona;+ wena ni tindhuna ta wena, vasati va wena lavatsongo ni vasati va wena lavakulu a mi nwela vhinyo eka swona, naswona mi dzunise swikwembu swa silivhere ni swa nsuku, koporo, nsimbi, ntsandza ni ribye,+ leswi swi nga voniki nchumu kumbe ku twa nchumu kumbe ku tiva nchumu;+ kambe Xikwembu lexi ku hefemula ka wena ku nga evokweni ra xona,+ lexi tindlela ta wena hinkwato ti nga eka xona,+ a wu xi vangamisanga.+ 24  Hikwalaho ku rhumeriwe nhlanekelo wa xandla wu huma eka xona, kutani ku tsariwa marito lawa.+ 25  Leswi a swi tsariwile hi leswi: MENE, MENE, TEKELE na PARISINI. 26  “Hi leyi nhlamuselo ya rito: MENE, Xikwembu xi hlaye masiku ya mfumo wa wena, xi ma hetile.+ 27  “TEKELE, u kariwile eswiringanisweni kutani u kumiwe u kayivela.+ 28  “PERESI, mfumo wa wena wu aviwe hi le xikarhi, wu nyikiwa Vameda ni Vaperesiya.”+ 29  Enkarhini wolowo Belxatsara a lerisa, kutani va ambexa Daniyele swiambalo swa xivunguvungu, a veheriwa sindza ra nsuku enhan’wini; kutani va huwelela malunghana na yena leswaku a a ta va mufumi wa vunharhu emfun’weni.+ 30  Evusikwini byebyo Belxatsara hosi ya le Kalidiya u dlayiwile+ 31  kutani Dariyosi+ wa Mumeda a amukela mfumo, a ri ni malembe ya kwalomu ka 62 hi vukhale.

Tinhlamuselo ta le hansi