Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

Daniyele 3:1-30

3  Nebukadnetsara lowa hosi a endla xifaniso+ xa nsuku, xo tlakuka swisungunu swa 60, xi anama swisungunu swa tsevu. A xi veka erivaleni ra Dura emugangeni lowu nga ehansi ka vulawuri bya Babilona.+  Hosi Nebukadnetsara a rhumela rito leswaku ku hlengeletiwa valanguteri, valawuri lavakulu+ ni tindhuna letikulu, vatsundzuxi, vatameri va xuma, vaavanyisi, vaavanyisi lavatsongo lava nga maphorisa+ ni vakongomisi hinkwavo va miganga leyi nga ehansi ka vulawuri bya yena, leswaku va ta eku khanguriweni+ ka xifaniso lexi Nebukadnetsara lowa hosi a a xi yimisile.  Hi nkarhi wolowo valanguteri,+ valawuri lavakulu ni tindhuna letikulu, vatsundzuxi, vatameri va xuma, vaavanyisi, vaavanyisi lavatsongo lava nga maphorisa ni vakongomisi hinkwavo va miganga leyi nga ehansi ka vulawuri bya yona, a va hlengeletanela ku khanguriwa ka xifaniso lexi Nebukadnetsara lowa hosi a a xi yimisile, a va yime emahlweni ka xona xifaniso lexi Nebukadnetsara a a xi yimisile.  Kutani loyi a huwelelaka+ a a vula hilaha ku twalaka, a ku: “Ma byeriwa, N’wina vanhu, vanhu va matiko ni tindzimi,+  leswaku enkarhini lowu mi nga ta twa mpfumawulo wa nanga, mhalamhala, katara, haripa ya tinhla tinharhu, xitende, nanga leyi nga ni saka ni mixaka hinkwayo ya swichayachayana swa vuyimbeleri,+ mi wela ehansi, mi gandzela xifaniso xa nsuku lexi Nebukadnetsara lowa hosi a xi yimiseke.  Kutani loyi a nga ta ka a nga weli ehansi a gandzela,+ hi nkarhi+ wolowo u ta lahleriwa ekheleni ra ndzilo lowu pfurhaka.”+  Hikwalaho ka leswi, enkarhini lowu vanhu hinkwavo a va twa mpfumawulo wa nanga, mhalamhala, katara, haripa ya tinhla tinharhu, xitende, ni mixaka hinkwayo ya swichayachayana swa vuyimbeleri, vanhu hinkwavo,+ vanhu va matiko ni tindzimi va wela ehansi, va gandzela xifaniso xa nsuku lexi Nebukadnetsara lowa hosi a a xi yimisile.  Hikwalaho ka leswi, enkarhini wolowo Vakalidiya van’wana va tshinela, va hehla Vayuda.+  Va hlamula, va byela Nebukadnetsara lowa hosi, va ku: “Wena hosi, hambeta u hanya hi minkarhi leyi nga riki na makumu.+ 10  Wena hosi, u humese xileriso xa leswaku mani na mani loyi a twaka mpfumawulo wa nanga, mhalamhala, katara, haripa ya tinhla tinharhu, xitende, ni nanga leyi nga ni saka ni mixaka hinkwayo ya swichayachayana swa vuyimbeleri,+ u fanele a wela ehansi, a gandzela xifaniso xa nsuku; 11  nileswaku mani na mani loyi a nga ta ka a nga weli ehansi a gandzela, u fanele a hoxiwa ekheleni ra ndzilo lowu pfurhaka.+ 12  Ku ni Vayuda van’wana lava u va vekeke ehenhla ka vukongomisi bya muganga lowu nga ehansi ka vulawuri bya Babilona,+ Xadraka, Mixaka na Abedinigo; vavanuna lava va tiyeke emirini a va ku xiximanga, Wena hosi, a va swi tirheli swikwembu swa wena, naswona xifaniso xa nsuku lexi u xi yimiseke a va xi gandzeli.”+ 13  Enkarhini wolowo Nebukadnetsara, hi vukarhi ni ku hlundzuka,+ a vula rito ra leswaku ku tisiwa Xadraka, Mixaka na Abedinigo.+ Hikwalaho vavanuna lava va tiyeke emirini va tisiwa emahlweni ka hosi. 14  Nebukadnetsara a va angula a ku: “Xana swi tano hakunene, Wena Xadraka, Mixaka na Abedinigo, leswaku a mi swi tirheli swikwembu swa mina,+ naswona xifaniso xa nsuku lexi ndzi xi yimiseke a mi xi gandzeli?+ 15  Kutani loko mi lunghekile leswaku loko mi twa mpfumawulo wa nanga, mhalamhala, katara, haripa ya tinhla tinharhu, xitende, ni nanga leyi nga ni saka ni mixaka hinkwayo ya swichayachayana swa vuyimbeleri,+ mi wela ehansi mi gandzela xifaniso lexi ndzi xi endleke, swi lulamile. Kambe loko mi nga gandzeli, hi nkarhi wolowo mi ta hoxiwa ekheleni ra ndzilo lowu pfurhaka. Naswona hi xihi xikwembu lexi xi nga mi ponisaka emavokweni ya mina?”+ 16  Xadraka, Mixaka na Abedinigo va hlamula, va byela hosi va ku: “Wena Nebukadnetsara, emhakeni leyi a hi bohekanga ku vula rito hi ku angula.+ 17  Loko swi fanele swi va tano, Xikwembu xa hina lexi hi xi tirhelaka xa swi kota ku hi ponisa. Xi ta hi ponisa+ hi huma ekheleni ra ndzilo lowu pfurhaka ni le vokweni ra wena, Wena hosi. 18  Loko swi nga ri tano, swi tive wena, Wena hosi, leswaku swikwembu swa wena a hi swi tirheli, ni xifaniso xa nsuku lexi u xi yimiseke a hi nge xi gandzeli.”+ 19  Hiloko Nebukadnetsara a hlundzuka ngopfu, ku languteka ka xikandza xakwe ku hundzuka eka Xadraka, Mixaka na Abedinigo. A hlamula, a lerisa leswaku khele ri hlanganyetiwa ri hisa hilaha ku andzisiweke ka nkombo eka ku hisa loku tolovelekeke. 20  Kutani a byela vavanuna van’wana lava tiyeke emirini va ntamu lowukulu,+ lava a va ri eka vandla rakwe ra nyimpi leswaku va boha Xadraka, Mixaka na Abedinigo, va va hoxa ekheleni ra ndzilo lowu pfurhaka.+ 21  Hiloko vavanuna lava va tiyeke emirini va bohiwa va ri ni minkhancu ya vona, tinguvu ta vona ni swihuku swa vona ni swiambalo swin’wana swa vona kutani va hoxiwa ekheleni ra ndzilo lowu pfurhaka. 22  Hikwalaho ka leswi rito ra hosi a ri ri ni nsele nileswi khele a ri hlanganyetiwe ri hisa ku tlurisa, vavanuna lava tiyeke emirini lava va khomeke Xadraka, Mixaka na Abedinigo hi vona lava va dlayiweke hi langavi ra ndzilo. 23  Kambe vavanuna lavan’wana lava tiyeke emirini, havanharhu, Xadraka, Mixaka na Abedinigo, va wele endzeni ka khele ra ndzilo lowu pfurhaka va bohiwile.+ 24  Hi nkarhi wolowo Nebukadnetsara lowa hosi a chava kutani a yima hi ku hatlisa. A angula, a byela valawuri va yena va le henhla va le vuhosini, a ku: “Xana a va nga ri vanharhu vavanuna lava tiyeke emirini lava hi va hoxeke exikarhi ka khele ra ndzilo lowu pfurhaka va bohiwile?”+ Va hlamula hosi va ku: “Ina, a va ri vanharhu, Wena hosi.” 25  A angula a ku: “Maswivo! Ndzi vona vavanuna va mune lava tiyeke emirini va famba-famba va ntshunxekile exikarhi ka ndzilo, naswona a va vaviseki, lowa vumune u ni xivumbeko xa n’wana wa swikwembu.”+ 26  Hiloko Nebukadnetsara a tshinela enyangweni ya khele ra ndzilo lowu pfurhaka.+ A angula a ku: “Xadraka, Mixaka na Abedinigo, n’wina malandza ya Xikwembu Lexi nge Henhla-henhla,+ humani mi ta laha!” Enkarhini wolowo Xadraka, Mixaka na Abedinigo va huma endzeni ka ndzilo. 27  Kutani valanguteri ni valawuri lavakulu ni tindhuna letikulu+ ta hosi lava a va hlengeletanile va vona vavanuna lava va tiyeke emirini, leswaku ndzilo a wu vanga na matimba emirini wa vona,+ hambi ku ri nsisi wun’we wa nhloko+ ya vona a wu vavukanga, ni minkhancu ya vona a yi hundzukanga ni risema ra ndzilo a ri nga ri kona eka vona. 28  Nebukadnetsara a angula a ku: “A ku vongiwe Xikwembu xa Xadraka, Mixaka na Abedinigo,+ lexi rhumeke ntsumi+ ya xona kutani xi ponisa malandza ya xona lawa a ma xi tshemba,+ lawa ma hundzuleke rito ra hosi, ma nyiketa miri wa wona, hikuva a ma nga ta tirhela+ ni ku gandzela+ xikwembu xin’wana nikatsongo handle ka Xikwembu xa wona.+ 29  Kutani ndzi humesa xileriso,+ leswaku vanhu van’wana ni van’wana, vanhu va tiko kumbe ririmi lava va vulaka nchumu lowu hoxeke malunghana ni Xikwembu xa Xadraka, Mixaka na Abedinigo va fanele va phatluleriwa,+ yindlu ya vona yi fanele yi hundzuka xihambukelo xa vanhu hinkwavo;+ tanihi leswi xi nga riki kona xikwembu xin’wana lexi xi kotaka ku kutsula ku fana ni lexi.”+ 30  Enkarhini wolowo hosi yi endle leswaku Xadraka, Mixaka na Abedinigo swi va fambela kahle emugangeni lowu nga ehansi ka vulawuri bya Babilona.+

Tinhlamuselo ta le hansi