Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

Daniyele 2:1-49

2  Hi lembe ra vumbirhi ra vuhosi bya Nebukadnetsara, Nebukadnetsara u lorhe milorho;+ moya wakwe wu sungula ku karhateka,+ vurhongo byakwe byi hela.  Kutani hosi yi humesa rito leswaku ku vitaniwa vaprista lava va endlaka masalamusi+ ni vangoma ni valoyi ni Vakalidiya leswaku va ta hlamusela hosi milorho ya yona.+ Hiloko va fika va yima emahlweni ka hosi.  Hosi yi ku eka vona: “Ndzi lorhe norho, naswona moya wa mina wu karhatekile, wu lava ku tiva norho lowu.”  Hiloko Vakalidiya va vulavula ni hosi hi Xiaramu,+ va ku: “Wena hosi, hambeta u hanya hilaha ku nga riki na makumu.+ Byela malandza ya wena norho wa kona, kutani hi ta vula nhlamuselo ya wona.”+  Hosi yi hlamula yi byela Vakalidiya yi ku: “Ndzi humesa rito: Loko mo ka mi nga ndzi tivisi norho lowu, ni nhlamuselo ya wona, mi ta phatluleriwa,+ naswona tindlu ta n’wina ti ta hundzuriwa swihambukelo swa vanhu hinkwavo.+  Kambe loko mo vula norho ni nhlamuselo ya wona, ndzi ta mi nyika tinyiko ni xihanano ni xichavo lexikulu.+ Hikokwalaho ndzi byeleni norho lowu ni nhlamuselo ya wona.”  Va hlamula ra vumbirhi va ku: “Hosi a yi byele malandza ya yona norho lowu, kutani hi ta vula nhlamuselo ya wona.”  Hosi yi hlamula yi ku: “Entiyisweni, ndza swi lemuka leswaku mi ringeta ku kuma nkarhi, tanihi leswi mi xiyeke leswaku mina ndzi humesa rito.  Hikuva loko mo ka mi nga ndzi tivisi norho lowu, xigwevo+ lexi xi ri xoxe xi ta va ehenhla ka n’wina. Kambe mi pfumele ku ndzi byela rito ro hemba, leri hoxeke,+ kukondza nkarhi wu hundzuka. Hikokwalaho ndzi byeleni norho lowu kutani ndzi ta swi tiva leswaku mi nga swi kota ku hlavutela nhlamuselo ya wona.” 10  Vakalidiya va hlamula emahlweni ka hosi, va ku: “A ku na munhu emisaveni leyi omeke loyi a nga kotaka ku kombisa mhaka leyi ya hosi, tanihi leswi yi nga riki kona hosi leyikulu kumbe ndhuna leyikulu leyi vutiseke nchumu wo kota lowu eka muprista un’wana ni un’wana la endlaka masalamusi kumbe emungomeni kumbe eka Mukalidiya. 11  Kambe nchumu lowu hosi yi wu vutisaka wa nonon’hwa, a nga kona munhu loyi a nga wu kombisaka emahlweni ka hosi handle ka swikwembu,+ leswi swi nga tshamiki swin’we ni nyama.”+ 12  Hikwalaho ka sweswo hosi yi hlundzuka, yi kariha ngopfu,+ yi humesa rito ra leswaku ku lovisiwa vavanuna hinkwavo vo tlhariha va Babilona.+ 13  Hiloko xileriso xi huma, vavanuna vo tlhariha a va ri kusuhi ni ku dlayiwa; kutani va lava Daniyele ni vanakulobye, leswaku ku va vona va dlayiwaka. 14  Enkarhini wolowo Daniyele, a a vulavula hi vutlhari ni hi ku twisisa+ eka Ariyoko murhangeri wa varindzi va hosi, lava a va humile ku ya dlaya vavanuna vo tlhariha va Babilona. 15  A hlamula Ariyoko ndhuna ya hosi, a ku: “Hikwalaho ka yini hosi yi humesa xileriso xo tika hi ndlela leyi?” Hiloko Ariyoko a tivisa Daniyele mhaka leyi.+ 16  Kutani Daniyele a nghena, a kombela hosi leswaku yi n’wi nyika nkarhi wo hlavutela nhlamuselo hilaha ku heleleke ehosini.+ 17  Endzhaku ka sweswo Daniyele a ya endlwini yakwe; kutani a vula mhaka leyi eka Hananiya, Mixayele na Azariya vanakulobye, 18  leswaku va kombela tintswalo+ eka Xikwembu xa le tilweni+ malunghana ni xihundla lexi,+ leswaku va nga n’wi lovisi Daniyele ni vanakulobye ni vavanuna vo tlhariha lava va seleke va Babilona.+ 19  Hiloko xihundla xi hlavuteriwa Daniyele exivonweni xa nivusiku.+ Hikwalaho Daniyele a dzunisa+ Xikwembu xa le tilweni. 20  Daniyele a hlamula a ku: “Vito ra Xikwembu a ri dzunisiwe+ ku sukela enkarhini lowu nga riki na makumu ku ya enkarhini lowu nga riki na makumu, hikuva vutlhari ni matimba—i swa xona.+ 21  Xi hundzula minkarhi ni tinguva,+ xi susa tihosi ni ku veka tihosi,+ lavo tlhariha xi va nyika vutlhari ni lava nga ni ku twisisa+ xi va nyika vutivi. 22  Xi hlavutela swilo swo enta ni swilo leswi tumbetiweke,+ xi tiva leswi nga emunyameni;+ ku vonakala+ ku tshama na xona. 23  Wena Xikwembu xa vatatana, ndza ku dzunisa ni ku ku bumabumela,+ hikuva u ndzi nyike vutlhari+ ni matimba. Kutani u ndzi tivise leswi hi swi kombeleke eka wena, hikuva u hi tivise mhaka ya hosi.”+ 24  Hikwalaho ka leswi Daniyele u nghene eka Ariyoko,+ loyi hosi yi n’wi vekeke leswaku a lovisa vavanuna vo tlhariha va Babilona.+ U yile, a n’wi byela a ku: “U nga tshuki u lovisa ni un’we eka vavanuna vo tlhariha va Babilona. Ndzi yise emahlweni ka hosi,+ leswaku ndzi ta vula nhlamuselo ehosini.” 25  Hiloko Ariyoko, hi ku hatlisa, a yisa Daniyele emahlweni ka hosi, a ku eka yona: “Ndzi kume munhu la tiyeke emirini eka lava va nga makhumbi+ ya Yuda loyi a nga tivisaka hosi nhlamuselo.” 26  Hosi yi hlamula Daniyele, loyi vito rakwe a a ri Beltexatsara,+ yi ku: “Xana u swi fanelekela kahle ku ndzi tivisa norho lowu ndzi wu voneke, ni nhlamuselo ya wona?”+ 27  Daniyele a hlamula a ri emahlweni ka hosi a ku: “Xihundla lexi hosi yi xi vutisaka vavanuna vo tlhariha, vangoma, vaprista lava endlaka masalamusi ni vangoma va swilo swa le mpfhukeni, a va swi koti ku xi hlamusela hosi.+ 28  Hambiswiritano, xi kona Xikwembu ematilweni lexi xi nga Muhlavuteri wa swihundla,+ naswona xi tivise Hosi Nebukadnetsara leswi nga ta humelela exiphen’wini xo hetelela xa masiku.+ Norho wa wena ni swivono swa nhloko ya wena esangwini ra wena—hi leswi: 29  “Loko ku ri wena, Wena hosi, loko u ri esangwini+ ra wena ku fike miehleketo ya wena malunghana ni leswi swi nga ta humelela endzhaku ka leswi, kutani Loyi a nga Muhlavuteri wa swihundla u ku tivise leswi swi nga ta humelela.+ 30  Loko ku ri mina, xihundla lexi xi hlavuteriwe mina ku nga ri hikwalaho ka leswi ndzi nga ni vutlhari byo tlula bya van’wana lava hanyaka,+ kambe leswaku nhlamuselo yi tivisiwa hosi hi yoxe nileswaku u tiva miehleketo ya mbilu ya wena.+ 31  “Wena hosi, u langutile, kutani waswivo, a ku ri ni xifaniso xin’wana lexikulu. Xifaniso xexo, lexi a xi ri xikulu, lexi ku vangama ka xona a ku nga tolovelekanga, a xi yime emahlweni ka wena, xivumbeko xa xona a xi chavisa. 32  Loko ku ri xifaniso xexo, nhloko ya xona a yi endliwe hi nsuku lowunene,+ xifuva xa xona ni mavoko ya xona a swi ri swa silivhere,+ khwiri ra xona ni mindzhumbi ya xona a swi ri swa koporo,+ 33  milenge ya xona a yi ri ya nsimbi,+ xiphemu xa mikondzo ya xona a xi ri xa nsimbi, xiphemu xin’wana a xi ri xa vumba.+ 34  U ye emahlweni u languta kukondza ribye ri phemeka, ku nga ri hi mavoko,+ kutani ri ba xifaniso emikondzweni ya xona ya nsimbi ni ya vumba, ri xi pfotlosa.+ 35  Hi nkarhi wolowo nsimbi, vumba, koporo, silivhere ni nsuku, hinkwaswo ka swona, swi pfotlosiwa swi fana ni mungu lowu humaka exivuyeni hi ximumu,+ kutani mheho yi swi fambisa lerova vuthala bya swona a byi kumekanga nikatsongo.+ Loko ku ri ribye leri ri beke xifaniso lexi, ri hundzuke ntshava leyikulu, ri tata misava hinkwayo.+ 36  “Lowu i norho, naswona nhlamuselo ya wona hi ta yi tivisa hosi.+ 37  Wena hosi, hosi ya tihosi, wena loyi Xikwembu xa le tilweni xi ku nyikeke mfumo,+ matimba, ntamu ni xindzhuti, 38  loyi xi vekeke evokweni ra wena,+ ndhawu yin’wana ni yin’wana leyi vana va vanhu va tshamaka eka yona, swivandzana swa nhova ni swivumbiwa leswi nga ni timpiko swa matilo, loyi xi ku endleke mufumi ehenhla ka swona hinkwaswo, wena u nhloko ya nsuku.+ 39  “Endzhaku ka wena ku ta humelela mfumo+ wun’wana lowu nga wutsongo eka wena;+ ni mfumo wun’wana, wa vunharhu, wa koporo, lowu wu nga ta fuma ehenhla ka misava hinkwayo.+ 40  “Loko ku ri mfumo wa vumune,+ wu ta tiya kukota nsimbi.+ Tanihi leswi nsimbi yi pfotlosaka ni ku sila xin’wana ni xin’wana, hikwalaho, kukota nsimbi leyi yi fayaka, wu ta pfotlosa ni ku faya hinkwayo ka yona.+ 41  “Tanihi leswi u voneke xiphemu xa mikondzo ni swikunwana swi ri vumba bya muvumbi ni xiphemu xin’wana xi ri nsimbi,+ mfumo lowu wu ta avana,+ kambe eka wona ku ta va ni ku tiya loku fanaka ni ka nsimbi, tanihi leswi u voneke nsimbi yi pfanganisiwe ni vumba byo tsakama.+ 42  Naswona leswi xiphemu xa swikunwana swa mikondzo xi nga nsimbi, xiphemu xin’wana xi nga vumba, mfumo lowu wu ta va ni matimba eka tlhelo rin’wana, kasi eka tlhelo rin’wana wu ta va lowu fayekaka. 43  Tanihi leswi u voneke nsimbi yi pfanganisiwe ni vumba, swi ta pfangana ni vana va vanhu; kambe swi nga ka swi nga namarhelani, xin’wana eka xin’wana, hilaha nsimbi yi nga pfanganiki ni vumba. 44  “Emasikwini ya tihosi+ teto Xikwembu xa le tilweni+ xi ta veka mfumo+ lowu wu nga ta ka wu nga lovisiwi.+ Mfumo lowu wu nga ka wu nga hundziseriwi eka vanhu van’wana.+ Wu ta pfotlosa kutani wu herisa mimfumo leyi hinkwayo,+ kambe wona wu ta tshama hilaha ku nga riki na makumu;+ 45  tanihi leswi u voneke leswaku ribye a ri phemiwanga hi mavoko entshaveni,+ nileswaku ri pfotlose nsimbi, koporo, vumba, silivhere ni nsuku.+ Xikwembu Lexikulu+ xi tivise hosi leswi nga ta humelela endzhaku ka leswi.+ Naswona norho lowu wa tshembeka, nhlamuselo ya wona ya tshembeka.”+ 46  Enkarhini wolowo Hosi Nebukadnetsara a wela ehansi hi xikandza, a kombisa xichavo eka Daniyele, kutani a humesa rito leswaku a endleriwa nyiko ni murhi wa risuna.+ 47  Hosi yi angula Daniyele yi ku: “Entiyisweni Xikwembu xa n’wina i Xikwembu xa swikwembu+ ni Hosi ya tihosi+ ni Muhlavuteri wa swihundla, hikuva wena u kote ku hlavutela xihundla lexi.”+ 48  Hikwalaho hosi yi endla Daniyele a va munhu lonkulu,+ yi n’wi nyika tinyiko to tala letikulu, yi n’wi endla mufumi ehenhla ka muganga hinkwawo lowu nga ehansi ka vulawuri bya Babilona+ ni mulawuri lonkulu ehenhla ka vavanuna hinkwavo vo tlhariha va Babilona. 49  Kavaloko Daniyele, a kombela hosi, kutani eka vukongomisi bya muganga lowu nga ehansi ka vulawuri bya Babilona yi veka Xadraka, Mixaka na Abedinigo,+ kambe Daniyele a tshama exivandleni+ xa hosi.

Tinhlamuselo ta le hansi