Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Timotiya 4:1-22

4  Ndza ku lerisa swinene-nene emahlweni ka Xikwembu na Kreste Yesu, loyi a nga ta avanyisa+ lava hanyaka ni lava feke,+ naswona hi ku humelela+ kakwe ni mfumo+ wakwe,  chumayela rito,+ u va eka rona hi xihatla hi nguva+ leyinene, hi nguva+ ya ku karhateka, u tshinya,+ u holovela, u khongotela, hi mbilu yo leha+ leyi heleleke ni vutshila byo dyondzisa.  Hikuva ku ta va ni nkarhi lowu va nga ta ka va nga tiyiseli eka dyondzo+ leyi hanyisaka, kambe, hi ku landza ku navela ka vona, va ta tihlengeletela vadyondzisi leswaku tindleve ta vona ti ta nyangalatiwa;+  naswona va ta hundzuluxela tindleve ta vona ekule ni ntiyiso, kasi va ta hambukiseriwa etimhakeni ta mavunwa.+  Kambe wena, hlayisa mianakanyo+ ya wena leyi hlutekeke eka hinkwaswo, tiyiselela nhlomulo,+ endla ntirho wa muevhangeli,+ hetisisa vutirheli+ bya wena hi xitalo.  Hikuva ana se ndza chuluriwa ku fana ni gandzelo+ ra swakunwa, naswona nkarhi lowu faneleke wa ku ntshunxiwa+ ka mina wu tshinele.  Ndzi lwe nyimpi+ leyinene, ndzi tsutsume pfhumba ndzi kondza ndzi heta,+ ndzi hlayise ripfumelo.+  Ku sukela hi nkarhi lowu ku ya emahlweni ndzi vekeriwe harhi ya ku lulama,+ leyi Hosi, muavanyisi+ wo lulama, a nga ta ndzi nyika yona yi va hakelo+ hi siku+ ra kona, kambe a nge nyiki mina ntsena, kambe u ta nyika ni hinkwavo lava rhandzeke ku humelela kakwe.  Endla hinkwaswo leswi u nga swi kotaka leswaku u ta eka mina hi ku hatlisa.+ 10  Hikuva Demasi+ u ndzi fularherile hileswi a rhandzeke mafambiselo+ ya swilo ya sweswi, naswona u ye eTesalonika; Kreskene u ye eGalatiya,+ Tito u ye eDalamatiya. 11  I Luka ntsena la nga na mina. Teka Marka u ta na yena, hikuva wa ndzi pfuna+ eku tirheleni. 12  Kambe ndzi rhumele Tixiko+ aEfesa. 13  Loko u ta, tana ni nkhancu lowu ndzi wu siyeke na Karpo eTrowasi,+ ni tibuku-nsongwa, ngopfu-ngopfu leta madzovo. 14  Alekzanda+ mufuri wa koporo u ndzi endle swilo swo tala swo biha—Yehovha u ta n’wi tlherisela hi ku ya hi swiendlo swakwe+ 15  na wena tivonele eka yena, hikuva u kanete marito ya hina hi mpimo lowu hundzeletiweke. 16  Loko ndzi tihlamulela ro sungula, a nga kona la yimeke na mina, kambe hinkwavo va sungule ku ndzi fularhela+—onge va nga ka va nga hlayeriwi swona+ 17  kambe Hosi yi yime ekusuhi na mina+ yi ndzi nyika matimba,+ leswaku ha mina, ku chumayela ku hetisisiwa hi xitalo naswona matiko hinkwawo ma ku twa;+ naswona ndzi kutsuriwile enon’wini wa tinghala.+ 18  Hosi yi ta ndzi kutsula entirhweni+ wun’wana ni wun’wana wo homboloka naswona yi ta ndzi ponisa leswaku ndzi ta kuma mfumo+ wa yona wa le tilweni. Ku vangama a ku ve ka yona hi masiku ni masiku. Amen. 19  Ndzi rungulele Priska+ na Akhwila ni ndyangu wa Onesiforo.+ 20  Erasto+ u sele le Korinto,+ kambe ndzi siye Trofimo+ a vabya eMileta.+ 21  Endla hinkwaswo leswi u nga swi kotaka leswaku u fika vuxika byi nga si fika. Yubulo wa ku rungula, na Pude na Lino na Klawudiya ni vamakwerhu hinkwavo. 22  Hosi a yi ve ni moya lowu u wu kombisaka.+ Musa wa yona lowu nga faneriwiki a wu ve na n’wina.

Tinhlamuselo ta le hansi