Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Timotiya 3:1-17

3  Kambe tiva leswi, leswaku emasikwini yo hetelela+ ku ta fika+ minkarhi ya mangava leyi swi nonon’hwaka ku langutana na yona.  Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari,+ lava nga nkhensiki, lava nga tshembekiki,+  lava nga riki na xinakulobye xa ntumbuluko,+ lava nga laviki ntwanano+ hambi wu ri wihi, valumbeti,+ lava nga tikhomiki, lava nga ni tihanyi,+ lava nga rhandziki vunene,+  vaxengi,+ lava omeke tinhloko, lava tikukumuxaka hi ku tinyungubyisa,+ lava rhandzaka mintsako ku ri ni ku rhandza Xikwembu,+  va ri ni xivumbeko xa ku tinyiketela loku nga ni vukwembu+ kambe va tikomba va nga tshembeki eka matimba+ ya kona; kutani lava u va fularhela.+  Hikuva eka lava ku humelela vavanuna lava ngungumelaka va nghena emindyangwini+ naswona va kongomisa vavasati lava tsaneke, lava tikeriwaka hi swidyoho tanihi makhumbi ya vona, va kongomisiwa hi ku navela+ ko hambana-hambana,  nkarhi hinkwawo va dyondza kambe a va swi koti nikatsongo ku kuma vutivi lebyi kongomeke bya ntiyiso.+  Kutani ndlela leyi Yani na Yambri+ va kaneteke Muxe ha yona, hi yona ndlela leyi lava va hambetaka va kaneta ntiyiso+ ha yona, vanhu lava onhakeke hi ku helela emianakanyweni,+ lava nga amukelekiki malunghana ni ripfumelo.+  Nilokoswiritano, a va nge he endli nhluvuko wun’wana, hikuva ku penga ka vona ku ta va ku ri erivaleni swinene eka hinkwavo, hilaha ku penga ka vavanuna lavaya vambirhi ku endlekiseke+ xiswona. 10  Kambe wena u landzelerisise dyondzo ya mina, ndlela ya mina ya vutomi,+ xikongomelo xa mina, ripfumelo ra mina, ku va ni mbilu yo leha ka mina, rirhandzu ra mina, ku tiyisela ka mina, 11  ku xanisiwa ka mina, maxangu ya mina, muxaka wa swilo leswi swi ndzi endlekeleke eAntiyoka,+ eIkoniya,+ eListra,+ muxaka wa minxaniso leyi ndzi yi tiyiseleke; kambe Hosi yi ndzi kutsurile eka hinkwaswo.+ 12  Entiyisweni, hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.+ 13  Kambe vanhu vo homboloka ni vaxisi va ta ya emahlweni va nyanya evubihini bya vona, va hambukisa, na vona va hambukisiwa.+ 14  Hambiswiritano, wena tshama eka swilo leswi u swi dyondzeke, leswi u susumetelekeke ku swi pfumela,+ u tiva vanhu lava u swi dyondzeke eka vona+ 15  ni leswaku ku sukela loko wa ha ri ricece+ u tive matsalwa yo kwetsima, lawa ma swi kotaka ku ku tlharihisa leswaku u ta pona+ hi ripfumelo mayelana na Kreste Yesu.+ 16  Matsalwa hinkwawo ma huhuteriwe hi Xikwembu+ naswona ma pfuna ku dyondzisa,+ ku tshinya,+ ku lulamisa+ swilo, ku laya+ eku lulameni, 17  leswaku munhu wa Xikwembu a faneleka+ hi ku helela, a hlomisiwa hi ku helela eka ntirho+ wun’wana ni wun’wana lowunene.

Tinhlamuselo ta le hansi