Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tikronika 6:1-42

6  Hi wona nkarhi lowu ha wona Solomoni a vuleke a ku:+ “Yehovha hi yexe u vule leswaku u ta tshama eku dzwihaleni lokukulu;+  loko ku ri mina, ndzi ku akele yindlu yo tshama eka yona leyi tlakukeke+ ni ndhawu leyi u nga ta tshama eka yona hilaha ku nga riki na makumu.”+  Hiloko hosi yi hundzuluxa xikandza xa yona yi sungula ku katekisa+ nhlengeletano hinkwayo ya Israyele, nhlengeletano hinkwayo ya Israyele yi yimile.+  Yi ya emahlweni yi ku: “A a dzunisiwe Yehovha Xikwembu xa Israyele,+ loyi a vulavuleke hi nomu wakwe na Davhida tatana+ kutani a swi hetisisa hi mavoko yakwe,+ a ku,  ‘Ku sukela esikwini leri ndzi humeseke vanhu va mina etikweni ra Egipta ha rona, a ndzi hlawulanga muti etinyimbeni hinkwato ta Israyele leswaku ndzi akela vito ra mina yindlu ri tshama kona,+ naswona a ndzi hlawulanga munhu la nga ta rhangela vanhu va mina, ku nga Israyele.+  Kambe ndzi ta hlawula Yerusalema+ leswaku vito ra mina ri va eka wona, naswona ndzi ta hlawula Davhida leswaku a lawula vanhu va mina, ku nga Israyele.’+  Kutani swi va embilwini ya Davhida tatana leswaku a ri akela yindlu vito ra Yehovha Xikwembu xa Israyele.+  Kambe Yehovha a byela Davhida tatana, a ku, ‘Hikwalaho ka leswi a swi ri embilwini ya wena leswaku u ri akela yindlu vito ra mina, u endle kahle, hikuva a swi ri embilwini ya wena.+  Ntsena wena a wu nge yi aki yindlu leyi,+ kambe n’wana wa wena loyi a humaka emasengeni ya wena hi yena la nga ta ri akela yindlu vito ra mina.’+ 10  Yehovha a hetisisa rito rakwe leri a ri vuleke,+ leswaku ndzi yima ematshan’weni ya Davhida tatana,+ ndzi tshama exiluvelweni+ xa Israyele hilaha Yehovha a vuleke hakona,+ nileswaku ndzi ri akela yindlu vito ra Yehovha Xikwembu xa Israyele,+ 11  nileswaku ndzi veka Areka+ laha ntwanano wa Yehovha wu nga kona, lowu a wu endleke ni vana va Israyele.”+ 12  Hiloko a yima emahlweni ka alitari ya Yehovha emahlweni ka nhlengeletano hinkwayo ya Israyele,+ kutani a tshambuluta swandla.+ 13  (Hikuva Solomoni a a endle tshala+ ra koporo kutani a ri veka exikarhi ka xivava.+ Ku leha ka rona a ku ri swisungunu swa ntlhanu, vuanamo bya rona a ku ri swisungunu swa ntlhanu, ku tlakuka ka rona a ku ri swisungunu swinharhu; a ya emahlweni a yima ehenhla ka rona.) Kutani a nkhinsama hi matsolo+ emahlweni ka nhlengeletano hinkwayo ya Israyele, a tshambulutela swandla ematilweni.+ 14  A ya emahlweni a ku: “Oho Yehovha Xikwembu xa Israyele,+ a ku na Xikwembu lexi fanaka na wena+ ematilweni kumbe emisaveni, u hlayisa ntwanano+ ni musa wa rirhandzu eka malandza ya wena lawa ma fambaka emahlweni ka wena hi mbilu ya wona hinkwayo;+ 15  wena la endleleke nandza wa wena Davhida tatana leswi u n’wi tshembiseke swona,+ lerova u endle xitshembiso hi nomu wa wena, naswona u xi hetisise hi voko ra wena ku fana ni le sikwini leri.+ 16  Sweswi, Wena Yehovha Xikwembu xa Israyele, endlela nandza wa wena Davhida tatana leswi u n’wi tshembiseke swona, u ku, ‘A ku na munhu wa wena la nga ta susiwa emahlweni ka mina leswaku a nga tshami exiluvelweni xa Israyele,+ loko ntsena vana va wena+ vo khathalela ndlela ya vona hi ku famba enawini wa mina,+ hilaha wena u fambeke hakona emahlweni ka mina.’+ 17  Sweswi, Wena Yehovha Xikwembu xa Israyele,+ xitshembiso xa wena+ lexi u xi tshembiseke nandza wa wena Davhida tatana a xi ve lexi tshembekeke.+ 18  “Kambe, xana entiyisweni Xikwembu xi nga tshama ni vanhu emisaveni?+ Waswivo! Tilo, ina, tilo ra matilo a ri nge ku ringani;+ kutani yindlu leyi ndzi yi akeke i yitsongo ngopfu!+ 19  U fanele u hundzulukela exikhongelweni xa nandza wa wena+ ni le xikombelweni xakwe xo kombela tintswalo,+ Wena Yehovha Xikwembu xanga, hi ku yingisa rito ra xikombelo+ ni xikhongelo lexi nandza wa wena a xi khongelaka emahlweni ka wena,+ 20  leswaku mahlo ya wena ma pfulekela+ yindlu leyi vusiku ni nhlikanhi, endhawini leyi u vuleke leswaku u ta veka vito ra wena eka yona,+ hi ku yingisa xikhongelo lexi nandza wa wena a xi khongelaka endhawini leyi.+ 21  U fanele u yingisa swikombelo swa nandza+ wa wena ni vanhu va wena, ku nga Israyele, loko va khongela endhawini leyi,+ leswaku wena u yingisa u ri endhawini leyi u tshamaka eka yona, ematilweni;+ u fanele u yingisa u tlhela u rivalela.+ 22  “Loko munhu a dyohela munhu-kulobye,+ entiyisweni a n’wi rhukana leswaku a weriwa+ hi ndzhukano, entiyisweni a rhukaniwa emahlweni ka alitari ya wena endlwini leyi,+ 23  onge wena u nga swi twa u ri ematilweni,+ u fanele u teka goza,+ u avanyisa malandza ya wena, leswaku u rihisa lowo homboloka hi ku veka ndlela yakwe enhlokweni+ yakwe ni ku vula la lulameke leswaku u lulamile,+ hi ku n’wi nyika hi ku landza ku lulama ka yena.+ 24  “Loko vanhu va wena, ku nga Israyele, va hluriwa emahlweni ka nala+ hikwalaho ka leswi va tshameleke ku ku dyohela,+ kunene va vuyela eka wena+ kutani va dzunisa vito ra wena,+ va khongela+ naswona va kombela tintswalo eka wena endlwini leyi,+ 25  onge wena u nga swi twa u ri ematilweni,+ u fanele u rivalela xidyoho+ xa vanhu va wena, ku nga Israyele, u va vuyisela+ emisaveni leyi u va nyikeke yona, vona ni vatata wa vona.+ 26  “Loko matilo ma pfariwa lerova ku nga ni mpfula+ hikwalaho ka leswi va tshameleke ku ku dyohela,+ kunene va khongela endhawini leyi,+ va dzunisa vito ra wena, kutani va tlhela exidyohweni xa vona hikwalaho ka ku va u hambete u va xanisa,+ 27  onge wena u nga swi twa u ri ematilweni, u fanele u rivalela xidyoho xa malandza ya wena, ni xa vanhu va wena, ku nga Israyele, hikuva u va dyondzisa+ ndlela leyinene leyi va faneleke va famba ha yona;+ u fanele u va nyika mpfula+ etikweni ra wena leri u ri nyikeke vanhu va wena ri va ndzhaka leyi va yi fuweke.+ 28  “Loko ko tshuka ku va ni ndlala+ etikweni, loko ko tshuka ku va ni ntungu,+ loko ko tshuka ku va ni dyandza+ ni mfurho,+ ku va ni tinjiya+ ni mahele;+ loko nala wa vona+ o tshuka a va rhendzela etikweni ra tinyangwa ta vona+—khombo ra muxaka wihi ni wihi ni vuvabyi bya muxaka wihi ni wihi+ 29  xikhongelo xin’wana ni xin’wana,+ xikombelo xin’wana ni xin’wana xa ku kombela tintswalo+ lexi xi nga endliwaka hi munhu wihi ni wihi kumbe hi vanhu va wena hinkwavo, ku nga Israyele,+ hikuva un’wana ni un’wana u tiva khombo rakwe+ ni ku vaviseka kakwe; kunene loko a tlakusela swandla endlwini leyi,+ 30  onge wena u nga swi twa u ri ematilweni, ndhawu leyi u tshamaka eka yona,+ u fanele u rivalela+ u tlhela u nyika un’wana ni un’wana hi ku ya hi tindlela takwe hinkwato,+ hikuva u tiva mbilu yakwe+ (hikuva wena u ri wexe u yi tiva kahle mbilu ya vana va vanhu);+ 31  ku endlela leswaku va ku chava+ hi ku famba etindleleni ta wena masiku hinkwawo loko va ha hanya evuandlalweni bya misava leyi u yi nyikeke vatata wa hina.+ 32  “Ni le ka munhu wumbe la nga riki xiphemu xa vanhu va wena, ku nga Israyele,+ loyi kunene a humaka etikweni ra le kule hikwalaho ka vito ra wena lerikulu+ ni voko ra wena ra matimba+ ni voko ra wena leri tshambulutekeke,+ kunene va fika va khongela endlwini leyi,+ 33  onge wena u nga yingisa u ri ematilweni, ndhawu ya wena yo tshama eka yona,+ u fanele u endla hinkwaswo leswi munhu wumbe a ku kombelaka swona;+ leswaku vanhu hinkwavo va misava va tiva vito ra wena+ ni ku ku chava+ hilaha vanhu va wena, ku nga Israyele, va endlaka hakona, va tiva leswaku vito ra wena ri vitaniwe endlwini leyi ndzi yi akeke.+ 34  “Loko vanhu va wena vo tshuka va huma va ya enyimpini+ va ya lwa ni valala va vona hi ndlela leyi u va rhumaka ha yona,+ kunene va ku khongela+ va langute etlhelo ra muti lowu u wu hlawuleke ni yindlu leyi ndzi yi akeleke vito ra wena,+ 35  u fanele u yingisa ni xikhongelo xa vona u ri ematilweni ni ku kombela ka vona tintswalo,+ u fanele u va avanyisela.+ 36  “Loko vo tshuka va ku dyohela+ (hikuva a ku na munhu la nga dyohiki),+ kutani u va hlundzukela, u va nyiketa eka nala, kunene lava va va khomaka va va teka va va endla makhumbi etikweni ra le kule kumbe ra le kusuhi;+ 37  va tianakanya kahle va ri etikweni leri va tekiweke va endliwa makhumbi eka rona, kutani va vuya va kombela tintswalo eka wena va ri etikweni leri va nga makhumbi eka rona,+ va ku, ‘Hi dyohile,+ naswona hi endle xihoxo,+ hi endle hilaha ku hombolokeke’;+ 38  kunene va tlhelela eka wena hi mbilu ya vona+ hinkwayo ni hi moya-xiviri wa vona hinkwawo va ri etikweni leri va nga makhumbi+ eka rona eka lava va va tekeke va va endla makhumbi, kunene va khongela eka wena va langute etlhelo ra tiko ra vona leri u ri nyikeke vatata wa vona, muti lowu u wu hlawuleke+ ni yindlu leyi ndzi yi akeleke vito ra wena;+ 39  u fanele u yingisa xikhongelo xa vona ni ku kombela ka vona tintswalo+ u ri ematilweni, endhawini ya wena yo tshama eka yona,+ u fanele u va avanyisela,+ u rivalela+ vanhu va wena lava va ku dyoheleke. 40  “Sweswi, Wena Xikwembu xanga, ndzi kombela leswaku mahlo ya wena+ ma pfuleka, u rhiya tindleve+ u yingisa xikhongelo lexi khumbaka ndhawu leyi. 41  Sweswi, pfuka,+ Wena Yehovha Xikwembu, laha u wiseke kona,+ wena ni Areka ya matimba ya wena.+ Wena Yehovha Xikwembu, vaprista va wena a va ambale ku ponisa, naswona lavo tshembeka va wena a va tsake hi vunene.+ 42  Wena Yehovha Xikwembu, u nga xi tlherisi xikandza xa mutotiwa wa wena.+ Tsundzuka musa wa rirhandzu eka Davhida nandza wa wena.”+

Tinhlamuselo ta le hansi