Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tikronika 4:1-22

4  Kutani a endla alitari ya koporo,+ yi leha swisungunu swa 20, yi anama swisungunu swa 20, yi tlakuka swisungunu swa khume.+  A vumba lwandle leri endliweke hi ku n’okisiwa+ ri va swisungunu swa khume ku suka emakumu man’wana ya rona ku ya emakumu man’wana, ri ri xirhendzevutana matlhelo hinkwawo, ku tlakuka ka rona a ku ri swisungunu swa ntlhanu, naswona ngoti ya kona a yi ri swisungunu swa 30 ku ri rhendzela hinkwaro.+  Etshakwini ra rona hinkwaro a ku ri ni xifaniso xa swin’wetsin’wetsi swa xivumbeko xa rhanga,+ ematlhelweni ya rona hinkwawo, swisungunu swa khume, swi rhendzele lwandle matlhelo hinkwawo.+ Swin’wetsin’wetsi swa xivumbeko xa rhanga a swi ri tilayini timbirhi, swi vumbiwe exivumbekweni xa swona.  A ri yime ehenhla ka tinkunzi ta 12,+ tinharhu ti langute en’walungwini, tinharhu ti langute evupela-dyambu, tinharhu ti langute edzongeni, tinharhu ti langute evuxeni; lwandle a ri ri ehenhla ka tona, swisuti swa tona hinkwaswo a swi ri endzeni.+  Ku bumbula ka rona a ku ri vuanamo bya voko; nomu wa rona a wu fana nileswi nomu wa xinwelo wu endlisiweke xiswona, kukota xiluva xa khon’wa.+ A ri ri xikutsu lexi nga tamelaka+ mimpimo ya tibati ta 3 000.+  Ku tlula kwalaho, a endla swihlambelo swa khume, a veka swa ntlhanu exineneni ni swa ntlhanu eximatsini,+ leswaku ku hlantsweriwa eka swona.+ Swilo leswi yelanaka ni gandzelo ro hisiwa+ a va swi ngulungundza eka swona. Kambe lwandle a ri ri ra muprista leswaku a hlantswa eka rona.+  Kutani a endla swo tlhoma timboni+ swa nsuku, khume ra swona swi endliwe hi ndlela leyi fanaka,+ a swi veka etempeleni, swa ntlhanu exineneni ni swa ntlhanu eximatsini.+  Ku tlula kwalaho, a endla matafula ya khume, a ma veka etempeleni,+ ntlhanu ya wona exineneni ni ntlhanu ya wona eximatsini, a endla minkambana ya nsuku ya 100.  Kutani a endla xivava+ xa vaprista+ ni ndhawu leyikulu leyi biyeleriweke+ ni tinyangwa ta ndhawu leyi biyeleriweke ni tinyangwa ta yona a ti nameka koporo. 10  Lwandle a ri veka etlhelo ra xinene, evuxeni ku ya edzongeni.+ 11  Eku heteleleni Hiramu a endla swihlambelo,+ mafoxolo+ ni minkambana.+ Kutani Hiramu a heta ntirho lowu a wu endleleke Hosi Solomoni endlwini ya Xikwembu xa ntiyiso. 12  Tiphuphu timbirhi+ ni swidlodlo+ swa tiphuphu swa xirhendzevutana ehenhla ka tiphuphu timbirhi ni tinkoka timbirhi+ ta ku funengeta swidlodlo swimbirhi swa tiphuphu swa xirhendzevutana leswi a swi ri ehenhla ka tiphuphu 13  ni tigrenada+ ta 400 ta tinkoka timbirhi, tilayini timbirhi ta tigrenada ta rikoka ha rin’we ta ku funengeta swidlodlo swa tiphuphu timbirhi ta xirhendzevutana leti a ti ri ehenhla ka tiphuphu,+ 14  ni makalichi ya khume+ ni swihlambelo swa khume+ ehenhla ka makalichi; 15  lwandle rin’we+ ni tinkunzi ta 12 ehansi ka rona,+ 16  ni swiolelo, mafoxolo,+ tiforoko+ ni swingolongondzwana swa vona hinkwaswo,+ Hiramu-abivhu+ u swi endlele Hosi Solomoni leswaku swi va swa yindlu ya Yehovha, swa koporo leyi hatimisiweke. 17  Hosi yi swi vumbele eMugangeni wa Yordani emisaveni yo tiya exikarhi ka Sukoti+ na Sereda.+ 18  Hiloko Solomoni a endla swingolongondzwana leswi hinkwaswo, swo tala ngopfu, hikuva ntiko wa koporo a wu nga tiveki.+ 19  Solomoni a endla swingolongondzwana+ hinkwaswo leswi a swi ri endlwini ya Xikwembu xa ntiyiso ni alitari ya nsuku+ ni matafula+ lawa a ku ri ni xinkwa xa nkombiso ehenhla ka wona, 20  ni swo tlhoma timboni+ ni timboni ta swona+ ta nsuku wo tenga, leti nga ta lumekiwa emahlweni ka kamara ra le ndzeni-ndzeni+ hi ku landza nawu; 21  ni swiluva ni timboni ni swo tamela ngoti ya rivoni,+ swa nsuku, (a ku ri nsuku wo tenga swinene,) 22  ni swo tima timboni, minkambana, swinwelo ni swo tamela ndzilo, swa nsuku wo tenga+ ni nyangwa ya yindlu,+ tinyangwa ta yona ta le mpfungwe ti ri ta Ndhawu yo Kwetsima Ngopfu ni tinyangwa+ ta yindlu ya tempele, swi ri swa nsuku.

Tinhlamuselo ta le hansi