Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tikronika 18:1-34

18  Yehoxafati a va ni rifuwo ni ku vangama hi vutalo;+ kambe a endla ntwanano+ wa ku tekelana na Akabu.+  Endzhaku ka malembenyana a rhelela a ya eka Akabu eSamariya;+ kutani Akabu a n’wi endlela xitlhavelo hi tinyimpfu+ ni tihomu to tala, yena ni vanhu lava a a ri na vona. A sungula ku n’wi yenga+ leswaku a tlhandluka a ya hlasela Rhamoti-giliyadi.+  Akabu hosi ya Israyele a byela Yehoxafati hosi ya Yuda a ku: “Xana u ta famba na mina eRhamoti-giliyadi?”+ Yena a n’wi angula a ku: “Mina na wena ha fana, ni vanhu va mina va fana ni vanhu va wena, naswona ndzi na wena enyimpini.”+  Kambe Yehoxafati a byela hosi ya Israyele a ku: “Ndzi kombela u rhanga u vutisa+ rito ra Yehovha.”  Kutani hosi ya Israyele yi hlengeleta vaprofeta,+ vavanuna va 400, yi ku eka vona: “Xana hi fanele hi famba hi ya hlasela Rhamoti-giliyadi enyimpini, kumbe ndzi nga yi ke?”+ Vona va ku: “Tlhandluka, Xikwembu xa ntiyiso xi ta wu nyiketa evokweni ra hosi.”  Kambe Yehoxafati a ku: “Xana a nga ha ri kona muprofeta wa Yehovha laha?+ A hi vutiseni ha yena.”+  Hiloko hosi ya Israyele yi byela Yehoxafati yi ku:+ “Ka ha ri ni munhu un’we+ loyi hi nga vutisaka ha yena eka Yehovha, kambe mina ndza n’wi venga hakunene,+ hikuva a nga ndzi profeteli leswinene, kambe u ndzi profetela swo biha+ emasikwini hinkwawo ya yena. I Mikaya n’wana wa Imila.”+ Kambe Yehoxafati a ku: “Hosi yi nga tshuki yi vula swo fana ni sweswo.”+  Kutani hosi ya Israyele yi vitana mutirhi wa le hubyeni+ yi ku: “Hatlisa u tisa Mikaya n’wana wa Imila.”+  Hosi ya Israyele na Yehoxafati hosi ya Yuda a va tshame eswiluvelweni swa vona, va ambale tinguvu,+ a va tshame exivuyeni enyangweni ya vungheno bya Samariya; vaprofeta hinkwavo a va profeta emahlweni ka vona.+ 10  Kutani Sedekiyasi n’wana wa Kenane a tiendlela timhondzo+ ta nsimbi, a ku: “Yehovha u te,+ ‘Ha tona u ta susumeta Vasiriya u kondza u va lovisa.’”+ 11  Vaprofeta lavan’wana hinkwavo a va profeta leswi fanaka, va ku: “Tlhandlukela eRhamoti-giliyadi, u humelela,+ kunene Yehovha u ta wu nyiketa evokweni ra hosi.”+ 12  Kambe murhumiwa la fambeke a ya vitana Mikaya a vulavula na yena, a ku: “Waswivo! Marito ya vaprofeta hinkwawo ma pfumelelana hi leswinene eka hosi; ndzi kombela leswaku rito ra wena ri fana ni ya vona,+ u fanele u vulavula leswinene.”+ 13  Kambe Mikaya a ku: “Leswi Yehovha a hanyaka,+ leswi Xikwembu xanga xi nga ta vula swona, hi swona leswi ndzi nga ta swi vula.”+ 14  Kutani a fika eka hosi, hosi yi ku eka yena: “Mikaya, xana hi fanele hi ya enyimpini le Rhamoti-giliyadi, kumbe mina ndzi fanele ndzi nga yi?” Xikan’we-kan’we a ku: “Tlhandluka, u humelela; va ta nyiketiwa evokweni ra n’wina.”+ 15  Hiloko hosi yi ku eka yena: “Xana ndzi ku hlambanyise+ kangani leswaku u ndzi byela ntiyiso ntsena hi vito ra Yehovha?”+ 16  Kutani a ku: “Kunene ndzi vona Vaisrayele hinkwavo va hangalakile etintshaveni, ku fana ni tinyimpfu leti nga riki na murisi.+ Yehovha a ya emahlweni a ku: ‘Lava a va na vini.+ A va tlhelele un’wana ni un’wana endlwini yakwe hi ku rhula.’”+ 17  Kutani hosi ya Israyele yi byela Yehoxafati yi ku: “Xana a ndzi ku byelanga ndzi ku, ‘A nge ndzi profeteli swilo leswinene kambe u ta ndzi profetela swo biha’?”+ 18  A ya emahlweni a ku: “Hikokwalaho, yingisani rito ra Yehovha:+ Kunene ndzi vona Yehovha a tshame exiluvelweni+ xakwe naswona vuthu+ hinkwaro ra le matilweni ri yime exineneni xakwe ni le ximatsini xakwe.+ 19  Yehovha a ku, ‘I mani la nga ta yenga Akabu lowa hosi ya Israyele leswaku a tlhandluka a ya wa eRhamoti-giliyadi?’ Ku ve ni ku vulavula, loyi a vula swo fana ni leswi, luya a vula swo fana ni leswiya.+ 20  Eku heteleleni moya+ wu humelela wu yima emahlweni ka Yehovha, wu ku, ‘Mina ndzi ta n’wi yenga.’ Hiloko Yehovha a ku eka yena, ‘U ta n’wi yenga hi yini?’+ 21  Hiloko a ku, ‘Kunene ndzi ta famba ndzi ya va moya wa vuxisi enon’wini wa vaprofeta vakwe hinkwavo.’+ Yena a ku, ‘U ta n’wi yenga, ku tlula kwalaho, u ta n’wi hlula.+ Famba u ya endla hi ndlela yoleyo.’+ 22  Waswivo, Yehovha u veke moya wa vuxisi enon’wini wa vaprofeta lava va wena;+ kambe Yehovha hi byakwe u vule khombo malunghana na wena.”+ 23  Sedekiyasi+ n’wana wa Kenane+ a tshinela a makala Mikaya+ erhameni+ a ku: “Xana moya wa Yehovha wu hume njhani eka mina wu ta vulavula na wena?”+ 24  Hiloko Mikaya a ku: “Waswivo! U ta yi vona ndlela yoleyo u nga ta nghena ha yona esikwini+ rero ekamareni ra le ndzeni-ndzeni u ya tifihla kona.”+ 25  Kutani hosi ya Israyele yi ku: “Tekani Mikaya mi n’wi tlherisela eka Amoni lowa ndhuna ya muti ni le ka Yowasi n’wana wa hosi.+ 26  N’wina mi fanele mi ku, ‘Hosi yi te: “Nghenisani munhu loyi endlwini ya vubohiwa,+ mi n’wi nyika xinkwa+ xitsongo ni mati matsongo, kukondza loko ndzi vuya hi ku rhula.”’”+ 27  Hiloko Mikaya a ku: “Loko u vuya hi ku rhula, Yehovha a nga vulavulanga na mina.”+ A tlhandlekela a ku: “Ma swi twa hinkwenu.”+ 28  Hosi ya Israyele na Yehoxafati hosi ya Yuda va tlhandlukela eRhamoti-giliyadi.+ 29  Hosi ya Israyele yi byela Yehoxafati yi ku: “Ndzi ta endla leswaku va nga ndzi tivi+ loko hi nghena enyimpini, kambe loko ku ri wena, ambala tinguvu ta wena.”+ Hiloko hosi ya Israyele yi endla leswaku va nga yi tivi, endzhaku ka swona va nghena enyimpini.+ 30  Loko ku ri hosi ya Siriya, a yi lerise tindhuna ta makalichi leti a ti ri ta yona, yi ku: “Mi fanele mi lwa, hayi ni lontsongo kumbe lonkulu, kambe ni hosi ya Israyele ntsena.”+ 31  Hi ku hatlisa loko tindhuna ta makalichi ti vona Yehoxafati, ti tibyela ti ku: “I hosi ya Israyele.”+ Hiloko ti hundzuka leswaku ti lwa na yena; Yehoxafati a huwelela a kombela mpfuno,+ kutani Yehovha a n’wi pfuna,+ xikan’we-kan’we Xikwembu xi va yenga va suka eka yena.+ 32  Hi ku hatlisa loko tindhuna ta makalichi ti vona leswaku a ku nga ri yena hosi ya Israyele, xikan’we-kan’we ti tshika ku n’wi landzelela.+ 33  A ku ri ni munhu loyi a a kunge vurha byakwe a nga lemukanga, kambe a tlhava+ hosi ya Israyele exikarhi ka ndzhungo wa nguvu ya nyimpi ni nguvu ya mahakatimba ya nsimbi, lerova a byela muchayeri wa kalichi a ku:+ “Hundzuluxa voko ra wena u ndzi humesa enxaxeni, hikuva ndzi vavisiwe ngopfu.”+ 34  Nyimpi yi hambeta yi hisa ngopfu esikwini rero, hosi ya Israyele yi boheka ku hlayisiwa yi yimile ekalichini yi langutane ni Vasiriya ku fikela nimadyambu; hakatsongo-tsongo yi fa loko dyambu ri pela.+

Tinhlamuselo ta le hansi