Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 9:1-37

9  Loko ku ri Elixa lowa muprofeta, u vitane un’wana wa vana+ va vaprofeta, a ku eka yena: “Tikhame masenge+ u khoma gula+ leri ra mafurha hi voko, u ya eRhamoti-giliyadi.+  Loko u fike kwalaho, u lava Yehu+ n’wana wa Yehoxafati n’wana wa Nimxi; u fanele u nghena u n’wi yimisa exikarhi ka vamakwavo, u n’wi tisa ekamareni ra le ndzeni-ndzeni.+  U fanele u teka gula ra mafurha u ri chela enhlokweni yakwe,+ u ku, ‘Yehovha u te: “Ndza ku tota+ leswaku u va hosi+ ya Israyele.”’ Kutani u fanele u pfula nyangwa u baleka, u nga rindzi.”  Hiloko mutirhi, mutirhi wa muprofeta a khoma ndlela a ya eRhamoti-giliyadi.  Loko a fika, waswivo, varhangeri va vandla ra nyimpi a va tshamile. Kutani a ku: “Ndzi ku khomele rito,+ Wena murhangeri.” Hiloko Yehu a ku: “I ra mani eka hina hinkwerhu?” Yena a ku: “I ra wena, Wena murhangeri.”  Kutani a suka a yima a nghena endlwini; hiloko a chela mafurha enhlokweni yakwe, a ku eka yena: “Yehovha Xikwembu xa Israyele u te, ‘Ndza ku tota leswaku u va hosi+ ya vanhu va Yehovha,+ ku nga Israyele.  U fanele u dlaya yindlu ya Akabu hosi ya wena, naswona ndzi fanele ndzi rihisela+ ngati ya malandza ya mina ku nga vaprofeta, ni ngati ya malandza hinkwawo ya Yehovha, evokweni ra Yezabele.+  Yindlu hinkwayo ya Akabu yi fanele yi lova; ndzi fanele ndzi dlaya eka Akabu+ un’wana ni un’wana la humeselaka mati ekhumbini+ ni un’wana ni un’wana la nga sirhelelekangiki ni loyi a nga pfuniki nchumu+ eIsrayele.  Ndzi fanele ndzi veka yindlu ya Akabu yi fana ni yindlu ya Yerobuwamu+ n’wana wa Nebati, ni yindlu ya Baxa+ n’wana wa Ahiya. 10  Kutani Yezabele u ta dyiwa+ hi timbyana ensin’wini ya le Yizriyele, a ku na munhu la nga ta n’wi lahla.’” Hiloko a pfula nyangwa a baleka.+ 11  Loko ku ri Yehu, a huma a ya eka malandza ya hosi yakwe, va sungula ku vula va ku eka yena: “Xana hinkwaswo swi famba kahle?+ Ha yini munhu loyi a hlanyaka+ a tile eka wena?” Kambe a ku eka vona: “N’wina mi n’wi tiva kahle munhu loyi ni mavulavulelo yakwe.” 12  Kambe va ku: “Wa hemba! Hi kombela u hi byela.” Hiloko a ku: “U ndzi byele leswi ni leswiya, a ku, ‘Yehovha u te: “Ndza ku tota leswaku u va hosi ya Israyele.”’”+ 13  Kutani va hatlisa, un’wana ni un’wana a teka nguvu yakwe,+ va ti veka ehansi ka yena eswikhandziyweni leswi nga funengetiwangiki, va sungula ku yimba nanga,+ va ku: “Yehu i hosi!”+ 14  Hiloko Yehu+ n’wana wa Yehoxafati n’wana wa Nimxi+ a sungula ku endlela Yehorama xikhiri.+ Yehorama a a rindza eRhamoti-giliyadi,+ yena ni tiko hinkwaro ra Israyele, hikwalaho ka Hazayele+ hosi ya Siriya. 15  Endzhaku Yehorama+ lowa hosi a tlhela leswaku a ta tshunguriwa eYizriyele,+ eka timbanga leti Vasiriya va n’wi vangeleke tona loko a lwa na Hazayele hosi ya Siriya.+ Kutani Yehu a ku: “Loko moya-xiviri wa wena wu pfumela,+ u nga pfumeleli munhu a huma a baleka emutini a ya endla xiviko eYizriyele.” 16  Hiloko Yehu a gada a ya eYizriyele; hikuva Yehorama a a etlele kona, naswona Ahaziya+ hosi ya Yuda a a rhelerile ku ya vona Yehorama. 17  Murindzi+ a a yime ehenhla ka xihondzo+ eYizriyele,+ kutani a vona ntshungu lowukulu wa vavanuna va Yehu loko a ri karhi a ta, xikan’we-kan’we a ku: “Ndzi vona ntshungu lowukulu wa vavanuna.” Hiloko Yehorama a ku: “Teka mugadi wa hanci u n’wi rhuma leswaku a va hlanganisa, u n’wi byela leswaku a va vutisa a ku, ‘Xana ku ni ku rhula?’”+ 18  Kutani mugadi wa hanci a famba a ya n’wi hlanganisa, a ku: “Hosi yi te, ‘Xana ku ni ku rhula?’” Kambe Yehu a ku: “Xana u na yini ni ‘ku rhula’?+ Hundzela endzhaku ka mina!” Murindzi+ a ya emahlweni a vika, a ku: “Murhumiwa u fikile eka vona, kambe a nga si vuya.” 19  Hiloko a rhuma mugadi wa hanci wa vumbirhi, loyi loko a fika eka vona, a nga vula a ku: “Hosi yi te, ‘Xana ku ni ku rhula?’” Kambe Yehu a ku: “Xana u na yini ni ‘ku rhula’?+ Hundzela endzhaku ka mina!” 20  Murindzi a ya emahlweni a vika, a ku: “U fikile eka vona, kambe a nga si vuya; kutani matsutsumelo ya kona ma fana ni matsutsumelo ya Yehu+ ntukulu wa Nimxi,+ hikuva u tsutsuma ku fana ni munhu la pengaka.”+ 21  Hiloko Yehorama a ku: “Bohelani!”+ Kutani va bohela kalichi yakwe ya nyimpi, Yehorama hosi ya Israyele na Ahaziya+ hosi ya Yuda va huma, un’wana ni un’wana a ri ekalichini yakwe ya nyimpi. Loko va ri karhi va ya emahlweni leswaku va ya hlanganisa Yehu, va n’wi kuma ensin’wini ya Naboti+ lowa le Yizriyele. 22  Hi ku hatlisa loko Yehorama a vona Yehu, xikan’we-kan’we a ku: “Xana ku ni ku rhula Yehu?” Kambe yena a ku: “Ku rhula+ ku nga va kona hi ndlela yihi loko ntsena ka ha ri ni vumbhisa bya Yezabele+ mana wa wena ni vuloyi byakwe byo tala?”+ 23  Xikan’we-kan’we Yehorama a hundzuluka leswaku a baleka, a ku eka Ahaziya: “Ahaziya, ku ni vukanganyisi!”+ 24  Yehu a kunga vurha+ hi matimba, a copa Yehorama exikarhi ka makatla kutani nseve wu huma hi le mbilwini yakwe, ivi a wa ekalichini rakwe ra nyimpi.+ 25  Hiloko a ku eka Bidikara munhu loyi a nga xandla xa mufambisi wa nyimpi yakwe:+ “N’wi tlakule; n’wi lahlele ensin’wini ya Naboti lowa le Yizriyele;+ hikuva tsundzuka: Mina na wena a hi ri ntlawa wun’we wa vakhandziyi lava landzelaka Akabu tata wakwe, kutani Yehovha hi yexe u n’wi avanyise+ a ku: 26  ‘“Kunene tolo ndzi vone ngati+ ya Naboti ni ngati ya vana+ vakwe,” ku vula Yehovha, “kunene ndzi ta ku tlherisela+ kona ensin’wini leyi,” ku vula Yehovha.’ Kutani sweswi n’wi tlakule; n’wi lahlele ensin’wini hi ku landza rito ra Yehovha.”+ 27  Ahaziya+ hosi ya Yuda a swi vona kutani a baleka hi ndlela ya yindlu ya ntanga.+ (Endzhaku Yehu a famba a ya n’wi lava, a ku: “Na yena! N’wi tlhaveni!” [Hiloko va n’wi tlhava] a ri ekalichini, a ri endleleni leyi yaka eGuru, lowu nga tlhelo ra Ibileyamu.+ A hambeta a balekela eMegido+ kutani a fela kona.+ 28  Malandza yakwe ma n’wi rhwala hi kalichi ma n’wi yisa eYerusalema, ma n’wi lahla esirheni rakwe ni vatata wakwe eMutini wa Davhida.+ 29  A ku ri hi lembe ra vu-11 ra Yehorama+ n’wana wa Akabu loko Ahaziya+ a va hosi ya Yuda.) 30  Hi ku famba ka nkarhi Yehu a fika eYizriyele,+ kutani Yezabele+ a swi twa. Hiloko a tipenda+ mahlo hi xikhaviso xa ntima, a lunghisa nhloko yakwe yi saseka,+ a hlometela ehansi hi fasitere.+ 31  Yehu a fika enyangweni. Yena a ku: “Xana swi n’wi fambele kahle Zimri+ mudlayi wa hosi yakwe?” 32  Hiloko a tlakusela xikandza xakwe efasitereni, a ku: “I mani la nga na mina? I mani?”+ Hi ku hatlisa vatirhi vambirhi kumbe vanharhu va le hubyeni+ va languta ehansi eka yena. 33  Kutani a ku: “N’wi cukumeteni ehansi!”+ Hiloko va n’wi cukumeta ehansi, ngati yin’wana yakwe yi phyandlakela ekhumbini ni le tihancini; kutani a n’wi kandziyela.+ 34  Endzhaku ka sweswo, a nghena a dya ni ku nwa kutani a ku: “N’wina, ndzi kombela mi khathalela munhu loyi a rhukaniweke,+ mi n’wi lahla, hikuva i n’wana wa hosi.”+ 35  Loko va ya n’wi lahla, a va kumanga nchumu swa yena, kambe va kume ripala ni milenge ni swandla swa mavoko.+ 36  Loko va tlhelela ku ya n’wi byela, yena a ku: “I rito ra Yehovha leri a ri vuleke+ hi nandza wakwe Eliya lowa le Tixibe, a ku, ‘Timbyana ti ta dya nyama ya Yezabele ensin’wini ya Yizriyele.+ 37  Kunene ntsumbu wa Yezabele wu ta va vulongo+ ehenhla ka xikandza xa nsimu leyi nga ensin’wini ya Yizriyele, leswaku va nga vuli va ku: “Loyi i Yezabele.”’”+

Tinhlamuselo ta le hansi