Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 8:1-29

8  Elixa a byela wansati loyi a nga pfuxa n’wana wakwe,+ a ku: “Suka u yima u famba, wena ni vandyangu wa wena, u ya luvela kun’wana ni kun’wana laha u nga luvelaka kona;+ hikuva Yehovha u vitane ndlala+ leswaku yi va kona, ka-si handle ka sweswo, yi ta va kona etikweni malembe ya nkombo.”+  Hiloko wansati a suka a yima, a endla hi ku landza rito ra munhu wa Xikwembu xa ntiyiso, a famba,+ yena ni vandyangu wakwe,+ a ya luvela etikweni ra Vafilisita+ malembe ya nkombo.  Eku heleni ka malembe ya nkombo wansati a vuya ku suka etikweni ra Vafilisita, a huma a ya rilela yindlu yakwe ni nsimu yakwe eka hosi.+  Hosi yi vulavula na Gehazi+ mutirhi wa munhu wa Xikwembu xa ntiyiso, yi ku: “Ndzi kombela u ndzi rungulela swilo leswikulu hinkwaswo leswi Elixa a swi endleke.”+  Kuteloko a n’wi rungulela ndlela leyi hosi yi n’wi pfuxeke ha yona munhu la feke,+ phela wansati loyi n’wana wakwe a pfuxiweke hi yena loyi a a rilela yindlu yakwe ni nsimu yakwe eka hosi.+ Xikan’we-kan’we Gehazi a ku: “Hosi+ yanga leyi nga mufumi, hi yena wansati loyi, naswona hi yena n’wana loyi Elixa a n’wi pfuxeke.”  Kutani hosi yi vutisa wansati loyi, yena a ya emahlweni a yi rungulela mhaka leyi.+ Hiloko hosi yi n’wi nyika mutirhi wa le hubyeni,+ yi ku: “N’wi tlherisele hinkwaswo leswi swi nga swa yena ni ntshovelo hinkwawo wa le masin’wini, ku sukela esikwini leri a sukeke ha rona etikweni leri ku fikela sweswi.”+  Elixa a fika eDamaska;+ kutani Beni-hadadi+ hosi ya Siriya a a vabya. Hiloko a vikeriwa, va ku: “Munhu wa Xikwembu+ xa ntiyiso u fikile ni laha.”  Kutani hosi yi ku eka Hazayele:+ “Khoma nyiko+ hi voko u famba u ya hlanganisa munhu wa Xikwembu xa ntiyiso, u fanele u vutisa+ Yehovha ha yena, u ku, ‘Xana ndzi ta hanya eka vuvabyi lebyi?’”  Hiloko Hazayele a famba a n’wi hlanganisa, a khoma nyiko hi voko, ni swilo hinkwaswo leswinene swa le Damaska, ndzhwalo wa tikamela ta 40, a fika a yima emahlweni ka yena, a ku: “N’wana+ wa wena Beni-hadadi hosi ya Siriya u ndzi rhume eka wena, a ku, ‘Xana ndzi ta hanya eka vuvabyi lebyi?’” 10  Kutani Elixa a ku eka yena: “Famba u ya n’wi byela, u ku, ‘Hakunene u ta hanya,’ kasi Yehovha u ndzi kombisile+ leswaku luya entiyisweni u ta fa.”+ 11  A n’wi honolela swinene a kala a khomiwa hi tingana. Hiloko munhu wa Xikwembu xa ntiyiso a rila.+ 12  Kutani Hazayele a ku: “Hosi yanga yi rilela yini?” Yena a ku: “Hikuva ndzi swi tiva kahle swilo swo biha+ leswi u nga ta swi endla eka vana va Israyele. Tindhawu ta vona leti tiyisiweke u ta ti nyikela endzilweni, vavanuna va vona lava hlawuriweke u ta va dlaya hi banga, vana va vona u ta va fayetela+ ni vasati va vona lava tikeke u ta va handzula makhwiri.”+ 13  Hiloko Hazayele a ku: “Nandza wa wena la nga mbyana+ yinene i yini leswaku a endla nchumu lowu lowukulu?” Kambe Elixa a ku: “Yehovha u ndzi kombe wena u ri hosi ya Siriya.”+ 14  Endzhaku ka sweswo a famba a suka eka Elixa, a fika eka hosi yakwe, leyi yi vuleke yi ku eka yena: “Xana Elixa u ku byele yini?” Hiloko a ku: “U ndzi byele a ku, ‘Hakunene u ta hanya.’”+ 15  Kutani hi siku leri tlhandlamaka, yi teka nguvu yo funengela yi yi peta ematini, yi yi veka exikandzeni xa yona,+ yi fa.+ Hazayele+ a sungula ku fuma ematshan’weni ya yona. 16  Hi lembe ra vuntlhanu ra Yehorama+ n’wana wa Akabu hosi ya Israyele, loko Yehoxafati a ri hosi ya Yuda, Yehorama+ n’wana wa Yehoxafati hosi ya Yuda a va hosi. 17  A a ri ni malembe ya 32 hi vukhale loko a va hosi, u fume eYerusalema malembe ya nhungu.+ 18  A hambeta a famba endleleni ya tihosi ta Israyele,+ hilaha va yindlu ya Akabu va endleke hakona;+ hikuva n’wana wa Akabu u ve nsati wakwe,+ a hambeta a endla swo biha ematihlweni ya Yehovha. 19  Yehovha a a nga swi lavi ku lovisa Yuda+ hikwalaho ka Davhida nandza wakwe,+ hilaha a n’wi tshembiseke hakona leswaku u ta n’wi nyika rivoni,+ yena ni vana vakwe nkarhi hinkwawo. 20  Emasikwini yakwe Edomu+ a pfukela vulawuri bya Yuda kutani a veka hosi+ leyi nga ta va fuma. 21  Kutani Yehorama a hundzela eZayiri, ni makalichi hinkwawo lawa a a ri na wona. Hiloko yena a pfuka nivusiku a dlaya Vaedomu lava a va n’wi rhendzerile ni tindhuna ni makalichi; vanhu va balekela emintsongeni ya vona. 22  Kambe Edomu a ya emahlweni ni swiendlo swakwe swa ku pfukela vulawuri bya Yuda ku fikela esikwini leri. Hi wona nkarhi lowu Libna+ wu sunguleke ha wona swiendlo swa ku pfukela. 23  Timhaka letin’wana ta Yehorama ni hinkwaswo leswi a swi endleke, xana a swi tsariwanga ebukwini+ ya timhaka ta masiku ya tihosi ta Yuda? 24  Eku heteleleni Yehorama a etlela ni vatata wakwe,+ a lahliwa ni vatata wakwe eMutini wa Davhida.+ Ahaziya+ n’wana wakwe a sungula ku fuma ematshan’weni ya yena. 25  Hi lembe ra vu-12 ra Yehorama n’wana wa Akabu hosi ya Israyele, Ahaziya n’wana wa Yehorama hosi ya Yuda a va hosi.+ 26  Ahaziya a a ri ni malembe ya 22 hi vukhale loko a sungula ku fuma, u fume lembe rin’we eYerusalema.+ Vito ra mana wakwe a ku ri Ataliya+ ntukulu wa Omri+ hosi ya Israyele. 27  U fambe endleleni ya yindlu ya Akabu,+ a hambeta a endla swo biha ematihlweni+ ya Yehovha ku fana ni yindlu ya Akabu, hikuva a a ri xaka ra yindlu ya Akabu hi vukati.+ 28  Hiloko a famba na Yehorama n’wana wa Akabu enyimpini ku ya lwa na Hazayele+ hosi ya Siriya eRhamoti-giliyadi,+ kambe Vasiriya va tlhava+ Yehorama. 29  Kutani Yehorama+ lowa hosi a tlhela leswaku a ya tshunguriwa timbanga eYizriyele,+ leti Vasiriya va n’wi vangeleke tona eRhama loko a lwa na Hazayele hosi ya Siriya. Loko ku ri Ahaziya+ n’wana wa Yehorama hosi ya Yuda, u rhelerile a ya vona Yehorama n’wana wa Akabu eYizriyele, hikuva a a vabya.

Tinhlamuselo ta le hansi