Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 24:1-20

24  Emasikwini yakwe, Nebukadnetsara+ hosi ya Babilona a tlhandluka, kutani Yoyakimi a va nandza+ wakwe malembe manharhu. Hambiswiritano, a tlhela, a n’wi xandzukela.  Hiloko Yehovha a n’wi rhumelela mavuthu ya vaphangi ya Vakalidiya+ ni mavuthu ya vaphangi ya Vasiriya ni mavuthu ya vaphangi ya Vamowabu,+ ni mavuthu ya vaphangi ya vana va Amone ku lwa na yena, a hambeta a ma rhumela ku lwa na Yuda leswaku ma wu lovisa, hi ku landza rito+ ra Yehovha leri a ri vuleke hi malandza yakwe ku nga vaprofeta.  Swi endleke ntsena hi ku landza xileriso xa Yehovha ku avanyisa Yuda, leswaku va wu susa+ emahlweni ka yena hikwalaho ka swidyoho swa Manase,+ hi ku landza hinkwaswo leswi a swi endleke;  ni hikwalaho ka ngati leyi nga riki na nandzu+ leyi a yi halateke, lerova a tata Yerusalema hi ngati leyi nga riki na nandzu, naswona Yehovha a nga pfumelanga ku va rivalela.+  Loko ku ri timhaka letin’wana ta Yoyakimi+ ni hinkwaswo leswi a swi endleke, xana a swi tsariwanga ebukwini+ ya timhaka ta masiku ya tihosi ta Yuda?  Eku heteleleni Yoyakimi a etlela ni vatata wakwe,+ Yoyakini n’wana wakwe a sungula ku fuma ematshan’weni ya yena.  Hosi ya Egipta a ya ha tlhelanga+ yi huma etikweni ra yona,+ hikuva hosi ya Babilona a yi teke hinkwaswo leswi a swi ri swa hosi ya Egipta ku sukela enkoveni wa Egipta+ ku ya fika enambyeni+ wa Yufrata.+  Yoyakini+ a a ri ni malembe ya 18 hi vukhale loko a sungula ku fuma, u fume eYerusalema tin’hweti tinharhu.+ Vito ra mana wakwe a ku ri Nehuxita n’wana wa Elinathani wa le Yerusalema.  A ya emahlweni a endla swo biha ematihlweni ya Yehovha hi ku landza hinkwaswo leswi tata wakwe a swi endleke.+ 10  Enkarhini wolowo, malandza ya Nebukadnetsara hosi ya Babilona ma fika eYerusalema kutani muti wu rhendzeriwa.+ 11  Nebukadnetsara hosi ya Babilona a fika ku ta lwa ni muti lowu, loko malandza yakwe ma wu rhendzerile.+ 12  Hi ku famba ka nkarhi Yoyakini hosi ya Yuda a huma a ya eka hosi ya Babilona,+ yena ni mana+ wakwe ni malandza yakwe ni tihosana takwe ni vatirhi vakwe va le hubyeni; kutani hosi ya Babilona yi n’wi teka hi lembe ra vunhungu+ a ri hosi. 13  Hiloko a humesa kona xuma hinkwaxo xa yindlu ya Yehovha ni xuma xa yindlu ya hosi,+ a tsemelela swingolongondzwana+ hinkwaswo swa nsuku leswi Solomoni hosi ya Israyele a swi endleke etempeleni ya Yehovha, hilaha Yehovha a vuleke hakona. 14  A yisa Yerusalema hinkwawo evukhumbini+ ni tihosana+ hinkwato ni vavanuna hinkwavo va vurhena,+ lava nga ni matimba—va ri 10 000 a va yisa evukhumbini—ni un’wana ni un’wana la tivaka ntirho wa mavoko+ ni vaaki va makhokholo. A ku na munhu la nga siyiwa loko ku nga ri vanhu va xiyimo xa le hansi+ va tiko. 15  Hikwalaho a yisa Yoyakini+ evukhumbini eBabilona;+ kutani mana+ wa hosi ni vasati va hosi ni vatirhi va yona va le hubyeni+ ni vavanuna lava nga varhangeri va tiko, a va rhangisa va ri vanhu lava yisiwaka evukhumbini ku suka eYerusalema ku ya eBabilona. 16  Loko ku ri vavanuna hinkwavo va vurhena, va ri 7 000, ni lava tivaka ntirho wa mavoko ni vaaki va makhokholo va ri 1 000, ni vavanuna hinkwavo va matimba lava hambetaka va lwa, hosi ya Babilona yi va tisa eBabilona va ri vanhu va le vukhumbini.+ 17  Ku tlula kwalaho, hosi ya Babilona+ yi endla Mataniya makwavo wa tata wakwe+ a va hosi ematshan’weni ya yena. Hiloko a hundzula vito rakwe ri va Sedekiyasi.+ 18  Sedekiyasi+ a a ri ni malembe ya 21 hi vukhale loko a sungula ku fuma, u fume eYerusalema malembe ya 11. Vito ra mana wakwe a ku ri Hamutala+ n’wana wa Yeremiya la humaka eLibna. 19  U hambete a endla leswo biha ematihlweni ya Yehovha, hi ku landza hinkwaswo leswi endliweke+ hi Yoyakimi. 20  Hikuva leswi endlekeke eYerusalema ni le Yuda swi vangiwe hi ku hlundzuka+ ka Yehovha, kukondza a va hlongola va suka emahlweni ka yena.+ Kutani Sedekiyasi a sungula ku xandzukela hosi ya Babilona.+

Tinhlamuselo ta le hansi