Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 21:1-26

21  Manase+ a a ri ni malembe ya 12 hi vukhale loko a sungula ku fuma, u fume eYerusalema malembe ya 55. Vito ra mana wakwe a ku ri Hefesiba.+  U endle swo biha ematihlweni ya Yehovha,+ hi ku landza swilo swo nyenyetsa swa matiko+ lawa Yehovha a ma hlongoleke emahlweni ka vana va Israyele.  Kutani a pfuxa tindhawu leti tlakukeke leti tata wakwe Hezekiya a ti loviseke,+ a yimisela Bali tialitari, a endla mhandzi yo kwetsima, hilaha Akabu+ hosi ya Israyele a endleke hakona; a sungula ku nkhinsamela+ vuthu hinkwaro ra le matilweni,+ a ri tirhela.+  U ake tialitari endlwini ya Yehovha,+ leti Yehovha a vuleke malunghana na tona a ku: “Ndzi ta veka vito ra mina eYerusalema.”+  A ya emahlweni a aka tialitari ta vuthu hinkwaro ra le matilweni+ eswivaveni swimbirhi swa yindlu ya Yehovha.+  U hundzise n’wana wakwe endzilweni,+ a endla masalamusi,+ a endla mihlolo, a endla vangoma+ ni vavhumbhi lavakulu va swiendlakalo.+ U endle swilo swo biha hi mpimo lowukulu ematihlweni ya Yehovha leswaku a n’wi hlundzukisa.  Ku tlula kwalaho, a veka xifaniso+ lexi vatliweke xa mhandzi yo kwetsima, lexi a xi endleke endlwini+ leyi Yehovha a nga byela Davhida na Solomoni n’wana wakwe, a ku: “Endlwini leyi ni le Yerusalema, leyi ndzi yi hlawuleke etinyimbeni hinkwato ta Israyele, ndzi ta veka vito ra mina hilaha ku nga riki na makumu.+  A ndzi nge he tlheli ndzi endla leswaku nenge wa Israyele wu tsendzeleka wu suka emisaveni leyi ndzi yi nyikeke vatata wa vona,+ ntsena loko vo xiya ku endla hi ku landza hinkwaswo leswi ndzi va leriseke swona,+ ni hi ku landza nawu hinkwawo lowu nandza wa mina Muxe a va leriseke wona.”  A va yingisanga,+ kambe Manase a hambeta a va kanganyisa leswaku va endla swo biha+ ku tlula matiko+ lawa Yehovha a ma loviseke emahlweni ka vana va Israyele. 10  Yehovha a hambeta a vulavula hi malandza yakwe ku nga vaprofeta,+ a ku: 11  “Hikwalaho ka leswi Manase+ hosi ya Yuda a endleke swilo leswi nyenyetsaka,+ u endle leswi hombolokeke ku tlula leswi Vaamori+ hinkwavo va swi endleke, lava a va ri emahlweni ka yena, u ye emahlweni a dyohisa+ Yuda hi swifaniso swakwe swa hava leswi hombolokeke. 12  Hi yona mhaka leyi Yehovha Xikwembu xa Israyele a nga te, ‘Waswivo, ndzi tisa khombo ehenhla ka Yerusalema+ na Yuda, leri loko mani na mani a ri twa, tindleve takwe ti nga ta hlohlonya.+ 13  Kunene ndzi ta tshambulutela ehenhla ka Yerusalema ngoti ya ku pima+ leyi yi tirhisiweke eSamariya,+ ni xitirho xa ku kongomisa lexi tirhisiweke endlwini ya Akabu;+ ndzi ta sula+ Yerusalema wu basa kukota loko munhu a sula nkambana lowu nga riki na swikhomo wu basa, a wu sula wu basa ivi a wu khubumeta.+ 14  Kunene ndzi ta fularhela masalela+ ya ndzhaka ya mina,+ ndzi ma nyiketa evokweni ra valala va wona, ma ta va swilo leswi phangiwaka, ma tekiwa hi valala va wona hinkwavo,+ 15  hikwalaho ka leswi ma endleke swo biha ematihlweni ya mina, nileswi ma hambeteke ma ndzi hlundzukisa ku sukela esikwini leri vatata wa wona va humeke aEgipta ha rona, ku ta fikela esikwini leri.’”+ 16  Naswona a ku ri ni ngati yo tala ngopfu leyi nga riki na nandzu, leyi Manase a yi halateke,+ ku fikela loko a tate Yerusalema ku suka emakumu man’wana ku ya emakumu man’wana, handle ka swidyoho swakwe leswi a dyohiseke Yuda ha swona hi ku endla swo biha ematihlweni ya Yehovha.+ 17  Loko ku ri timhaka letin’wana ta Manase ni hinkwaswo leswi a swi endleke ni swidyoho swakwe leswi a swi endleke, xana a swi tsariwanga ebukwini+ ya timhaka ta masiku ya tihosi ta Yuda? 18  Eku heteleleni Manase a etlela ni vatata wakwe,+ kutani a lahliwa entangeni wa yindlu yakwe, entangeni wa Uza;+ Amoni n’wana wakwe a sungula ku fuma ematshan’weni ya yena. 19  Amoni+ a a ri ni malembe ya 22 hi vukhale loko a sungula ku fuma, u fume malembe mambirhi+ eYerusalema. Vito ra mana wakwe a ku ri Maxulemete n’wana wa Harusi wa le Yotiba. 20  U hambete a endla swo biha ematihlweni ya Yehovha, hilaha Manase tata wakwe a endleke hakona.+ 21  U hambete a famba endleleni hinkwayo leyi tata wakwe a fambeke eka yona,+ a ya emahlweni a tirhela swifaniso swa hava leswi hombolokeke,+ leswi tata wakwe a swi tirheleke ni ku swi nkhinsamela. 22  Hikwalaho a siya Yehovha+ Xikwembu xa vatata wakwe, a nga fambanga endleleni ya Yehovha.+ 23  Eku heteleleni, malandza ya Amoni ma n’wi khira, ma dlaya+ hosi endlwini ya yona. 24  Kambe vanhu va tiko va dlaya hinkwavo lava va khireke+ Hosi Amoni. Hiloko vanhu va tiko va endla Yosiya+ n’wana wakwe a va hosi ematshan’weni ya yena. 25  Loko ku ri timhaka letin’wana ta Amoni, leswi a swi endleke, xana a swi tsariwanga ebukwini+ ya timhaka ta masiku ya tihosi ta Yuda? 26  Kutani va n’wi lahla esirheni rakwe entangeni wa Uza;+ Yosiya+ n’wana wakwe a sungula ku fuma ematshan’weni ya yena.

Tinhlamuselo ta le hansi