Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 2:1-25

2  Loko Yehovha a ri kusuhi ni ku teka Eliya+ hi xidzedze a tlhandlukela ematilweni,+ Eliya na Elixa+ va suka eGiligala.+  Eliya a ku eka Elixa: “Ndzi kombela u tshama laha, hikuva Yehovha u ndzi rhume eBethele.” Kambe Elixa a ku: “Leswi Yehovha a hanyaka+ nileswi moya-xiviri wa wena wu hanyaka,+ a ndzi nge ku siyi.”+ Kutani va rhelela va ya eBethele.+  Hiloko vana va vaprofeta+ lava a va ri eBethele va huma va ta eka Elixa, va ku: “Xana wa swi tiva hakunene leswaku namuntlha Yehovha u teka n’wini wa wena leswaku a nga ha vi murhangeri wa wena?”+ Yena a ku: “Na mina ndzi swi tiva kahle.+ Miyelani.”  Kutani Eliya a ku eka yena: “Elixa, ndzi kombela u tshama laha, hikuva Yehovha u ndzi rhume eYeriko.”+ Kambe yena a ku: “Leswi Yehovha a hanyaka nileswi moya-xiviri wa wena wu hanyaka, a ndzi nge ku siyi.” Kutani va fika eYeriko.  Hiloko vana va vaprofeta lava a va ri eYeriko va tshinelela Elixa, va ku eka yena: “Xana wa swi tiva hakunene leswaku namuntlha Yehovha u teka n’wini wa wena leswaku a nga ha vi murhangeri wa wena?” Yena a ku: “Na mina ndzi swi tiva kahle. Miyelani.”+  Kutani Eliya a ku eka yena. “Ndzi kombela u tshama laha, hikuva Yehovha u ndzi rhume eYordani.”+ Kambe a ku: “Leswi Yehovha a hanyaka nileswi moya-xiviri wa wena wu hanyaka, a ndzi nge ku siyi.”+ Hiloko va ya emahlweni havambirhi.  A ku ri ni vavanuna va 50 lava va nga vana va vaprofeta, lava va nga famba, naswona va yima laha va nga kotaka ku vona va ri ekule;+ kambe vona havambirhi, a va yime ekusuhi na Yordani.  Hiloko Eliya a teka nguvu yakwe ya ximfumo+ a yi petsa, a ba mati hi yona, hakatsongo-tsongo ma avana ma ya etlhelo leri ni tlhelo leriya, kutani havambirhi va tsemakanya emisaveni leyi omeke.+  Hi ku hatlisa loko va tsemakanyile, Eliya a ku eka Elixa: “Kombela leswi ndzi faneleke ndzi ku endlela swona ndzi nga si susiwa eka wena.”+ Hiloko Elixa a ku: “Ndzi kombela leswaku swiphemu swimbirhi+ swa moya+ wa wena swi ta eka mina.”+ 10  Yena a ku: “U kombele+ nchumu wo nonon’hwa. Loko wo ndzi vona loko ndzi susiwa eka wena, swi ta endleka hi ndlela yoleyo eka wena; kambe loko u nga ndzi voni, a swi nge endleki.” 11  Kuteloko va ha famba swin’we, va famba va ri karhi va vulavula, waswivo, ku humelela kalichi ya nyimpi+ leyi pfurhaka ndzilo, yi ri ni tihanci leti pfurhaka ndzilo, swi va hambanisa havambirhi; kutani Eliya a tlhandlukela ematilweni hi xidzedze.+ 12  Nkarhi wolowo hinkwawo Elixa a a swi vona naswona a a huwelela, a ku: “Tatana, tatana,+ kalichi ya nyimpi ya Israyele ni vagadi vakwe va tihanci!”+ A nga ha tlhelanga a n’wi vona. Hiloko a khoma tinguvu takwe a ti handzula ti va swiphemu swimbirhi.+ 13  Endzhaku ka sweswo a teka nguvu ya ximfumo+ ya Eliya leyi a yi wile eka yena, a tlhela a ya yima eribuweni ra Yordani. 14  Kutani a teka nguvu ya ximfumo ya Eliya leyi yi weke eka yena, a ba mati,+ a ku: “Xana u kwihi Yehovha Xikwembu xa Eliya, ndzi vula Yena?”+ Loko a be mati, ma avana hakatsongo-tsongo ma ya etlhelo leri ni tlhelo leriya, kutani Elixa a tsemakanya. 15  Loko vana va vaprofeta lava a va ri eYeriko va n’wi vona a ha ri ekule, va sungula ku vula va ku: “Moya+ wa Eliya wu tshame ehenhla ka Elixa.” Hiloko va ta ku ta n’wi hlanganisa, va nkhinsama+ eka yena emisaveni. 16  Va ya emahlweni va ku eka yena: “Waswivo, ku ni vanhu va vurhena lava va nga ni malandza ya wena, ku nga vavanuna va 50. Hi kombela u va pfumelela va famba va ya lava n’wini wa wena. Swi nga endleka leswaku moya+ wa Yehovha wu n’wi tlakule wu n’wi lahlela eka yin’wana ya tintshava kumbe eka wun’wana wa minkova.” Kambe a ku: “Mi nga va rhumi.” 17  Va ya emahlweni va n’wi kombela kukondza a khomiwa hi tingana, kutani a ku: “Va rhumeni.” Hiloko va rhuma vavanuna va 50; va hambeta va lava masiku manharhu, kambe a va n’wi kumanga. 18  Loko va vuyela eka yena, a a tshama eYeriko.+ Kutani a ku eka vona: “Xana a ndzi mi byelanga ndzi ku eka n’wina, ‘Mi nga yi’?” 19  Hi ku famba ka nkarhi vavanuna va muti va ku eka Elixa: “Waswivo, sweswi xiyimo xa muti i xinene,+ hilaha n’wini wanga a swi vonaka hakona; kambe mati+ ma bihile, ni tiko ri endla leswaku makhwiri ma onhaka.”+ 20  Hiloko a ku: “Ndzi kumeleni nkambana lowutsongo lowuntshwa, mi chela munyu eka wona.” Kutani va n’wi kumela wona. 21  A huma a ya exihlobyeni xa mati, a chela munyu eka xona,+ a ku: “Yehovha u te, ‘Ndzi endla mati lawa ma va lama hanyisaka.+ A ku nge he tlheli ku va ni rifu, kumbe ma endla leswaku makhwiri ma onhaka.’” 22  Mati ma tshama ma ri manene ku fikela esikwini leri,+ hi ku landza rito ra Elixa leri a ri vuleke. 23  Hiloko a tlhandluka ku suka kwalaho a ya eBethele.+ Loko a ri karhi a tlhandluka endleleni, a ku ri ni vafana+ lavatsongo lava va nga huma emutini, va sungula ku n’wi sandza+ naswona va hambeta va n’wi byela va ku: “Tlhandluka wena mpandlana!+ Tlhandluka wena mpandlana!” 24  Eku heteleleni a hundzuluka a va vona kutani a va rhuketela+ hi vito ra Yehovha. Tibere timbirhi ta matswele+ ti huma exihlahleni ti handzulela vana lava nhlayo ya vona a va ri 42.+ 25  A ya emahlweni a famba ku suka kwalaho a ya eNtshaveni ya Karimeli,+ ku suka kona a tlhelela eSamariya.

Tinhlamuselo ta le hansi