Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 17:1-41

17  Hi lembe ra vu-12 ra Akazi hosi ya Yuda, Hoxeya+ n’wana wa Elaha a va hosi ya Israyele eSamariya+ malembe ya kaye.  A hambeta a endla swo biha ematihlweni ya Yehovha, ntsena a nga endlanga ku fana ni tihosi ta Israyele leti a ti ri kona emahlweni ka yena.+  Xalmanezere+ hosi ya Asiriya+ u tlhandluke a ta lwa na yena, kutani Hoxeya a va nandza wakwe a sungula ku hakela ndzuvo+ eka yena.  Hambiswiritano, hosi ya Asiriya yi vone kungu ro biha+ emhakeni ya Hoxeya, hi ku va a rhumele varhumiwa eka So hosi ya Egipta,+ a nga wu humesanga ndzuvo eka hosi ya Asiriya ku fana ni le malembeni ya le ku sunguleni. Hikwalaho hosi ya Asiriya yi n’wi pfalela, yi n’wi hlayisa a bohiwile endlwini ya vubohiwa.+  Hosi ya Asiriya yi tlhandluka ku lwa ni tiko hinkwaro, ni ku tlhandluka yi ta eSamariya yi wu rhendzela+ ku lwa na wona malembe manharhu.  Hi lembe ra vukaye ra Hoxeya, hosi ya Asiriya yi teka Samariya,+ yi yisa Israyele evukhumbini+ le Asiriya, yi va tshamisa eHala+ ni le Habori enambyeni wa Gozana+ ni le mitini ya Vameda.+  Hikwalaho ka leswi vana va Israyele a va dyohele+ Yehovha Xikwembu xa vona, loyi a va humeseke etikweni ra Egipta, evokweni ra Faro hosi ya Egipta,+ va sungula ku chava swikwembu swin’wana;+  va hambeta va famba hi milawu+ ya matiko lawa Yehovha a ma hlongoleke emahlweni ka vana va Israyele, ni hi milawu ya tihosi ta Israyele, leyi a va yi vekile;  vana va Israyele va hambeta va lavisisa swilo leswi a swi nga lulamanga eka Yehovha Xikwembu xa vona,+ va hambeta va tiakela tindhawu leti tlakukeke+ emitini ya vona hinkwayo, ku suka exihondzweni+ xa murindzi ku ya fika emutini lowu tiyisiweke; 10  va hambeta va tiyimisela tinsika to kwetsima+ ni timhandzi to kwetsima+ exitsungeni xin’wana ni xin’wana lexi tlakukeke,+ ni le hansi ka murhi wun’wana ni wun’wana lowukulu;+ 11  etindhawini teto hinkwato leti tlakukeke va hambete va mbulukisa xitlhavelo ku fana ni matiko+ lawa Yehovha a va yiseke evukhumbini hikwalaho ka wona, va tshamela ku endla swilo swo biha leswaku va hlundzukisa+ Yehovha; 12  Va ya emahlweni va tirhela swifaniso swa hava leswi hombolokeke,+ leswi Yehovha a va byeleke ha swona, a ku: “Mi nga tshuki mi endla nchumu lowu”;+ 13  Yehovha a hambeta a lemukisa+ Israyele+ na Yuda+ hi vaprofeta+ vakwe hinkwavo ni un’wana ni un’wana la vonaka swivono,+ a ku: “Tlhelani etindleleni ta n’wina to biha+ mi hlayisa swileriso+ swa mina ni milawu ya mina,+ hi ku landza nawu+ hinkwawo lowu ndzi wu leriseke vatata wa n’wina,+ ni lowu ndzi mi rhumeleleke wona hi malandza ya mina ku nga vaprofeta”;+ 14  a va yingisanga kambe va hambete va nonon’hwisa tinhamu+ ta vona ku fana ni tinhamu ta vatata wa vona, lava a va nga ri na ripfumelo+ eka Yehovha Xikwembu xa vona; 15  va ye emahlweni va bakanya swileriso swakwe ni ntwanano+ wakwe lowu a wu endleke ni vatata wa vona, ni switsundzuxo+ swakwe leswi a va lemukiseke ha swona, va landzelela swifaniso swa hava leswi nga pfuniki nchumu,+ va va lava nga pfuniki nchumu+ hi voxe, ni ku tekelela matiko lawa a ma va rhendzerile, lawa Yehovha a va leriseke leswaku va nga endli ku fana na wona;+ 16  Va hambeta va siya swileriso+ hinkwaswo swa Yehovha Xikwembu xa vona, va ya emahlweni va tiendlela swifaniso leswi n’okisiweke,+ marhole mambirhi,+ va endla mhandzi yo kwetsima,+ va sungula ku nkhinsamela vuthu hinkwaro ra le matilweni+ ni ku tirhela Bali;+ 17  va hambeta va hundzisa vana va vona va majaha ni va vanhwanyana endzilweni,+ va hlahluva+ naswona va endla mihlolo,+ va hambeta va tixavisa+ eku endleni ka leswo biha ematihlweni ya Yehovha leswaku va n’wi hlundzukisa;+ 18  Hikwalaho Yehovha a n’wi hlundzukela+ ngopfu Israyele, lerova a va susa emahlweni kakwe.+ A nga tshikanga ni un’we a sala handle ka nyimba ya Yuda yi ri yoxe.+ 19  Hambi ku ri Yuda a wu swi hlayisanga swileriso swa Yehovha Xikwembu xa vona,+ kambe va ye emahlweni va famba emilawini ya Israyele+ leyi va yi endleke. 20  Hiloko Yehovha a bakanya mbewu+ hinkwayo ya Israyele, a hambeta a va xanisa ni ku va nyiketa evokweni ra vaphangi, ku fikela loko a va cukumete va suka emahlweni ka yena.+ 21  Hikuva u suse Israyele endlwini ya Davhida, kutani va endla Yerobuwamu n’wana wa Nebati a va hosi; Yerobuwamu+ a endla leswaku tiko ra Israyele ri tshika ku landzela Yehovha, a va dyohisa hi xidyoho lexikulu.+ 22  Kutani vana va Israyele va famba eswidyohweni hinkwaswo swa Yerobuwamu leswi a swi endleke.+ A va sukanga eka swona, 23  ku fikela loko Yehovha a susa Israyele emahlweni yakwe,+ hilaha a vuleke hakona hi malandza yakwe hinkwawo ku nga vaprofeta.+ Hiloko Israyele a suka emisaveni ya yena a ya evukhumbini le Asiriya ku ta fikela esikwini leri.+ 24  Hikwalaho hosi ya Asiriya yi tisa vanhu lava humaka eBabilona+ ni le Kuta ni le Avha+ ni le Hamati+ ni le Sefaravhayimi,+ yi va tshamisisa emitini ya Samariya+ ematshan’weni ya vana va Israyele; va sungula ku tshama eSamariya ni le mitini ya rona. 25  Loko va sungula ku tshama kwalaho, a va n’wi chavanga+ Yehovha. Hikwalaho Yehovha a rhumela tinghala+ exikarhi ka vona, ti va vadlayi exikarhi ka vona. 26  Hiloko va rhumela rito eka hosi ya Asiriya, va ku: “Matiko lawa u ma yiseke evukhumbini ivi u ma tshamisisa emitini ya Samariya, a ma byi tivanga vukhongeri bya Xikwembu xa tiko leri, lerova xi hambeta xi rhumela tinghala exikarhi ka vona;+ kutani waswivo, ta va dlaya tanihi leswi a nga riki kona la tivaka vukhongeri bya Xikwembu xa tiko rero.” 27  Kutani hosi ya Asiriya yi lerisa, yi ku: “Yisani un’wana wa vaprista+ lava mi va suseke kwalaho mi va yisa evukhumbini, leswaku a ya tshama kona a va dyondzisa vukhongeri bya Xikwembu xa tiko rero.” 28  Hiloko un’wana wa vaprista loyi va n’wi yiseke evukhumbini a suka eSamariya, a fika a tshama eBethele,+ a va dyondzisa ndlela leyi va faneleke va chava Yehovha ha yona.+ 29  Kambe tiko rin’wana ni rin’wana ri tiendlela xikwembu xa rona,+ lexi va nga xi veka endlwini ya tindhawu leti tlakukeke leti Vasamariya va tiendleke, tiko rin’wana ni rin’wana, emitini ya vona leyi a va tshama eka yona. 30  Loko ku ri vavanuna va Babilona, va endle Sukoti-benoti,+ vavanuna va Kuta va endle Nerigala, vavanuna va Hamati va endle Axima. 31  Loko ku ri va ka Avha+ va endle Nibazi na Taritaka; va ka Sefaravhayimi+ a va hisa vana va vona endzilweni+ eka Adrameleke na Anameleke swikwembu swa Sefaravhayimi. 32  Va chava Yehovha naswona va ya emahlweni va tiendlela vaprista+ va tindhawu leti tlakukeke eka vanhu lava tolovelekeke, kutani va va tirhela endlwini ya tindhawu leti tlakukeke. 33  Va chave Yehovha,+ kambe a va gandzela swikwembu swa vona,+ hi ku landza vukhongeri bya matiko lawa va yisiweke evukhumbini va huma eka wona.+ 34  Va endla hi ku landza vukhongeri bya vona byo sungula ku ta fikela esikwini leri.+ A va kona lava a va chava Yehovha+ naswona a va kona lava a va endla hi ku landza milawu yakwe ni swiboho swakwe swa vuavanyisi,+ ni nawu+ ni swileriso+ leswi Yehovha a swi leriseke vana va Yakobe,+ loyi vito rakwe a ri endleke Israyele;+ 35  loko Yehovha a endla ntwanano+ na vona naswona a va lerisa, a ku: “Mi nga tshuki mi chava swikwembu swin’wana,+ mi nga tshuki mi swi nkhinsamela kumbe mi swi tirhela kumbe mi swi endlela xitlhavelo.+ 36  Kambe Yehovha loyi a mi humeseke etikweni ra Egipta hi matimba lamakulu ni hi voko leri tshambulutiweke,+ hi Yena loyi mi faneleke mi n’wi chava,+ mi fanele mi n’wi nkhinsamela,+ mi fanele mi n’wi endlela xitlhavelo.+ 37  Kutani swiletelo+ ni swiboho swa vuavanyisi+ ni nawu ni xileriso leswi a mi tsaleleke swona,+ mi fanele mi hisekela ku swi endla nkarhi hinkwawo;+ mi nga tshuki mi chava swikwembu swin’wana. 38  Ntwanano lowu ndzi wu endleke na n’wina, mi nga tshuki mi wu rivala;+ mi nga tshuki mi chava swikwembu swin’wana.+ 39  Kambe mi fanele mi chava Yehovha+ Xikwembu xa n’wina, hikuva hi yena la nga ta mi kutsula evokweni ra valala va n’wina hinkwavo.”+ 40  A va yingisanga, kambe va endle+ hi ku landza vukhongeri bya vona byo sungula. 41  Kutani matiko lawa ma chava Yehovha,+ kambe a ma tirhela swifaniso swa wona leswi vatliweke. Loko ku ri vana va vona ni vatukulu va vona, va endle hilaha vatata wa vona va endleke hakona ku ta fikela esikwini leri.

Tinhlamuselo ta le hansi