Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Tihosi 14:1-29

14  Amaziya+ n’wana wa Yehowaxi+ hosi ya Yuda u ve hosi hi lembe ra vumbirhi ra Yehowaxi n’wana wa Yowohazi hosi ya Israyele.  A a ri ni malembe ya 25 hi vukhale loko a sungula ku fuma, naswona u fume malembe ya 29 eYerusalema. Vito ra mana wakwe a ku ri Yehodini+ wa le Yerusalema.  U hambete a endla leswi lulameke ematihlweni ya Yehovha,+ ntsena a nga endlanga ku fana na Davhida kokwa wakwe.+ U endle hi ku landza hinkwaswo leswi Yehowaxi tata wakwe a swi endleke.+  I tindhawu leti tlakukeke ntsena leti ti nga nyamalalangiki.+ Vanhu a va ha endla switlhavelo naswona a va ha mbulukisa xitlhavelo etindhawini leti tlakukeke.+  Hi ku hatlisa loko mfumo wu tiyisiwile evokweni rakwe, a sungula ku dlaya+ malandza yakwe lama dlayeke hosi, ku nga tata wakwe.+  Kambe vana va lava va dlayeke a nga va dlayanga, hi ku landza leswi swi tsariweke ebukwini ya nawu wa Muxe, lowu Yehovha a wu nyikeke wu ri xileriso, a ku:+ “Vatatana va nga tshuki va dlayiwa hikwalaho ka vana, ni vana va nga tshuki va dlayiwa hikwalaho ka vatatana; kambe un’wana ni un’wana u fanele a dlayiwa hikwalaho ka xidyoho xakwe.”+  Yena u dlaye Vaedomu+ eNkoveni wa Munyu,+ vavanuna va 10 000, kutani a teka Sela enyimpini, vito ra wona ri vitaniwa Yokitele ku ta fikela esikwini leri.  Kutani Amaziya a rhuma varhumiwa eka Yehowaxi n’wana wa Yowohazi n’wana wa Yehu hosi ya Israyele, a ku: “Tana. A hi langutane exikandzeni.”+  Hiloko Yehowaxi hosi ya Israyele a rhumela rito eka Amaziya hosi ya Yuda, a ku: “Mfava wa mitwa lowu a wu ri eLebanoni, wu rhumele rito eka mukedari+ lowu a wu ri eLebanoni, wu ku, ‘Nyiketa n’wana wa wena a va nsati wa n’wana wa mina.’ Kambe xivandzana xa nhova lexi a xi ri eLebanoni xi hundza kutani xi kandziyela mfava wa mitwa.+ 10  Kunene u dlaye+ Edomu, kutani mbilu ya wena yi ku tlakusile.+ Tsakela ku xiximiwa+ ka wena u tshama endlwini ya wena. Ha yini u fanele u nghenela madzolonga+ u ri eka xiyimo lexi nga tsakisiki,+ u boheka ku wa, wena na Yuda wu ri na wena?” 11  Kambe Amaziya a nga yingisanga.+ Hiloko Yehowaxi hosi ya Israyele a tlhandluka, va langutana exikandzeni,+ yena na Amaziya hosi ya Yuda, eBeta-xemexe+ lowu nga wa Yuda. 12  Kutani Yuda hinkwaro ri hluriwa emahlweni ka Israyele,+ lerova un’wana ni un’wana a balekela entsongeni wakwe. 13  A ku ri Amaziya hosi ya Yuda, n’wana wa Yehowaxi, n’wana wa Ahaziya loyi Yehowaxi hosi ya Israyele a n’wi khomeke eBeta-xemexe, endzhaku ka sweswo a endla vangwa erirhangwini ra Yerusalema eNyangweni ya Efrayimi,+ ku ya fika eNyangweni+ ya le Yinhleni, swisungunu swa 400. 14  Kutani a teka nsuku hinkwawo ni silivhere ni swilo hinkwaswo leswi a swi kumeka endlwini ya Yehovha+ ni le ndlwini ni le ka vatameri va xuma va yindlu ya hosi ni vabohiwa, hiloko a vuyela eSamariya. 15  Loko ku ri timhaka letin’wana ta Yehowaxi, leswi a swi endleke ni matimba yakwe ni ndlela leyi a lweke na Amaziya hosi ya Yuda ha yona, xana a swi tsariwanga ebukwini+ ya timhaka ta masiku ya tihosi ta Israyele? 16  Eku heteleleni Yehowaxi a etlela ni vatata wakwe,+ kutani a lahliwa eSamariya+ ni tihosi ta Israyele, Yerobuwamu+ n’wana wakwe a sungula ku fuma ematshan’weni ya yena. 17  Amaziya+ n’wana wa Yehowaxi hosi ya Yuda a hambeta a hanya malembe ya 15+ endzhaku ka rifu ra Yehowaxi+ n’wana wa Yowohazi hosi ya Israyele. 18  Loko ku ri timhaka letin’wana ta Amaziya, xana a ti tsariwanga ebukwini+ ya timhaka ta masiku ya tihosi ta Yuda?+ 19  Hi ku famba ka nkarhi va hlanganile va n’wi endlela xikhiri+ eYerusalema, kutani a balekela eLakixi;+ kambe va rhumela vanhu va ya n’wi lava eLakixi, va n’wi dlayela kwalaho.+ 20  Va n’wi rhwala hi tihanci va ya n’wi lahla+ eYerusalema ni vatata wakwe eMutini wa Davhida.+ 21  Kutani vanhu hinkwavo va Yuda va teka Azariya,+ yena a ri ni malembe ya 16 hi vukhale,+ va n’wi endla hosi ematshan’weni ya Amaziya+ tata wakwe. 22  Yena a aka Elata+ a wu vuyisela eYuda endzhaku ka loko hosi yi etlele ni vatata wa yona. 23  Hi lembe ra vu-15 ra Amaziya n’wana wa Yehowaxi hosi ya Yuda, Yerobuwamu+ n’wana wa Yehowaxi hosi ya Israyele a va hosi eSamariya malembe ya 41. 24  A hambeta a endla swo biha ematihlweni ya Yehovha. A nga sukanga eswidyohweni hinkwaswo swa Yerobuwamu n’wana wa Nebati, leswi a dyohiseke Israyele ha swona.+ 25  Hi yena la vuyiseleke ndzilakana wa Israyele ku suka laha ku ngheniwaka ha kona eHamati+ ku ya elwandle ra Arabha,+ hi ku landza rito ra Yehovha Xikwembu xa Israyele loyi a vulavuleke hi nandza wakwe Yonasi+ n’wana wa Amitayi, muprofeta loyi a a huma eGati-hefere.+ 26  Hikuva Yehovha a a vone ku xaniseka loku vavisaka ngopfu ka Israyele.+ A ku nga ri na munhu loyi a a nga sirhelelekanga kumbe la nga pfuniki nchumu, hambi ku ri la pfunaka Israyele.+ 27  Yehovha a a tshembise leswaku a nge ri herisi vito ra Israyele ehansi ka matilo.+ Hiloko a va ponisa+ hi voko ra Yerobuwamu n’wana wa Yehowaxi. 28  Loko ku ri timhaka letin’wana ta Yerobuwamu ni hinkwaswo leswi a swi endleke ni matimba yakwe, ndlela leyi a lweke ha yona ni ndlela leyi a vuyiseleke Damaska+ ha yona na Hamati+ eka Yuda, eIsrayele, xana a swi tsariwanga ebukwini ya timhaka ta masiku ya tihosi ta Israyele? 29  Eku heteleleni Yerobuwamu a etlela ni vatata wakwe, ni tihosi ta Israyele, Zakariya+ n’wana wakwe a sungula ku fuma ematshan’weni ya yena.

Tinhlamuselo ta le hansi