Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 7:1-29

7  Kuteloko hosi yi tshama endlwini+ ya yona naswona Yehovha a yi wisisile eka valala va yona lava va yi rhendzeleke hinkwako,+  hosi yi byela Natani+ lowa muprofeta yi ku: “Waswivo, sweswi ndzi tshama endlwini ya mikedari+ kasi areka ya Xikwembu xa ntiyiso yi tshama exikarhi ka ntsonga wa malapi.”+  Hiloko Natani a ku eka hosi: “Hinkwaswo leswi swi nga embilwini ya wena—famba u ya swi endla,+ hikuva Yehovha u na wena.”  Evusikwini byebyo, rito+ ra Yehovha ri fika eka Natani, ri ku:  “Famba u ya byela nandza wa mina Davhida, u ku, ‘Yehovha u te: “Xana wena u fanele u ndzi akela yindlu leswaku ndzi tshama eka yona?+  Phela a ndzi si tshama endlwini ku sukela esikwini leri ndzi humeseke vana va Israyele aEgipta ha rona ku ta fikela esikwini leri,+ kambe a ndzi hambeta ndzi famba-famba+ ndzi ri entsongeni+ ni le tabernakeleni.+  Enkarhini hinkwawo lowu ndzi famba-fambeke exikarhi ka vana va Israyele+ ha wona, xana ku tshame ku va ni rito leri ndzi ri vulavuleke ni yin’wana ya tinyimba ta Israyele,+ leri ndzi ri leriseke leswaku ndzi risa vanhu va mina, ku nga Israyele, ndzi ku, ‘Ha yini n’wina mi nga ndzi akelanga yindlu ya mikedari?’”’  Kutani u ta byela nandza wa mina Davhida, u ku, ‘Yehovha wa mavuthu u te: “Mina ndzi ku teke emadyelweni, laha a wu risa ntlhambi,+ leswaku u va murhangeri+ wa vanhu va mina, ku nga Israyele.  Ndzi ta va na wena kun’wana ni kun’wana laha u yaka kona,+ ndzi ta susa valala va wena hinkwavo emahlweni ka wena;+ kunene ndzi ta ku endlela vito lerikulu,+ ku fana ni vito ra vanhu lavakulu lava nga emisaveni. 10  Kunene ndzi ta hlawula ndhawu+ ya vanhu va mina, ku nga Israyele, ndzi va simeka,+ hakunene va ta tshama laha va nga kona, a va nge he tlheli va karhatiwa; vana vo pfumala ku lulama a va nge he tlheli va va xanisa hilaha va endleke hakona eku sunguleni,+ 11  hambi ku ri ku sukela esikwini leri ndzi vekeke vaavanyisi+ leswaku va lerisa vanhu va mina, ku nga Israyele; ndzi ta ku wisisa eka valala+ va wena hinkwavo. “‘“Yehovha u ku byerile leswaku Yehovha u ta ku endlela yindlu.+ 12  Loko masiku ya wena ma herile,+ u fanele u etlela ni vatata va wena,+ kunene ndzi ta yimisa mbewu ya wena endzhaku ka wena, leyi nga ta huma eka swirho swa wena swa le ndzeni; hakunene ndzi ta wu simeka wu tiya mfumo wa yona.+ 13  Hi yona leyi yi nga ta akela vito ra mina yindlu,+ kunene ndzi ta simeka xiluvelo xa mfumo wa yona xi tiya hilaha ku nga riki na makumu.+ 14  Mina ndzi ta va tata wa yona,+ naswona yona yi ta va n’wana wa mina.+ Loko yi endla xihoxo ndzi ta yi tshinya hi nhonga+ ya vavanuna ni hi minkhavi ya vana va Adamu. 15  Loko ku ri musa wa mina wa rirhandzu, a wu nge suki eka yona hi ndlela leyi ndzi wu suseke ha yona eka Sawulo+ loyi ndzi n’wi suseke hikwalaho ka wena. 16  Yindlu ya wena ni mfumo wa wena swi ta tserhama hilaha ku nga riki na makumu emahlweni ka wena; xiluvelo xa wena xi ta simekiwa xi tiya hilaha ku nga riki na makumu.”’”+ 17  Natani u vulavule eka Davhida+ hi ku landza marito lawa hinkwawo ni hi ku landza xivono lexi hinkwaxo. 18  Hiloko Hosi Davhida a fika a tshama ehansi emahlweni ka Yehovha, a ku: “Xana hi mina mani,+ Wena Yehovha, Hosi leyi Lawulaka? Naswona yindlu ya mina yo va yini leswi u ndzi tiseke ku ta fika laha? 19  Onge hiloko leswi swi fanele swi va nchumu wutsongo ematihlweni ya wena, Wena Yehovha, Hosi leyi Lawulaka, kambe u tlhele u vulavula malunghana ni yindlu ya nandza wa wena ku ya fika enkarhini lowu wa ha riki kule, lowu taka; kutani lowu i nawu lowu nyikiweke vanhu,+ Wena Yehovha, Hosi leyi Lawulaka.+ 20  Xana Davhida a nga engetela yini a vulavula na wena, kasi wena u n’wi tiva kahle nandza wa wena,+ Wena Yehovha, Hosi leyi Lawulaka? 21  Hikwalaho ka rito ra wena+ ni ku pfumelelana ni mbilu ya wena,+ u endle swilo leswi leswikulu hinkwaswo leswaku nandza wa wena a swi tiva.+ 22  Hi yona mhaka leyi hakunene u nga lonkulu,+ Wena Yehovha, Hosi leyi Lawulaka; hikuva ku hava un’wana la fanaka na wena,+ naswona a ku na Xikwembu handle ka wena+ exikarhi ka hinkwavo lava hi va tweke hi tindleve ta hina. 23  Xana hi rihi tiko rin’we emisaveni leri fanaka ni vanhu va wena, ku nga Israyele,+ lava Xikwembu xi fambeke xi ya tikutsulela vona va va tiko,+ xi tlhela xi va nyika vito+ ni ku va endlela swilo leswikulu ni leswi chavisekaka+—leswaku u hlongola matiko ni swikwembu swa wona hikwalaho ka vanhu va wena lava u tikutsuleleke+ vona aEgipta? 24  U ye emahlweni u simeka vanhu va wena, ku nga Israyele,+ va tiya, hilaha ku nga riki na makumu; kutani wena, Wena Yehovha u ve Xikwembu xa vona.+ 25  “Sweswi, Yehovha Xikwembu, rito leri u ri vulavuleke malunghana ni nandza wa wena ni yindlu yakwe, ri hetisise hilaha ku nga riki na makumu, u endla hilaha u vuleke hakona.+ 26  Vito ra wena a ri ve lerikulu hilaha ku nga riki na makumu,+ va ku, ‘Yehovha wa mavuthu i Xikwembu xa Israyele,’+ kutani yindlu ya nandza wa wena Davhida yi simekiwa yi tiya emahlweni ka wena.+ 27  Hikuva wena, Yehovha wa mavuthu Xikwembu xa Israyele, u hlavutele etindleveni ta malandza ya wena, u ku, ‘Ndzi ta ku akela yindlu.’+ Hi yona mhaka leyi nandza wa wena a veke ni xivindzi xa ku khongela eka wena xikhongelo lexi.+ 28  Sweswi, Wena Yehovha, Hosi leyi Lawulaka u Xikwembu xa ntiyiso; loko ku ri marito ya wena a ma ve ntiyiso+ hikuva u tshembise nandza wa wena vunene+ lebyi. 29  Kutani swi veke eka wena, u katekisa+ yindlu ya nandza wa wena leswaku yi tshama hilaha ku nga riki na makumu emahlweni ka wena;+ hikuva wena, Wena Yehovha, Hosi leyi Lawulaka u tshembisile, yindlu ya nandza wa wena a yi katekisiwe hilaha ku nga riki na makumu hikwalaho ka nkateko wa wena.”+

Tinhlamuselo ta le hansi