Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 6:1-23

6  Davhida a tlhela a hlengeleta vavanuna hinkwavo lava hlawuriweke eIsrayele,+ va 30 000.  Kutani Davhida ni vavanuna hinkwavo lava a va ri na yena va suka va yima va ya eBale-yuda+ leswaku va vuyisa areka+ ya Xikwembu xa ntiyiso yi suka kwalaho, laha vito ri vitaniwaka kona, vito+ ra Yehovha wa mavuthu+ loyi a tshameke ehenhla ka makerubu.+  Hambiswiritano, areka ya Xikwembu xa ntiyiso a va yi khandziyise egolonyini leyintshwa,+ leswaku va yi rhwala yi suka endlwini ya Abinadaba,+ leyi a yi ri exitsungeni; Uzza na Ahiyo+ vana va Abinadaba a va ri emahlweni ka golonyi leyintshwa.  Kutani va yi rhwala ku suka endlwini ya Abinadaba, leyi a yi ri exitsungeni—yi ri ni areka ya Xikwembu xa ntiyiso; Ahiyo a a famba emahlweni ka Areka.  Davhida ni yindlu hinkwayo ya Israyele a va tlangela emahlweni ka Yehovha hi mixaka hinkwayo ya swichayachayana swa ntsandza wa yunipa ni hi tiharipa+ ni hi switende+ ni hi swingomana+ ni hi swingelengele ni hi swiphambati.+  Hakatsongo-tsongo va fika exivuyeni xa Nakona, kutani Uzza+ a tshambulutela voko eka areka ya Xikwembu xa ntiyiso, a yi khoma,+ hikuva a ku sele katsongo tihomu ti yi wisa.  Hiloko ku hlundzuka ka Yehovha+ ku pfurhela Uzza, Xikwembu xa ntiyiso xi n’wi dlayela+ kwalaho, hikwalaho ka xiendlo lexi pfumalaka xichavo, kutani a fela kwalaho ekusuhi ni areka ya Xikwembu xa ntiyiso.+  Davhida a hlundzuka hikwalaho ka leswi Yehovha a a be Uzza hi ku avanyisa loku, kutani ndhawu yoleyo yi thyiwa Perezi-uza ku ta fikela esikwini leri.+  Davhida a chava Yehovha+ esikwini rero, a sungula ku vula a ku: “Xana areka ya Yehovha yi ta tisa ku yini eka mina?”+ 10  Davhida a a nga swi rhandzi ku susa areka ya Yehovha yi ta eka yena eMutini wa Davhida.+ Hiloko Davhida a yi hambukisela endlwini ya Obede-edomu+ lowa ka Gati.+ 11  Areka ya Yehovha yi tshame endlwini ya Obede-edomu lowa ka Gati tin’hweti tinharhu; Yehovha a ya emahlweni a katekisa+ Obede-edomu ni vandyangu wa yena hinkwavo.+ 12  Eku heteleleni Hosi Davhida a vikeriwa, va ku: “Yehovha u katekise yindlu ya Obede-edomu ni hinkwaswo leswi swi nga swa yena hikwalaho ka areka ya Xikwembu xa ntiyiso.” Hiloko Davhida a famba a ya humesa areka ya Xikwembu xa ntiyiso hi ku tsaka endlwini ya Obede-edomu yi ya eMutini wa Davhida.+ 13  Kuteloko lava va rhwaleke+ areka ya Yehovha va fambe magoza ya tsevu, hi ku hatlisa a endla xitlhavelo hi nkunzi ni xifuwo lexi nonisiweke.+ 14  Davhida a a chanchula emahlweni ka Yehovha hi matimba ya yena hinkwawo, nkarhi wolowo hinkwawo Davhida a a khame efodi+ ya ntsembyana. 15  Davhida ni yindlu hinkwayo ya Israyele a va tisa areka+ ya Yehovha hi ku huwelela ka ku tsaka+ ni mpfumawulo wa nanga.+ 16  Loko areka ya Yehovha yi fika eMutini wa Davhida, Mikala+ n’wana wa Sawulo wa nhwanyana, a hlometela ehansi a ri efasitereni kutani a vona Hosi Davhida a tlula ni ku chanchula emahlweni ka Yehovha; hiloko a sungula ku n’wi langutela ehansi+ embilwini yakwe.+ 17  Hikwalaho va nghenisa areka ya Yehovha, va yi veka endhawini ya yona endzeni ka ntsonga lowu Davhida a a wu dzimele yona;+ endzhaku ka sweswo Davhida a nyikela switlhavelo swo hisiwa+ ni switlhavelo swa xinakulobye+ emahlweni ka Yehovha. 18  Loko Davhida a hetile ku nyikela switlhavelo swo hisiwa ni switlhavelo swa xinakulobye, a katekisa+ vanhu hi vito ra Yehovha+ wa mavuthu. 19  Ku tlula kwalaho, u avele+ vanhu hinkwavo, ntshungu hinkwawo wa Israyele, wanuna ni wansati, un’wana ni un’wana ximbundzwa xa xirhendzevutana xa xinkwa+ ni ximbundzwa xa mihandzu ya micindzu ni ximbundzwa xa mukhusu wa madiriva, endzhaku ka sweswo vanhu hinkwavo va famba, un’wana ni un’wana a ya endlwini yakwe. 20  Kutani Davhida a vuya ku ta katekisa vandyangu wakwe,+ hiloko Mikala+ n’wana wa Sawulo wa nhwanyana a huma ku ta hlanganisa Davhida, kutani a ku: “Hosi ya Israyele yi tivangamisile namuntlha+ loko yi tifunungula namuntlha ematihlweni ya mahlonga ya xisati ya malandza ya yona, hilaha un’wana wa vavanuna lava kalaka dzano a tifunungulaka hakona erivaleni!”+ 21  Hiloko Davhida a ku eka Mikala: “A ku ri emahlweni ka Yehovha loyi a ndzi hlawuleke ematshan’weni ya tata wa wena ni vandyangu wa yena hinkwavo, leswaku a ndzi veka hi ku lerisa+ ndzi va murhangeri wa vanhu va Yehovha, ku nga Israyele, ndzi ta tlangela emahlweni ka Yehovha.+ 22  Ndzi ta tiendla la pfumalaka xindzhuti ku tlula leswi,+ naswona ndzi ta va wa xiyimo xa le hansi ematihlweni ya mina; ndzi tiyimisele ku tivangamisa+ hi mahlonga ya xisati lawa u ma vuleke.” 23  Hikwalaho, loko ku ri Mikala+ n’wana wa Sawulo wa nhwanyana, a nga vanga na n’wana ku ta fikela esikwini ra ku fa ka yena.

Tinhlamuselo ta le hansi