Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 3:1-39

3  Nyimpi exikarhi ka yindlu ya Sawulo ni yindlu ya Davhida yi teke nkarhi wo leha;+ Davhida a hambeta a va ni matimba,+ kasi yindlu ya Sawulo yi ya yi hela matimba.+  Hi nkarhi wolowo, Davhida u velekeriwe vana+ eHebroni,+ mativula yakwe a ku ri Amone,+ a velekiwa hi Ahinowama+ lowa le Yizriyele.  Wa vumbirhi a ku ri Khiliyabu,+ a velekiwa hi Abigayele+ nsati wa Nabali lowa le Karimeli, wa vunharhu a ku ri Absalomu+ n’wana wa Maka, n’wana wa Talimayi+ lowa hosi ya Gexura.  Wa vumune a ku ri Adoniya+ n’wana wa Hagiti,+ wa vuntlhanu a ku ri Xefatiya+ n’wana wa Abitali.  Wa vutsevu a ku ri Itereyamu,+ a velekiwa hi Egla nsati wa Davhida. Lava hi vona lava nga velekeriwa Davhida eHebroni.  Loko nyimpi exikarhi ka yindlu ya Sawulo ni yindlu ya Davhida ya ha ya emahlweni, Abinere+ a a hambeta a tiyisa xikhundlha xakwe endlwini ya Sawulo.  Sawulo a a ri ni nsati lontsongo loyi vito ra yena a ku ri Risipa,+ n’wana wa Aya.+ Endzhaku Ixi-boxeti+ a ku eka Abinere: “Ha yini u tivane ni nsati lontsongo+ wa tatana?”  Abinere a hlundzuka+ ngopfu hikwalaho ka marito ya Ixi-boxeti, a ya emahlweni a ku: “Xana ndzi nhloko ya mbyana+ ya Yuda? Namuntlha ndzi hambeta ndzi komba musa wa rirhandzu endlwini ya Sawulo tata wa wena, eka vamakwavo ni le ka vanakulobye lavakulu, a ndzi swi pfumelelanga leswaku u tikuma u ri evokweni ra Davhida; kambe u ndzi tengisa hi xihoxo malunghana ni wansati namuntlha.  Hikwalaho onge Xikwembu xi nga endla hi ndlela leyi eka Abinere kutani xi engetela eka swona,+ loko ku nga ri yona ndlela leyi ndzi nga ta endla ha yona eka yena, hilaha Yehovha a hlambanyeleke Davhida hakona,+ 10  leswaku ndzi susa mfumo endlwini ya Sawulo ndzi simeka xiluvelo xa Davhida ehenhla ka Israyele ni le henhla ka Yuda ku suka eDani ku ya eBera-xeba.”+ 11  A nga ha swi kotanga ku vula rito ni rin’we a angula Abinere, hikwalaho ka ku n’wi chava.+ 12  Hikwalaho Abinere a rhuma varhumiwa eka Davhida hi nkarhi wolowo, a ku: “Xana tiko i ra mani?” a engeta a ku: “Endla ntwanano wa wena na mina, kutani waswivo, voko ra mina ri ta va na wena leswaku ri hundzuluxela Israyele hinkwaro eka wena.”+ 13  Hiloko yena a ku: “I swinene! Mina ndzi ta endla ntwanano na wena. Ntsena ndzi kombela xilo xin’we eka wena, ndzi ri, ‘U nge xi voni xikandza xa mina+ handle ka loko wo rhanga u tisa Mikala+ n’wana wa Sawulo wa nhwanyana, loko u ta ku ta vona xikandza xanga.’” 14  Ku tlula kwalaho, Davhida a rhuma varhumiwa eka Ixi-boxeti+ n’wana wa Sawulo, a ku: “Ndzi nyikete nsati wa mina Mikala, loyi ndzi n’wi vuteke hi minsuvu ya 100+ ya Vafilisita.” 15  Hiloko Ixi-boxeti a rhumela rito a ya n’wi teka eka nuna wakwe Palatiyele,+ n’wana wa Layixi. 16  Kambe nuna wakwe a hambeta a famba na yena, a rila loko a ri karhi a famba na yena a n’wi sale endzhaku ku ya fika eBahurimi.+ Kutani Abinere a ku eka yena: “Famba, tlhela!” Hiloko a tlhela. 17  Hi nkarhi wolowo Abinere u vulavurisane ni vakulukumba va Israyele, a ku: “Tolo ni nkarhi lowu hundzeke,+ a mi lava leswaku Davhida a va hosi ya n’wina. 18  Kutani sweswi endlani tano, hikuva Yehovha hi byakwe u byele Davhida a ku, ‘Ndzi ta ponisa vanhu va mina, ku nga Israyele evokweni ra Vafilisita ni le vokweni ra valala va vona hinkwavo, hi voko ra Davhida+ nandza wa mina.’” 19  Hiloko Abinere na yena a vulavula Benjamini a yingisile,+ endzhaku ka sweswo Abinere na yena a vulavula hinkwaswo leswi a swi ri swinene ematihlweni ya Israyele ni le matihlweni ya yindlu hinkwayo ya Benjamini, Davhida a yingisile eHebroni. 20  Loko Abinere a fike eka Davhida eHebroni, a a ri ni vavanuna va 20, Davhida a endlela Abinere nkhuvo+ ni vavanuna lava a va ri na yena. 21  Kutani Abinere a ku eka Davhida: “Inge ndzi pfuka, ndzi famba ndzi ya hlengeletela tiko hinkwaro ra Israyele eka hosi yanga leyi nga mufumi, leswaku va endla ntwanano na wena, kunene u ta va hosi ya hinkwaswo leswi moya-xiviri wa wena wu swi navelaka.”+ Hiloko Davhida a tshika Abinere a famba, a khoma ndlela hi ku rhula.+ 22  Sweswi malandza ya Davhida na Yowabu a ma huma eku hlaseleni hi xitshuketa, leswi ma vuyeke na swona ma swi phangile+ a swi tele. Loko ku ri Abinere a a nga ri na yena Davhida eHebroni, hikuva a a n’wi tshike a famba, a khoma ndlela a famba hi ku rhula. 23  Kutani Yowabu+ ni vuthu hinkwaro leri a ri ri na yena va nghena, hiloko va vikela Yowabu, va ku: “Abinere+ n’wana wa Nere+ u tile eka hosi, yona yi n’wi tshike a famba, a khoma ndlela a famba hi ku rhula.” 24  Kutani Yowabu a ya eka hosi, a ku: “Xana wena u endle yini?+ Waswivo! Abinere u te eka wena. Ha yini u n’wi ntshunxile leswaku a famba kahle? 25  U n’wi tiva kahle Abinere n’wana wa Nere, leswaku a a tele ku ta ku yenga ni ku tiva ku huma ka wena ni ku nghena ka wena,+ ni ku tiva hinkwaswo leswi u swi endlaka.”+ 26  Hiloko Yowabu a huma eka Davhida kutani a rhuma varhumiwa va landza Abinere, va n’wi tlherisa+ exihlobyeni xa Sira; Davhida a nga swi tivanga. 27  Loko Abinere a vuyile eHebroni,+ Yowabu a n’wi kongomisa etlhelo, endzeni ka nyangwa leswaku a ta vulavula na yena exihundleni.+  Kambe, kwalaho a n’wi tlhava ekhwirini+ kutani a fa hikwalaho ka ngati ya Asahele+ makwavo. 28  Endzhaku ka sweswo loko Davhida a swi twa, xikan’we-kan’we a ku: “Mina ni mfumo wa mina, hi ku ya hi langutelo ra Yehovha a hi na nandzu wa ngati+ hilaha ku nga riki na makumu, hikwalaho ka Abinere n’wana wa Nere. 29  Onge wu nga ndzulukela enhlokweni+ ya Yowabu ni le ndlwini hinkwayo ya tata wakwe, endlwini ya Yowabu+ ku nga tshuki ku pfumala munhu la nga ni ndzhundzhwana+ kumbe la nga ni nhlokonho+ kumbe munhu la khomaka nhonga ya ku swula+ kumbe munhu la wisiwaka hi banga kumbe munhu la pfumalaka xinkwa!”+ 30  Loko ku ri Yowabu na Abixayi+ makwavo, va dlaye Abinere+ hikwalaho ka leswi a dlayeke Asahele makwavo eGibiyoni, enyimpini.+ 31  Kutani Davhida a byela Yowabu ni vanhu hinkwavo lava a va ri na yena a ku: “Handzulani tinguvu ta n’wina hi le xikarhi+ mi tsimba tinguvu to khwaxa,+ mi kalakala emahlweni ka Abinere.” Hambi ku ri Hosi Davhida a a famba endzhaku ka rihlaka rero. 32  Va lahla Abinere eHebroni; hosi yi sungula ku tlakusa rito ra yona yi rila exilahlweni xa Abinere, vanhu hinkwavo va rila.+ 33  Hosi yi ya emahlweni yi yimbelelela Abinere risimu ra xirilo, yi ku: “Xana Abinere u fanele a fa rifu ra munhu la hungukeke?+ 34  Mavoko ya wena a ma nga bohiwanga,+ Ni milenge ya wena a yi nga nghenisiwanga etinketanini ta koporo.+ U we ku fana ni munhu la waka emahlweni ka vana lava nga lulamangiki.”+ Hiloko vanhu hinkwavo va tlhela va n’wi rilela.+ 35  Endzhaku vanhu hinkwavo va fika va ta nyika Davhida xinkwa+ leswaku va n’wi chavelela ka ha ri siku rero, kambe Davhida a hlambanya, a ku: “Onge Xikwembu xi nga endla eka mina,+ onge xi nga engetela eka swona, loko ndzo nantswa xinkwa kumbe nchumu wihi ni wihi dyambu ri nga si pela!”+ 36  Vanhu hinkwavo va swi xiya, kutani a swi ri swinene ematihlweni ya vona. Hilaha ku fanaka ni swilo hinkwaswo leswi hosi yi swi endleke, a swi ri swinene ematihlweni ya vanhu hinkwavo.+ 37  Vanhu hinkwavo ni tiko hinkwaro ra Israyele va swi tiva esikwini rero leswaku a swi nga humi eka hosi leswaku Abinere n’wana wa Nere a dlayiwa.+ 38  Hosi yi ya emahlweni yi byela malandza ya yona yi ku: “Xana a mi swi tivi leswaku i hosana ni munhu lonkulu loyi a weke esikwini leri eIsrayele?+ 39  Namuntlha mina ndzi tsanile hambiloko ndzi totiwe+ ku va hosi, kutani vavanuna lava, vana va Seruya+ va ni matimba swinene eka mina.+ Onge Yehovha a nga tlherisela muendli wa swo biha hi ku landza vubihi byakwe.”+

Tinhlamuselo ta le hansi