Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 15:1-37

15  Endzhaku ka swilo sweswo Absalomu a tiendlela kalichi, ku ri ni tihanci ni vavanuna va 50 lava tsutsumaka emahlweni ka yena.+  Absalomu a pfuka ka ha ri mpundzu swinene+ a yima etlhelo ka gondzo ku ya enyangweni.+ Loko munhu a ri ni nandzu lowu a wu tisiwa eka hosi leswaku wu ta avanyisiwa,+ Absalomu a a n’wi vitana, a ku: “Xana u huma emutini wihi?” yena a a ku: “Nandza wa wena u huma eka yin’wana ya tinyimba ta Israyele.”  Absalomu a ku eka yena: “Waswivo, timhaka ta wena i tinene naswona ti lulamile; kambe a ku na munhu la humaka eka hosi loyi a ku yingisaka.”+  Absalomu a a ya emahlweni a ku: “Mawaku loko a ndzi vekiwe ku va muavanyisi etikweni+ leswaku munhu un’wana ni un’wana a ta eka mina loko a ri ni nandzu kumbe a lava ku avanyisiwa! Kunene a ndzi ta n’wi komba vululami.”+  Naswona loko munhu a tshinela eka yena a n’wi nkhinsamela, a a tshambuluta voko a n’wi khoma+ a n’wi ntswontswa.  Absalomu a hambeta a endla nchumu wo tano eka Vaisrayele hinkwavo lava a va fika va ta avanyisiwa hi hosi; kutani Absalomu a koka timbilu ta vanhu va Israyele.+  Eku heleni ka malembe ya 40, Absalomu a byela hosi a ku: “Ndzi kombela u ndzi pfumelela ndzi famba ndzi ya hetisisa xitshembiso xa mina lexi hlambanyiweke eHebroni,+ lexi ndzi xi hlambanyeleke Yehovha hilaha ku tiyeke.+  Hikuva nandza wa wena u endle xitshembiso lexi hlambanyiweke+ hilaha ku tiyeke, loko ndza ha tshama eGexura+ le Siriya, ndzi ku, ‘Loko hakunene Yehovha o ndzi tlherisela eYerusalema, ndzi ta tirhela Yehovha.’”+  Hiloko hosi yi ku eka yena: “Famba hi ku rhula.”+ Kutani a suka a ya eHebroni. 10  Absalomu a rhuma tinhlori+ etinyimbeni hinkwato ta Israyele, a ku: “Hi ku hatlisa loko mi twa mpfumawulo wa nanga, mi fanele mi ku, ‘Absalomu i hosi+ eHebroni!’”+ 11  Absalomu u fambe ni vavanuna va 200 va huma eYerusalema, va vitaniwa va famba va nga vileli ha nchumu,+ naswona a va nga tivi nchumu. 12  Nakambe, loko a nyikela switlhavelo, Absalomu u rhumele rito a vitana Ahitofele+ lowa le Gilo,+ mutsundzuxi+ wa Davhida, a landziwa emutini wakwe eGilo.+ Xikhiri+ xi ya xi tiya, vanhu a va ya va andza hi nhlayo+ eka Absalomu. 13  Hi ku famba ka nkarhi ku fike muviki eka Davhida, a ku: “Mbilu+ ya vavanuna va Israyele yi landzela Absalomu.” 14  Xikan’we-kan’we Davhida a byela malandza yakwe hinkwawo lawa a ma ri na yena eYerusalema, a ku: “Sukani mi yima hi baleka;+ hikuva a hi nge poni hikwalaho ka Absalomu! Fambani hi ku hatlisa, hikuva a nga tshuka a hatlisa, kunene a hi kuma, a tisa swo biha ehenhla ka hina, a hlasela muti hi banga!”+ 15  Hiloko malandza ya hosi ma byela hosi ma ku: “Hi ku landza hinkwaswo leswi hosi yanga leyi nga mufumi yi nga swi hlawulaka, malandza ya wena hi lawa.”+ 16  Kutani hosi yi huma ni vandyangu wa yona hinkwavo va famba hi milenge,+ hosi yi siya vavasati va khume, lava nga vavasati lavatsongo,+ leswaku va khathalela yindlu. 17  Hosi yi ya emahlweni ni ndlela ya yona yi huma ni vanhu hinkwavo va famba hi milenge; va fika va yima eBeta-meraka. 18  Malandza ya yona hinkwawo a ma pela etlhelo ka yona; Vakereti hinkwavo ni Vapeleti+ hinkwavo ni Vagati+ hinkwavo, vavanuna va 600 lava va yi landzeleke ku suka eGati+ a va pela emahlweni ka xikandza xa hosi. 19  Kutani hosi yi ku eka Itaya+ lowa Mugati: “Ha yini wena u fanele u famba na hina? Tlhela+ u ya tshama ni hosi; hikuva u munhu wumbe, kasi handle ka sweswo u munhu wa le vukhumbini ku suka eka rikwenu. 20  U fike tolo kunene, xana namuntlha ndzi ta ku tsendzelekisa+ na hina, u ya kun’wana ni kun’wana laha ndzi yaka kona? Tlhela u teka vamakwenu u famba na vona, [onge Yehovha a nga ku komba] musa wa rirhandzu+ ni vutshembeki!”+ 21  Kambe Itaya a hlamula hosi, a ku: “Leswi Yehovha a hanyaka nileswi hosi yanga leyi nga mufumi yi hanyaka,+ laha hosi yanga leyi nga mufumi yi nga ta va yi ri kona, hambi ku ri hikwalaho ka rifu kumbe hikwalaho ka vutomi, hi laha nandza wa wena a nga ta va a ri kona!”+ 22  Hiloko Davhida a ku eka Itaya:+ “Famba u ya pela.” Kutani Itaya lowa le Gati a pela swin’we ni vavanuna vakwe hinkwavo ni vana hinkwavo lava a va ri na yena. 23  Vanhu hinkwavo va tiko a va rila hi rito leri tlakukeke,+ naswona vanhu hinkwavo a va pela, hosi a yi yime ekusuhi ni nkova wa Kedroni,+ vanhu hinkwavo a va pelela egondzweni leri pfulekeke, leri yaka emananga. 24  Laha a ku ri na Sadoki+ ni Valevhi hinkwavo,+ va rhwale+ areka+ ya ntwanano wa Xikwembu xa ntiyiso; kutani va yi veka ehansi areka ya Xikwembu xa ntiyiso eAbiyatara+ ku fikela loko vanhu hinkwavo va hete ku pela va huma emutini. 25  Kambe hosi yi ku eka Sadoki: “Teka areka+ ya Xikwembu xa ntiyiso u yi tlherisela emutini.+ Loko ndzo kuma tintswalo ematihlweni ya Yehovha, kunene u ta ndzi vuyisa naswona a ndzi pfumelela ndzi vona laha yi tshamaka kona.+ 26  Kambe loko o vula a ku, ‘A wu ndzi tsakisanga,’ hi mina loyi, a a endle hilaha swi nga swinene hakona ematihlweni yakwe.”+ 27  Hosi yi ya emahlweni yi byela Sadoki lowa muprista yi ku: “U munhu la vonaka ka ha ri mahlweni,+ a swi tano ke? Tlhelela emutini hi ku rhula swin’we na Ahimazi n’wana wa wena na Yonathani+ n’wana wa Abiyatara, vana va n’wina vambirhi, mi famba na vona. 28  Waswivo, ndza hlwelanyana emahlalukweni ya mananga kukondza rito ri vuya ri huma eka n’wina ri ta ndzi tivisa.”+ 29  Hikwalaho Sadoki na Abiyatara va teka areka ya Xikwembu xa ntiyiso va yi tlherisela eYerusalema, va hambeta va tshama kona. 30  Davhida a a tlhandluka hi ntlhandluko wa Mitlhwari,+ a rila loko a ri karhi a tlhandluka, nhloko yakwe yi funengetiwile;+ a a famba a nga ambalanga nchumu emilengeni, kutani vanhu hinkwavo lava a va ri na yena, un’wana ni un’wana a a funengete nhloko, va tlhandluke va ri karhi va rila loko va tlhandluka.+ 31  Davhida a vikeriwa, va ku: “Ahitofele u le xikarhi ka lava va endlaka xikhiri+ na Absalomu.”+ Hiloko Davhida a ku:+ “Oho Yehovha,+ ndzi kombela u hundzula kungu ra Ahitofele ri va vuphukuphuku!”+ 32  Kuteloko Davhida a fika enhlohlorhini leyi vanhu a va hamba va nkhinsamela Xikwembu eka yona, kwalaho a ku ri na Huxayi+ lowa Muaraki+ a ta n’wi hlanganisa, nguvu yakwe yo leha yi handzuke hi le xikarhi naswona a ri ni ritshuri enhlokweni.+ 33  Hambiswiritano, Davhida a ku eka yena: “Kunene loko a wu tsemakanye na mina, a wu ta va u ve ndzhwalo ehenhla ka mina.+ 34  Kambe loko u tlhelela emutini, kunene u byela Absalomu u ku, ‘Ndzi nandza wa wena, Wena Hosi. A ndzi ri nandza wa tata wa wena hi nkarhi wolowo, kambe sweswi ndzi nandza wa wena,’+ kutani u ta ndzi pfilunganyela+ kungu ra Ahitofele. 35  Xana Sadoki na Abiyatara lava va vaprista a va na wena?+ Hinkwaswo leswi u nga ta swi twa swi huma endlwini ya hosi u ta swi byela Sadoki na Abiyatara lava va vaprista.+ 36  Waswivo! Hi lavaya ni vana va vona vambirhi, Ahimazi+ wa Sadoki na Yonathani+ wa Abiyatara; n’wina mi fanele mi tirhisa vona ku rhumela hinkwaswo leswi mi nga swi twaka.” 37  Kutani Huxayi nakulobye wa Davhida+ a fika emutini. Loko ku ri Absalomu,+ a nghena eYerusalema.

Tinhlamuselo ta le hansi