Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 11:1-27

11  Eku sunguleni ka lembe,+ enkarhini lowu tihosi ti humaka ha wona ti ya enyimpini,+ Davhida a rhuma Yowabu ni malandza yakwe ma ri na yena ni tiko hinkwaro ra Israyele leswaku va ya lovisa vana va Amone+ ni ku rhendzela Rhaba+ enkarhini lowu Davhida a a tshama eYerusalema.  Nimadyambu, Davhida a pfuka esangwini rakwe a famba-famba ehenhla ka lwangu+ ra yindlu ya hosi; loko a ri ehenhla ka lwangu a vona+ wansati a hlamba, wansati loyi a a saseke ngopfu.+  Hiloko Davhida a rhumela rito leswaku va ya vutisisa hi wansati loyi,+ kutani un’wana a ku: “Xana loyi a hi Bati-xeba+ n’wana wa Eliyamu,+ nsati wa Uriya+ lowa Muheti?”+  Endzhaku ka sweswo Davhida a rhuma varhumiwa leswaku va ya n’wi teka.+ Hiloko a fika eka yena+ kutani a etlela na yena,+ kasi yena a a ha tihlawulekisa eku nyameni ka yena.+ Endzhaku a tlhelela endlwini yakwe.  Kutani wansati loyi a tika. Hikwalaho a rhumela rito a byela Davhida a ku: “Ndzi tikile.”  Hiloko Davhida a rhumela rito eka Yowabu, a ku: “Rhumela Uriya lowa Muheti eka mina.” Kutani Yowabu a rhumela Uriya eka Davhida.  Loko Uriya a fika eka yena, Davhida a sungula ku vutisa leswaku Yowabu u pfuke njhani nileswaku vanhu a va pfuke njhani, nileswaku nyimpi a yi famba njhani.  Eku heteleleni Davhida a byela Uriya a ku: “Rhelela u ya endlwini ya wena u hlamba milenge.”+ Hikwalaho Uriya a famba a suka endlwini ya hosi, kutani nyiko ya hosi ya ku n’wi xixima yi n’wi landzela.  Hambiswiritano, Uriya a etlela enyangweni ya yindlu ya hosi ni malandza laman’wana hinkwawo ya hosi yakwe, a nga rhelelanga a ya endlwini yakwe. 10  Kutani va byela Davhida va ku: “Uriya a nga rhelelanga a ya endlwini yakwe.” Hiloko Davhida a ku eka Uriya: “U nghene u huma eriendzweni, a swi tano ke? Ha yini u nga rhelelanga u ya endlwini ya wena?” 11  Uriya a hlamula Davhida a ku: “Areka+ na Israyele na Yuda va tshama emintsongeni, naswona hosi yanga Yowabu ni malandza ya hosi yanga+ va dzime mixaxa enhoveni, kutani mina—xana ndzi fanele ndzi ya endlwini ya mina ndzi dya ni ku nwa naswona ndzi etlela ni nsati wa mina?+ Leswi u hanyaka nileswi moya-xiviri wa wena wu hanyaka,+ a ndzi nge wu endli nchumu lowu!” 12  Hiloko Davhida a ku eka Uriya: “Tshama laha ninamuntlha, mundzuku ndzi ta ku tshika u famba.” Hikwalaho Uriya a hambeta a tshama eYerusalema siku rero ni siku leri landzelaka. 13  Ku tlula kwalaho, Davhida a n’wi vitana leswaku a ta dya emahlweni ka yena, a nwa. Kutani a n’wi dakwisa.+ Nilokoswiritano, a huma nimadyambu a ya etlela esangwini rakwe ni malandza ya hosi yakwe, a nga rhelelanga a ya endlwini yakwe. 14  Nimixo, Davhida a tsalela Yowabu papila+ a ri rhumela hi voko ra Uriya. 15  Kutani a tsala epapileni, a ku:+ “Vekani Uriya emahlweni ka valwi va nyimpi laha nyimpi yi hisaka kona,+ mi fanele mi tlhentlha endzhaku ka yena, u fanele a tlhaviwa a fa.”+ 16  Loko Yowabu a ha rindze muti, a veka Uriya laha a a tiva leswaku ku ni vavanuna va vurhena.+ 17  Loko vavanuna va muti va huma va ya lwa na Yowabu, hiloko vanhu van’wana, malandza ya Davhida va wa, Uriya lowa Muheti na yena a fa.+ 18  Kutani Yowabu a rhumela xiviko eka Davhida malunghana ni timhaka hinkwato ta nyimpi. 19  A ya emahlweni a lerisa murhumiwa, a ku: “Hi ku hatlisa loko u hete ku byela hosi timhaka hinkwato ta nyimpi, 20  loko hosi yo kariha, yi ku eka wena, ‘Ha yini mi tshinele kusuhi ni muti leswaku mi lwa? Xana a mi swi tivanga leswaku va nga copa va ri ehenhla ka rirhangu? 21  Xana i mani la dlayeke Abimeleke+ n’wana wa Yerubexeti?+ Xana a ku nga ri wansati la n’wi hoxeke hi ribye ro sila+ a ri ehenhla ka rirhangu kutani a fa eTebese?+ Ha yini mi tshinele kusuhi ni rirhangu?’ u fanele u ku, ‘Uriya nandza wa wena lowa Muheti u file na yena.’”+ 22  Hiloko murhumiwa a famba kutani a fika a byela Davhida hinkwaswo leswi Yowabu a n’wi rhumeke swona. 23  Murhumiwa a ya emahlweni a ku eka Davhida: “Vavanuna lavaya a va ri ni matimba eka hina lerova va huma ku ta lwa na hina enhoveni; kambe hi hambete hi va susumeta ku ya fika enyangweni ya vungheno. 24  Vacopi va tshamela ku copa malandza ya wena va ri ehenhla ka rirhangu,+ lerova malandza man’wana ya hosi ma fa; nandza wa wena Uriya lowa Muheti na yena u file.”+ 25  Hiloko Davhida a ku eka murhumiwa loyi: “U ta byela Yowabu u ku, ‘Mhaka leyi yi nga tshuki yi vonaka yi bihile ematihlweni ya wena, hikuva banga ri dya+ un’wana hilaha ri dyaka un’wana hakona. Tiyisa nyimpi ya wena u lwa ni muti u wu hlula.’+ U n’wi khutaza.” 26  Nsati wa Uriya a swi twa leswaku Uriya nuna wakwe u file, kutani a sungula ku rilela+ n’wini wakwe.+ 27  Loko nkarhi wa ku rila+ wu hundzile, hi ku hatlisa Davhida a rhumela rito leswaku a tisiwa endlwini yakwe, kutani a va nsati wakwe.+ Hi ku famba ka nkarhi a n’wi tswalela n’wana, kambe nchumu lowu Davhida a wu endleke wu vonaka wu bihile+ ematihlweni+ ya Yehovha.

Tinhlamuselo ta le hansi