Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 10:1-19

10  Endzhaku ka sweswo hosi ya vana va Amone+ yi fa, kutani Hanunu n’wana wa yona a sungula ku fuma ematshan’weni ya yona.+  Hiloko Davhida a ku: “Hanunu n’wana wa Nahaxi ndzi ta n’wi komba musa wa rirhandzu hilaha tata wakwe a ndzi kombeke musa wa rirhandzu hakona.”+ Hikwalaho Davhida a rhumela rito hi malandza+ yakwe leswaku ma ya n’wi chavelela hikwalaho ka tata wakwe, kutani malandza ya Davhida ma fika etikweni ra vana va Amone.  Kambe tihosana ta vana va Amone ti vutisa Hanunu hosi ya tona, ti ku: “Xana Davhida u rhumele vachaveleri ematihlweni ya wena hi leswi a xiximaka tata wa wena? Xana Davhida a nga rhumelanga malandza yakwe eka wena leswaku a lavisisa muti lowu, a wu kambela+ ni ku wu hlula?”+  Hiloko Hanunu a teka malandza ya Davhida a ma byevula hafu ya malepfu+ ya wona naswona a tsema tinguvu ta wona hi le xikarhi, ku ya fika eswisutini swa wona, a ma tshika ma famba.+  Endzhaku vanhu va vikele Davhida, xikan’we-kan’we a rhumela rito leswaku va ya va hlanganisa, hikuva vavanuna lava va titwe va tsongahatiwe ngopfu; hosi yi ya emahlweni yi ku: “Tshamani eYeriko+ kukondza malepfu ya n’wina ma kula kahle. Kutani mi ta vuya.”  Hi ku famba ka nkarhi vana va Amone va vona leswaku va ve risema ro biha+ eka Davhida, hiloko vana va Amone va rhumela rito va ya thola Vasiriya va le Beta-rehobo+ ni Vasiriya va le Soba,+ vavanuna va 20 000 lava fambaka hi milenge, ni hosi ya le Maka,+ vavanuna va 1 000 na Ixitobo, vavanuna va 12 000.  Loko Davhida a swi twile, a rhuma Yowabu ni vuthu hinkwaro ni vavanuna va matimba.+  Kutani vana va Amone va sungula ku huma va ya lunghekela nyimpi enyangweni ya vungheno, swin’we ni Vasiriya va le Soba ni va le Rehobo,+ na Ixitobo na Maka va yime va ri swavo enhoveni.+  Loko Yowabu a vone leswaku valwi va nyimpi va n’wi hlasele emahlweni ni le ndzhaku, xikan’we-kan’we a hlawula vavanuna van’wana eka hinkwavo lava hlawuriweke+ eIsrayele, a va veka va lunghekile leswaku va hlangana ni Vasiriya. 10  Vanhu lavan’wana hinkwavo u va nyikele evokweni ra Abixayi+ makwavo, leswaku va hloma hi xikongomelo xo hlangana ni vana va Amone.+ 11  A ya emahlweni a ku: “Loko Vasiriya vo va ni matimba ngopfu eka mina, u fanele u ndzi ponisa; kambe loko vana va Amone vo va ni matimba ngopfu eka wena, ndzi fanele ndzi ku ponisa.+ 12  Vana ni matimba leswaku hi ta va ni xivindzi+ hikwalaho ka vanhu va ka hina ni hikwalaho ka miti ya Xikwembu xa hina;+ loko ku ri Yehovha u ta endla leswi nga swinene ematihlweni yakwe.”+ 13  Kutani Yowabu ni vanhu lava a va ri na yena va tshinela enyimpini ku ta lwa ni Vasiriya, hiloko va baleka emahlweni ka yena.+ 14  Loko ku ri vana va Amone, va vone leswaku Vasiriya va balekile, hiloko va baleka emahlweni ka Abixayi kutani va fika emutini.+ Endzhaku ka sweswo Yowabu a vuya a huma eka vana va Amone, a fika eYerusalema.+ 15  Loko Vasiriya va vone leswaku va hluriwile emahlweni ka Israyele, va hlengeletana. 16  Kutani Hadadezera+ a rhumela rito leswaku ku humesiwa Vasiriya lava a va ri exifundzheni xa Nambu;+ va ta eHelama va ri na Xobaki+ ndhuna ya vuthu ra Hadadezera emahlweni ka vona. 17  Loko Davhida a vikeriwile, hi ku hatlisa u hlengelete tiko hinkwaro ra Israyele va pela Yordani va fika eHelama. Hiloko Vasiriya va hloma leswaku va hlangana na Davhida, va lwa na yena.+ 18  Vasiriya va baleka+ emahlweni ka Israyele; Davhida a dlaya eka Vasiriya, vafambisi va makalichi+ va 700 ni vagadi va tihanci va 40 000, Xobaki murhangeri wa vuthu ra vona u n’wi tlhavile kutani a fela kwalaho.+ 19  Loko tihosi hinkwato,+ malandza ya Hadadezera va vone leswaku va hluriwile emahlweni ka Israyele,+ hi ku hatlisa va endle ku rhula na Israyele, va sungula ku va tirhela;+ Vasiriya a va chava ku tlhela va ringeta ku ponisa vana va Amone.+

Tinhlamuselo ta le hansi