Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

2 Samuwele 1:1-27

1  Endzhaku ka rifu ra Sawulo loko Davhida a vuyile eku dlayeni ka Vaamaleke,+ Davhida a ya emahlweni a tshama eSikilaga+ masiku mambirhi.  Hi siku ra vunharhu, waswivo, ku ta wanuna+ a huma enxaxeni, eka Sawulo, tinguvu takwe ti handzuke hi le xikarhi+ naswona a ri ni ritshuri enhlokweni;+ kuteloko a fika eka Davhida, xikan’we-kan’we a wela emisaveni,+ a nkhinsama.  Davhida a ku eka yena: “Xana u huma kwihi?” hiloko a ku eka yena: “Ndzi baleke enxaxeni wa Israyele.”  Davhida a ya emahlweni a ku eka yena: “Xana ku endleke yini? Ndzi kombela u ndzi byela.” Yena a ku: “Vanhu va balekile enyimpini naswona vanhu vo tala va wile kutani va fa,+ hambi ku ri Sawulo+ na Yonathani+ n’wana wakwe va file.”  Hiloko Davhida a ku eka jaha leri a ri n’wi byela: “Xana u swi tivisa ku yini leswaku entiyisweni Sawulo u file swin’we na Yonathani n’wana wakwe?”+  Jaha leri a ri n’wi rungulela, ri ku: “Ndzi tikume ndzi ri eNtshaveni ya Gilbowa ndzi nga swi rindzelanga,+ kwalaho Sawulo a a tiseketele hi fumu rakwe;+ kutani waswivo, vachayeri va makalichi ni vavanuna lava gadeke va n’wi kumile.+  Loko a hundzuluka a ndzi vona, hiloko a ndzi vitana, kutani ndzi ku, ‘Hi mina loyi!’  A ya emahlweni a ku eka mina, ‘Hi wena mani?’ mina ndzi ku eka yena, ‘Ndzi Muamaleke.’+  Kutani a ku, ‘Ndzi kombela u yima ehenhla ka mina, kunene u ndzi dlaya, hikuva ndzi khomiwe hi vusindza, hikuva moya-xiviri wa mina hinkwawo+ wa ha ri eka mina.’ 10  Hiloko ndzi yima ehenhla ka yena kunene ndzi n’wi dlaya,+ hikuva a ndzi swi tiva leswaku a nge hanyi endzhaku ka loko a wile. Kutani ndzi teka xidlodlo+ lexi a xi ri enhlokweni yakwe ni vusenga lebyi a byi ri evokweni rakwe leswaku ndzi swi tisa laha eka hosi yanga.” 11  Hiloko Davhida a khoma tinguvu takwe a ti handzula hi le xikarhi,+ vavanuna hinkwavo lava a va ri na yena va endle tano na vona. 12  Kutani va sungula ku kalakala va rila+ ni ku titsona swakudya+ ku fikela nimadyambu hikwalaho ka Sawulo ni hikwalaho ka Yonathani n’wana wakwe ni hikwalaho ka vanhu va Yehovha ni hikwalaho ka yindlu ya Israyele,+ hikuva a va we hi banga. 13  Kutani Davhida a ku eka jaha leri a ri n’wi rungulela: “Xana u huma kwihi?” rona ri ku: “Ndzi n’wana wa muluveri lowa Muamaleke.”+ 14  Hiloko Davhida a ku eka rona: “Swi endlekise ku yini leswaku u nga chavi+ ku tshambuluta voko u dlaya mutotiwa+ wa Yehovha?” 15  Kutani Davhida a vitana un’wana wa majaha a ku: “Tshinela. N’wi tlhave.” Hikwalaho a n’wi tlhava kutani a fa.+ 16  Hiloko Davhida a ku eka yena: “Nandzu wa wena wa ngati a wu ve enhlokweni ya wena,+ hikuva nomu wa wena  wu ku avanyisile,+ wu ku, ‘Entiyisweni mina ndzi dlaye mutotiwa wa Yehovha.’”+ 17  Kutani Davhida a yimbelelela+ Sawulo na Yonathani n’wana wakwe risimu ra xirilo+ 18  a vula leswaku vana va Yuda+ va fanele va dyondzisiwa “Vurha.”+ Waswivo! Swi tsariwile ebukwini ya Yaxara:+ 19  “Oho Israyele, ku saseka ku dlayeriwe etindhawini ta wena leti tlakukeke.+ Vona ndlela leyi vavanuna va matimba va weke ha yona! 20  N’wina mi nga swi vuli eGati;+ Mi nga swi tivisi eswitarateni swa Axikeloni,+ Hikuva vana va Vafilisita va vanhwanyana va nga tshuka va tsaka, Hikuva vana va vanhwanyana va vavanuna lava nga yimbangiki va nga tshuka va khana.+ 21  N’wina tintshava ta Gilbowa,+ mi nga pfumeleli mberha, mi nga pfumeleli mpfula yi mi nela, kumbe mi pfumelela masimu ya minyikelo yo kwetsima;+ Hikuva xitlhangu xa vanhu va matimba xi thyakisiwe kwalaho, Xitlhangu xa Sawulo, lerova a xi kona lexi totiweke hi mafurha.+ 22  Engatini ya loyi a dlayiweke, emafurheni ya vanhu va matimba, Vurha bya Yonathani a byi hundzulukanga,+ Ni banga ra Sawulo a ri nge vuyi ri nga humelelanga.+ 23  Sawulo na Yonathani,+ vanhu lava rhandzekaka ni vanhu vo saseka hi nkarhi wa vutomi bya vona, A va hambanisiwanga eku feni ka vona.+ A va ri ni rivilo ku tlula magama,+ A va ri ni matimba ku tlula tinghala.+ 24  N’wina vana va Israyele va vanhwanyana, rilelani Sawulo, Loyi a mi ambexeke swa ribungu ni swikhaviso, Loyi a veheleke swin’wetsin’wetsi swa nsuku eswiambalweni swa n’wina.+ 25  Vona ndlela leyi vanhu va matimba va weke ha yona exikarhi ka nyimpi!+ Yonathani u dlayiwe etindhawini ta wena leti tlakukeke!+ 26  Ndzi karhatekile hikwalaho ka wena, makwerhu Yonathani, A wu rhandzeka ngopfu eka mina.+ Rirhandzu ra wena a ri ri rinene ngopfu eka mina ku tlula rirhandzu ra vavasati.+ 27  Vona ndlela leyi vanhu va matimba va weke ha yona+ Ni ndlela leyi matlhari ya nyimpi ma heleke ha yona!”

Tinhlamuselo ta le hansi