Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Yohane 4:1-21

4  Varhandziwa, mi nga kholwi marito hinkwawo lama huhuteriweke,+ kambe kambisisani marito lama huhuteriweke mi vona loko swi ri leswaku ma huma eka Xikwembu,+ hikuva ku humelele vaprofeta vo tala va mavunwa emisaveni.+  Marito lama huhuteriweke lama humaka eka Xikwembu+ mi ta ma tiva hi leswi: Marito hinkwawo lama huhuteriweke lama pfumelaka leswaku Yesu Kreste u tile a ri wa nyama ma huma eka Xikwembu,+  kambe marito hinkwawo lama huhuteriweke lama nga n’wi pfumeriki Yesu a ma humi eka Xikwembu.+ Ku tlula kwalaho, lawa i marito lama huhuteriweke ya mukaneti wa Kreste lawa mi tweke leswaku ma ta,+ naswona sweswi se ma le misaveni.+  Vana lavatsongo, mi huma eka Xikwembu, naswona mi va hlurile vanhu volavo,+ hikuva loyi a nga ni vun’we+ na n’wina u nkulu+ eka loyi a nga ni vun’we ni misava.+  Vona va huma emisaveni;+ hi yona mhaka leyi va vulavulaka leswi humaka emisaveni naswona misava ya va yingisa.+  Hina hi huma eka Xikwembu.+ Loyi a tivaka Xikwembu wa hi yingisa;+ loyi a nga humiki eka Xikwembu a nga hi yingisi.+ Leyi i ndlela leyi hi lemukaka ha yona marito lama huhuteriweke ya ntiyiso ni marito lama huhuteriweke lama hoxeke.+  Varhandziwa, a hi hambeteni hi rhandzana,+ hikuva rirhandzu+ ri huma eka Xikwembu, naswona mani na mani la nga ni rirhandzu u velekiwe hi Xikwembu+ naswona u tiva Xikwembu.+  Loyi a nga riki na rirhandzu a nga tivi Xikwembu, hikuva Xikwembu i rirhandzu.+  Rirhandzu ra Xikwembu ri kombisiwile eka hina,+ hileswi Xikwembu xi rhumeke N’wana+ wa xona la tswariweke a ri swakwe emisaveni leswaku hi ta kuma vutomi ha yena.+ 10  Rirhandzu ri tise xileswi, ku nga ri leswaku hina hi rhandze Xikwembu, kambe xona xi hi rhandzile kutani xi rhuma N’wana wa xona a va gandzelo+ ra ku vuyelelana+ ra swidyoho+ swa hina. 11  Varhandziwa, loko leyi ku ri ndlela leyi Xikwembu xi hi rhandzeke ha yona, kutani hina hi boheka ku rhandzana.+ 12  A nga kona ni un’we la tshameke a vona Xikwembu.+ Loko hi hambeta hi rhandzana, Xikwembu xi tshama eka hina naswona rirhandzu ra xona ri endliwa ri hetiseka eka hina.+ 13  Ha swi tiva leswaku hi tshama hi ri ni vun’we+ na xona ni leswaku xona xi tshama xi ri ni vun’we na hina,+ hileswi xi hi nyikeke moya wa xona.+ 14  Ku engetela kwalaho, hina hi swi vonile+ naswona hi nyikela vumbhoni+ bya leswaku Tatana u rhume N’wana wa yena leswaku a va Muponisi wa misava.+ 15  Mani na mani la vulaka leswaku Yesu Kreste i N’wana wa Xikwembu,+ Xikwembu xi tshama xi ri ni vun’we ni lowo tano naswona yena u tshama a ri ni vun’we ni Xikwembu.+ 16  Naswona hina se hi tiva rirhandzu+ leri Xikwembu xi nga na rona eka hina naswona hi ri khorwile. Xikwembu i rirhandzu,+ loyi a tshamaka a ri ni rirhandzu+ u tshama a ri ni vun’we ni Xikwembu naswona Xikwembu xi tshama xi ri ni vun’we+ na yena. 17  Leyi hi yona ndlela leyi rirhandzu ri endliweke ha yona ri hetiseka eka hina, leswaku hi va ni ntshunxeko wo vulavula+ hi siku ra vuavanyisi,+ hikuva, leswi yena a nga tano, na hina hi tano emisaveni+ leyi. 18  A ku na ku chava erirhandzwini,+ rirhandzu leri hetisekeke ri cukumetela ku chava ehandle,+ hikuva ku chava ku vanga xirhalanganya. Kunene, loyi a nga ehansi ka ku chava a nga si endliwa a hetiseka erirhandzwini.+ 19  Loko ku ri hina, hi ni rirhandzu, hikuva hi xona xi nga sungula xi hi rhandza.+ 20  Loko mani na mani a ku: “Ndzi rhandza Xikwembu,” kasi u venga makwavo, i muhembi.+ Hikuva loyi a nga rhandziki makwavo,+ la n’wi vonaka, a nge swi koti ku rhandza Xikwembu lexi a nga si tshamaka a xi vona.+ 21  Naswona xileriso lexi hi xi kuma eka xona,+ leswaku loyi a rhandzaka Xikwembu u fanele a rhandza ni makwavo.+

Tinhlamuselo ta le hansi