Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Tikronika 21:1-30

21  Kutani Sathana a suka a yima ku lwa na Israyele ni ku hlohlotela+ Davhida leswaku a hlaya Israyele.  Kutani Davhida a byela Yowabu+ ni tindhuna ta vanhu a ku: “Fambani mi ya hlaya+ Israyele ku suka eBera-xeba+ ku ya eDani,+ mi ndzi tisela nhlayo ya vona ndzi ta tiva leswaku i vangani.”+  Kambe Yowabu a ku: “Onge Yehovha a nga engetela vanhu vakwe ka dzana ku ringana leswi va nga swona.+ Wena hosi yanga leyi nga mufumi, xana hinkwavo ka vona a hi malandza ya hosi ya mina? Xana hosi yanga yi swi lavela yini leswi?+ Ha yini yi fanele yi vangela Israyele nandzu?”  Kambe rito+ ra hosi ri hlula Yowabu, lerova Yowabu a huma+ a famba-famba etikweni hinkwaro ra Israyele, endzhaku ka sweswo a fika eYerusalema.+  Kutani Yowabu a humesa nhlayo ya ku tsarisiwa ka vanhu eka Davhida; tiko hinkwaro ra Israyele ri ringana vavanuna va 1 100 000 lava va khomaka banga,+ Yuda ri ringana vavanuna va 470 000 lava va khomaka banga.  Levhi+ na Benjamini a nga va tsarisanga exikarhi ka vona,+ hikuva rito ra hosi a ri nyenyetsa eka Yowabu.  Mhaka leyi a yi bihile ematihlweni ya Xikwembu xa ntiyiso,+ kutani xi hlasela Israyele.  Hikwalaho Davhida a byela Xikwembu xa ntiyiso a ku: “Ndzi dyohe+ ngopfu swinene hi nchumu lowu ndzi wu endleke. Sweswi, ndzi kombela u tshika xihoxo xa nandza wa wena xi hundza;+ hikuva ndzi endle vuphukuphuku lebyikulu.”+  Yehovha a vulavula na Gadi,+ loyi a vonaka swivono swa Davhida,+ a ku: 10  “Famba u ya byela Davhida, u ku, ‘Yehovha u te: “Ndzi veka swilo swinharhu ehenhla ka wena.+ Tihlawulele xin’we xa swona leswaku ndzi ku endla xona.”’”+ 11  Hiloko Gadi a nghena eka Davhida+ a ku eka yena: “Yehovha u te, ‘Tihlawulele, 12  leswaku ku va ni ndlala malembe manharhu;+ kumbe leswaku u baleka tin’hweti tinharhu emahlweni ka swirha+ swa wena ni banga ra swirha swa wena ri va ehenhla ka wena, kumbe masiku manharhu ku va ni banga ra Yehovha+ ni ntungu+ etikweni, ntsumi ya Yehovha yi lovisa+ endhawini hinkwayo ya Israyele.’ Sweswi ndzi byele leswi ndzi faneleke ndzi n’wi angula ha swona Loyi a ndzi rhumeke.” 13  Kutani Davhida a ku eka Gadi: “Swa ndzi karhata swinene. Ndzi kombela ku wela evokweni ra Yehovha,+ hikuva tintswalo ta yena ti tele ngopfu;+ kambe u nga ndzi wiseli evokweni ra munhu.”+ 14  Hiloko Yehovha a vanga ntungu+ eIsrayele, lerova ku wa vanhu va 70 000 eIsrayele.+ 15  Tlhandlakambirhi, Xikwembu xa ntiyiso xi rhuma ntsumi eYerusalema leswaku yi wu lovisa;+ hi ku hatlisa loko yi sungula ku wu lovisa, Yehovha a swi vona, a sungula ku tisola hi khombo leri;+ hiloko a byela ntsumi leyi a yi lovisa a ku: “Swi ringene!+ Sweswi voko ra wena a ri ehle.” Ntsumi ya Yehovha a yi yime ekusuhi ni xivuya xa Orinani+ lowa Muyebusi.+ 16  Loko Davhida a tlakusa mahlo, a vona ntsumi+ ya Yehovha yi yime exikarhi ka misava ni matilo yi tamele banga+ yi ri tshambutele eYerusalema; Davhida ni vakulukumba, va tifunengete hi nguvu yo khwaxa,+ xikan’we-kan’we va wa hi swikandza swa vona.+ 17  Davhida a ku eka Xikwembu xa ntiyiso: “Xana a hi mina la vuleke leswaku ku hlayiwa vanhu, xana a hi mina la dyoheke, kunene a endleke swo biha?+ Loko ku ri tinyimpfu leti,+ xana ti endle yini? Oho Yehovha Xikwembu xanga, ndzi kombela leswaku voko ra wena ri ta ehenhla ka mina ni le henhla ka yindlu ya tatana; kambe ku nga ri ehenhla ka vanhu va wena,+ va nga weriwi hi ntungu.” 18  Loko ku ri ntsumi ya Yehovha, yi byele Gadi+ leswaku a byela Davhida, leswaku Davhida a tlhandluka a ya akela Yehovha alitari exivuyeni xa Orinani lowa Muyebusi.+ 19  Hiloko Davhida a tlhandluka hi ku landza rito ra Gadi leri a ri vuleke hi vito ra Yehovha.+ 20  Hi nkarhi wolowo, Orinani+ a hundzuluka kutani a vona ntsumi; vana vakwe va mune lava a va ri na yena a va tifihlile. Orinani a a hula koroni. 21  Kutani Davhida a ya eka Orinani. Loko Orinani a languta kutani a vona Davhida,+ xikan’we-kan’we a huma exivuyeni a nkhinsama eka Davhida xikandza xakwe xi langute emisaveni. 22  Kutani Davhida a byela Orinani a ku: “Ndzi nyike ndhawu ya xivuya, leswaku ndzi akela Yehovha alitari eka yona. Ndzi nyike xona hi mali+ ya xona hinkwayo,+ leswaku ntungu+ wu hela eka vanhu.” 23  Kambe Orinani a byela Davhida a ku: “Xi teke xi va xa wena,+ hosi yanga leyi nga mufumi a yi endle leswi swi nga swinene ematihlweni ya yona. Waswivo, ndzi humesa tihomu+ ti va magandzelo yo hisiwa ni xileyi xo hula+ xi va tihunyi+ ni koroni yi va gandzelo ra mavele. Ndzi humesa hinkwaswo.”+ 24  Hambiswiritano, Hosi Davhida a byela Orinani a ku: “E-e, kunene ndzi ta yi riha mali leyi hinkwayo,+ hikuva a ndzi nge rhwali leswi swi nga swa wena ndzi swi yisa eka Yehovha ndzi swi humesa swi va switlhavelo swo hisiwa ndzi nga swi xavanga.” 25  Hiloko Davhida a hakela Orinani ndhawu leyi hi tixikele ta nsuku leti tikaka 600.+ 26  Kutani Davhida a akela Yehovha alitari+ kwalaho, a humesa switlhavelo swo hisiwa ni switlhavelo swa xinakulobye, hiloko a vitana Yehovha,+ loyi a n’wi hlamuleke hi ndzilo+ lowu humaka ematilweni ehenhla ka alitari ya gandzelo ro hisiwa. 27  Tlhandlakambirhi, Yehovha a vula rito eka ntsumi,+ leyi hi ku pfumelelana na rona yi vuyiseleke banga ra yona enkotlotweni wa rona. 28  Enkarhini wolowo, loko Davhida a vona leswaku Yehovha u n’wi hlamurile a ri exivuyeni xa Orinani lowa Muyebusi, a ya emahlweni a endla xitlhavelo kwalaho.+ 29  Kambe tabernakela ya Yehovha leyi Muxe a yi endleke emananga ni alitari ya gandzelo ro hisiwa, enkarhini wolowo a swi ri endhawini leyi tlakukeke eGibiyoni.+ 30  Davhida a nga swi kotanga ku ya emahlweni ka yona a ya vutisa Xikwembu, hikuva a a chava+ banga ra ntsumi ya Yehovha.

Tinhlamuselo ta le hansi