Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Tikronika 15:1-29

15  Kutani a tiakela tindlu+ eMutini wa Davhida; a lunghiselela ndhawu+ ya areka ya Xikwembu xa ntiyiso, a dzima ntsonga wa yona.  Hi wona nkarhi lowu Davhida a vuleke ha wona a ku: “A nga kona loyi a nga ta rhwala areka ya Xikwembu xa ntiyiso loko ku nga ri Valevhi, hikuva hi vona lava Yehovha a va hlawuleke leswaku va rhwala areka ya Yehovha+ ni ku n’wi tirhela+ hilaha ku nga riki na makumu.”  Kutani Davhida a hlengeleta tiko hinkwaro ra Israyele eYerusalema+ leswaku va tisa areka+ ya Yehovha endhawini ya yona leyi a yi lunghiseleleke yona.  Davhida a hlengeleta vana va Aroni+ ni Valevhi;  eka vana va Kohata, Uriyele+ lowa ndhuna ni vamakwavo, va ri 120;  eka vana va Merari,+ Asaya+ lowa ndhuna ni vamakwavo, va ri 220;  eka vana va Gerixomu,+ Yuwele+ lowa ndhuna ni vamakwavo, va ri 130;  eka vana va Elizafani,+ Xemaya+ lowa ndhuna ni vamakwavo, va ri 200;  eka vana va Hebroni, Eliyele lowa ndhuna ni vamakwavo, va ri 80; 10  eka vana va Uziyele,+ Aminadaba lowa ndhuna ni vamakwavo, va ri 112. 11  Ku tlula kwalaho, Davhida a vitana Sadoki+ na Abiyatara+ lava va vaprista, ni Valevhi ku nga Uriyele,+ Asaya+ na Yuwele,+ Xemaya,+ Eliyele+ na Aminadaba, 12  a ku eka vona: “Mi varhangeri+ va vatata wa Valevhi. Tihlawulekiseni,+ n’wina ni vamakwenu, mi fanele mi tisa areka ya Yehovha Xikwembu xa Israyele endhawini leyi ndzi yi lunghiseleleke yona. 13  Hikuva a mi yi tisanga eku sunguleni,+ Yehovha Xikwembu xa hina u hi hlaserile,+ hikuva a hi n’wi lavanga hi ku landza ntolovelo wa kona.”+ 14  Hiloko vaprista ni Valevhi va tihlawulekisa+ leswaku va humesa areka ya Yehovha, Xikwembu xa Israyele. 15  Kutani vana va Valevhi va sungula ku rhwala+ areka ya Xikwembu xa ntiyiso emakatleni ya vona hi tinhonga leti a ti ri ehenhla ka vona, hilaha Muxe a leriseke hakona hi ku landza rito ra Yehovha.+ 16  Davhida a byela varhangeri va Valevhi leswaku va yimisa vamakwavo lava va yimbelelaka+ hi swichayachayana swa tinsimu,+ swichayachayana swa switende,+ tiharipa+ ni swiphambati,+ va chaya hi matimba va endla mpfumawulo wa ku tsaka wu twala ngopfu. 17  Hiloko Valevhi va yimisa Hemani+ n’wana wa Yuwele, eka vamakwavo, Asafa+ n’wana wa Berakiya; eka vana va Merari, vamakwavo Ethani+ n’wana wa Kuxaya; 18  va ri ni vamakwavo va ntlawa wa vumbirhi,+ Zakariya,+ Beni, Yaziyele, Xemiramoto, Yehiyele, Uni, Eliyabu, Benaya, Maseya, Matitiya, Elifelehu, Mikineya, Obede-edomu,+ Yeyiyele, varindzi va tinyangwa, 19  ni vayimbeleri, Hemani,+ Asafa+ na Ethani va ri ni swiphambati swa koporo swo swi chaya swi twala ngopfu;+ 20  na Zakariya, Aziyele,+ Xemiramoto, Yehiyele, Uni, Eliyabu, Maseya na Benaya va ri ni swichayachayana swa switende leswi a swi fambisana ni Alamoti,+ 21  na Matitiya,+ Elifelehu, Mikineya, Obede-edomu, Yeyiyele na Azaziya va ri ni tiharipa+ leti fambisanaka ni Xeminiti,+ leswaku va va vafambisi; 22  na Kenaniya+ ndhuna ya Valevhi eku rhwaleni, a lerisa eku rhwaleni, hikuva a a swi tiva kahle;+ 23  na Berakiya na Elkana varindzi va tinyangwa+ ta Areka; 24  na Xebaniya, Yuxafati, Nethanele, Amasayi, Zakariya, Benaya na Eliyezere, vaprista, lava a va chaya timhalamhala+ ti twala ngopfu emahlweni ka areka ya Xikwembu xa ntiyiso, na Obede-edomu na Yehiya varindzi va tinyangwa ta Areka. 25  Davhida+ ni vakulukumba va Israyele+ ni tindhuna+ ta magidi, hi vona lava va fambeke va ya humesa areka ya ntwanano wa Yehovha hi ku tsaka+ endlwini ya Obede-edomu.+ 26  Kuteloko Xikwembu xa ntiyiso xi pfune+ Valevhi lava va rhwaleke areka ya ntwanano wa Yehovha, hiloko va endla xitlhavelo hi swinkunzana swa nkombo ni makhuna ya nkombo.+ 27  Davhida a a ambale nguvu yo pfumala mavoko ya lapi ro vevuka, ni Valevhi hinkwavo lava va rhwaleke Areka ni vayimbeleri na Kenaniya+ ndhuna ya vayimbeleri lava va rhwalaka;+ kambe ehenhla ka Davhida a ku ri ni efodi+ ya ntsembyana. 28  Vaisrayele hinkwavo a va tisa areka ya ntwanano wa Yehovha hi ku huwelela+ ka ku tsaka ni ku pfuma ka nanga+ ni timhalamhala+ ni swiphambati,+ va chaya swichayachayana swa switende ni tiharipa+ swi twala ngopfu. 29  Loko areka ya ntwanano+ wa Yehovha yi fika eMutini wa Davhida, Mikala,+ n’wana wa Sawulo wa nhwanyana, a hlometela ehansi a ri efasitereni kutani a vona Hosi Davhida a ri karhi a chanchula a tsakile;+ hiloko a sungula ku n’wi langutela ehansi+ embilwini yakwe.

Tinhlamuselo ta le hansi