Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Tihosi 20:1-43

20  Loko ku ri Beni-hadadi+ hosi ya Siriya, a hlengeleta mavandla yakwe hinkwawo ya nyimpi ni tihosi ta 32 ti ri na yena+ ni tihanci+ ni makalichi,+ a tlhandluka a ya rhendzela+ Samariya+ a lwa na wona.  Kutani a rhuma varhumiwa+ eka Akabu hosi ya Israyele emutini. A ku eka yena: “Beni-hadadi u te,  ‘Silivhere ya wena ni nsuku wa wena i swa mina, ni vasati va wena ni vana va wena lava langutekaka kahle swinene i va mina.’”+  Hiloko hosi ya Israyele yi hlamula yi ku: “Hi ku ya hi rito ra wena hosi yanga leyi nga mufumi, mina ndzi wa wena ni hinkwaswo leswi swi nga swa mina.”+  Endzhaku varhumiwa va vuya, va ku: “Beni-hadadi u te, ‘Ndzi rhumele rito eka wena, ndzi ku: “Silivhere ya wena ni nsuku wa wena ni vasati va wena ni vana va wena, u ta ndzi nyika vona.  Kambe hi nkarhi lowu mundzuku, ndzi ta rhuma malandza ya mina eka wena, ma fanele ma ngundzuvanya yindlu ya wena ni tindlu ta malandza ya wena; kutani hinkwaswo leswi swi navelekaka+ ematihlweni ya wena ma ta swi veka evokweni ra wona, ma fanele ma swi susa.”’”  Hiloko hosi ya Israyele yi vitana vakulukumba hinkwavo va tiko,+ yi ku: “Ndzi kombela mi lemuka naswona mi vona leswaku munhu loyi u lava khombo;+ hikuva u rhumele rito eka mina a lava vasati va mina ni vana va mina ni silivhere ya mina ni nsuku wa mina, a ndzi n’wi alelanga ha swona.”  Kutani vakulukumba hinkwavo ni vanhu hinkwavo va ku eka yena: “U nga n’wi yingisi, u nga pfumeli.”  Hiloko a byela varhumiwa va Beni-hadadi, a ku: “Byelani hosi yanga leyi nga mufumi mi ku, ‘Swilo hinkwaswo leswi u rhumeleke rito ro sungula ha swona eka nandza wa wena ndzi ta swi endla; kambe nchumu lowu a ndzi nge wu endli.’” Kutani varhumiwa va famba va vuyisa rito eka yena. 10  Hiloko Beni-hadadi a rhumela rito eka yena, a ku: “Onge swikwembu+ swi nga endla tano eka mina, onge swi nga engetela eka swona,+ loko ritshuri ra Samariya ri ta ringana ku tata mavoko ya vanhu hinkwavo lava va ndzi landzelaka!”+ 11  Hosi ya Israyele yi hlamula yi ku: “N’wina vulavulani na yena, mi ku, ‘U nga tshuki u pfumelela loyi a khamaka+ leswaku a tibuma ku fana ni loyi a ntshunxaka.’”+ 12  Kuteloko a twe rito leri, loko yena ni tihosi va ri eku nweni+ emintsongeni, hi ku hatlisa a ku eka malandza yakwe: “Lunghekani!” Hiloko va sungula ku lunghekela ku lwa ni muti wolowo. 13  Kutani waswivo, muprofeta un’wana a tshinelela Akabu hosi ya Israyele,+ a ku: “Yehovha u te,+ ‘Xana u wu vonile ntshungu lowu hinkwawo lowukulu? Waswivo, ndzi wu nyikete evokweni ra wena namuntlha, kunene u ta swi tiva leswaku hi mina Yehovha.’”+ 14  Hiloko Akabu a ku: “Xana ku ta tirhisiwa mani? yena a ku: “Yehovha u te, ‘Ku ta tirhisiwa majaha ya tihosana ta miganga leyi nga ehansi ka vulawuri bya hosi.’” Eku heteleleni a ku: “Xana i mani la nga ta sungula nyimpi?” yena a ku: “Hi wena!” 15  Kutani a sungula ku hlaya majaha ya tihosana ta miganga leyi nga ehansi ka vulawuri bya hosi, ma va 232;+ endzhaku ka wona a hlaya vanhu hinkwavo, vana hinkwavo va Israyele a va ri 7 000. 16  Va sungula ku huma ninhlikanhi loko Beni-hadadi a ri karhi a kukutlela byala+ emintsongeni, yena ni tihosi, tihosi ta 32 leti a ti n’wi pfuna. 17  Loko majaha+ ya tihosana ta miganga leyi nga ehansi ka vulawuri bya hosi ma huma ku sungula, xikan’we-kan’we Beni-hadadi a rhumela rito; va fika va n’wi byela, va ku: “Ku ni vavanuna lava va humaka eSamariya.” 18  Hiloko a ku: “Hambiloko va tele ku rhula, mi fanele mi va khoma va ha hanya; niloko va tele nyimpi, mi fanele mi va khoma va ha hanya.”+ 19  Lava hi lava a va huma emutini, majaha ya tihosana ta miganga leyi nga ehansi ka vulawuri bya hosi ni mavandla ya nyimpi lawa a ma ri endzhaku ka wona. 20  Un’wana ni un’wana a dlaya munhu wakwe; kutani Vasiriya+ va baleka,+ tiko ra Israyele ri va hlongorisa, kambe Beni-hadadi hosi ya Siriya a baleka a ri ehancini a ri ni vagadi va tihanci. 21  Kambe hosi ya Israyele yi huma, yi hambeta yi hlasela tihanci ni makalichi,+ yi dlaya Vasiriya vo tala. 22  Endzhaku muprofeta+ a tshinelela hosi ya Israyele, a ku eka yona: “Famba u ya titiyisa,+ u xiya naswona u lunghekela leswi u nga ta swi endla;+ hikuva hosi ya Siriya yi ta huma ku ta lwa na wena eku sunguleni ka lembe.”+ 23  Loko ku ri malandza ya hosi ya Siriya, ma n’wi byele ma ku: “Xikwembu xa vona i Xikwembu xa tintshava.+ Hi yona mhaka leyi va veke ni matimba ku hi tlula. Kutani hi tlhelo lerin’wana a hi lweni na vona endhawini leyi yi nga rivala, hi vona loko hi nga ta va ni matimba ku va tlula. 24  Endla leswi: Susa tihosi,+ yin’wana ni yin’wana endhawini ya yona, u veka tindhuna-nkulu ematshan’weni ya tona.+ 25  Loko ku ri wena, u fanele u tihlayela vandla ra nyimpi ri ringana ni vandla ra nyimpi leri ri weke etlhelo ka wena, hanci ni hanci ni kalichi ni kalichi; a hi lweni na vona etikweni leri ri nga rivala hi vona loko hi nga ta ka hi nga vi ni matimba ku va tlula.”+ Kutani a yingisa rito ra vona, a endla tano. 26  Eku sunguleni ka lembe Beni-hadadi a hlengeleta Vasiriya+ kutani a tlhandlukela eAfeke+ ku ya lwa na Israyele. 27  Loko ku ri vana va Israyele, va hlengeletiwile, va longisiwa+ kutani va huma ku ya hlangana na vona; vana va Israyele va famba va ya dzima mixaxa emahlweni ka vona ku fana ni mintlhambinyana yimbirhi ya timbuti, kasi loko ku ri Vasiriya a va tate misava.+ 28  Hiloko munhu wa Xikwembu xa ntiyiso+ a tshinela, a ku eka hosi ya Israyele, ina, u ye emahlweni a ku: “Yehovha u te, ‘Hikwalaho ka leswi Vasiriya va nga te: “Yehovha i Xikwembu xa tintshava, a hi Xikwembu xa timbala ta le hansi,” ndzi ta nyiketa ntshungu lowu lowukulu hinkwawo evokweni ra wena,+ kunene n’wina mi ta swi tiva leswaku hi mina Yehovha.’”+ 29  Va hambete va dzime mixaxa ku ringana masiku ya nkombo, lava va ri emahlweni ka lavaya.+ Kutani hi siku ra vunkombo nyimpi yi sungula; vana va Israyele va dlaya Vasiriya, vavanuna lava fambaka hi milenge va 100 000 hi siku rin’we. 30  Lava va seleke va balekela eAfeke,+ emutini; kutani rirhangu ri wela ehenhla ka vavanuna lava seleke va 27 000.+ Loko ku ri Beni-hadadi, u balekile,+ eku heteleleni a fika emutini, ekamareni ra le ndzeni-ndzeni.+ 31  Kutani malandza yakwe ma ku eka yena: “Waswivo, hi twe leswaku tihosi ta yindlu ya Israyele i tihosi leti nga ni musa wa rirhandzu.+ Hi kombela u hi pfumelela leswaku hi khama nguvu yo khwaxa+ emasengeni+ ni mapindza etinhlokweni, hi ya eka hosi ya Israyele. Kumbexana yi ta londzovota moya-xiviri wa wena wu hanya.”+ 32  Hiloko va tikhama nguvu yo khwaxa emasengeni ni mapindza etinhlokweni, va fika eka hosi ya Israyele, va ku: “Nandza wa wena Beni-hadadi u te, ‘Ndzi kombela u tshika moya-xiviri wa mina wu hanya.’” Kutani a ku: “Xana wa ha hanya? I makwerhu.” 33  Hiloko vavanuna+ lava va swi teka ku ri xikombiso lexinene naswona va hatlisa va swi teka ku ri xiboho xa ku rhandza kakwe, va ya emahlweni va ku: “Beni-hadadi i makwenu.” Kutani a ku: “Tanani, n’wi landzeni.” Beni-hadadi a ya eka yena; xikan’we-kan’we a n’wi khandziyisa kalichi.+ 34  Kutani Beni-hadadi a ku eka yena: “Miti+ leyi tatana a yi tekeke eka tata wa wena ndzi ta yi tlherisa; ni switarata u ta tiavela swona eDamaska hilaha tatana a nga swi ava hakona eSamariya.” “Loko ku ri mina ndzi ta ku tshika u famba hi ntwanano.”+ Hiloko a endla ntwanano na yena kutani a n’wi tshika a famba. 35  Munhu un’wana wa vana va vaprofeta+ a byela nakulobye hi rito+ ra Yehovha, a ku: “Ndzi kombela u ndzi ba.” Kambe munhu loyi a ala ku n’wi ba. 36  Hikwalaho a ku eka yena: “Hi mhaka ya leswi u nga ri yingisangiki rito ra Yehovha, waswivo, loko u suka eka mina, kunene nghala yi ta ku dlaya.” Endzhaku ka sweswo a suka etlhelo ka yena, nghala+ yi n’wi kuma, yi n’wi dlaya.+ 37  A ya emahlweni a kuma munhu un’wana, a ku: “Ndzi kombela u ndzi ba.” Kutani munhu loyi a n’wi ba, a n’wi ba a n’wi vavisa. 38  Hiloko muprofeta a famba a ya yimela hosi egondzweni, a endla leswaku vanhu va nga n’wi tivi+ hi ku tsondzela nguvu ehenhla ka mahlo. 39  Kuteloko hosi yi hundza, a huwelela hosi a ku:+ “Nandza wa wena u ye laha nyimpi yi hisaka kona; kutani waswivo, a ku ri ni munhu la nga suka laha ku lwiwaka kona, a tisa munhu eka mina, a ku, ‘Rindza munhu loyi. Loko o lahleka, moya-xiviri+ wa wena wu ta siva ndhawu ya moya-xiviri wakwe,+ loko swi nga ri tano u ta pima talenta ya silivhere.’+ 40  Kuteloko nandza wa wena a ha tirha laha ni lahaya, waswivo, yena a a fambile.” Hiloko hosi ya Israyele yi ku eka yena: “Hikwalaho vuavanyisi bya wena byi tano. Wena hi wexe u endle xiboho.”+ 41  Kutani a hatlisa a susa nguvu ehenhla ka mahlo, hosi ya Israyele yi n’wi vona leswaku a a huma eka vaprofeta.+ 42  Hiloko a ku eka yena: “Yehovha u te, ‘Hikwalaho ka leswi u n’wi tshikeke evokweni ra wena munhu loyi a nyikeriweke eka mina leswaku a lovisiwa,+ moya-xiviri wa wena wu fanele wu siva ndhawu ya moya-xiviri wa yena,+ vanhu va wena va siva ndhawu ya vanhu va yena.’”+ 43  Kutani hosi ya Israyele yi tifambela yi ya endlwini ya yona, yi fika eSamariya+ yi hlundzukile naswona yi ri ni gome.+

Tinhlamuselo ta le hansi