Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Tihosi 17:1-24

17  Kutani Eliya+ lowa le Tixibe la humaka eka vaaki va Giliyadi+ a byela Akabu a ku: “Leswi Yehovha Xikwembu xa Israyele loyi ndzi yimeke+ emahlweni ka yena a hanyaka,+ a ku nge vi na mberha kumbe mpfula+ loko ku nga ri hi xileriso xa rito ra mina!”+  Rito+ ra Yehovha ri fika eka yena, ri ku:  “Suka laha u famba, u fanele u hundzulukela etlhelo ra le vuxeni u titumbeta+ enkoveni wa Kerita lowu wu nga evuxeni bya Yordani.  Kutani u ta nwa+ enkoveni wolowo, naswona ndzi ta lerisa mawukuwuku+ leswaku ma ku nyika swakudya kwalaho.”+  Hi ku hatlisa a famba, a endla hi ku landza rito ra Yehovha,+ kutani a ya tshama enkoveni wa Kerita lowu wu nga evuxeni bya Yordani.  Mawukuwuku a ma n’wi tisela xinkwa ni nyama nimixo, ni xinkwa ni nyama nimadyambu, a hambeta a nwa mati enkoveni.+  Kambe eku heleni ka masiku yo karhi nkova wu phya,+ hikuva maboboma ya mpfula a ma nanga emisaveni.  Kutani rito ra Yehovha ri fika eka yena ri ku:+  “Suka u yima u ya eSarepta+ lowu wu nga wa Sidoni, u fanele u tshama kona. Waswivo! Kunene ndzi ta lerisa wansati, la nga noni, leswaku a ku nyika swakudya.” 10  Hiloko a suka a yima a ya eSarepta ivi a fika enyangweni ya muti; kutani waswivo, a ku ri ni wansati la nga noni, a ri karhi a rhotela tihunyi. Hikwalaho a n’wi vitana, a ku: “Ndzi kombela u ndzi kumela matinyana hi xibya leswaku ndzi nwa.”+ 11  Loko a famba a ya ma ka, a ya emahlweni a n’wi huwelela, a ku: “Ndzi kombela u ndzi kumela ni xinkwanyana+ hi voko ra wena.” 12  Hiloko a ku: “Leswi Yehovha Xikwembu xa wena a hanyaka,+ a ndzi na xona xinkwa xa xirhendzevutana,+ kambe ekhuwaneni lerikulu ndzi ni mapa lama nga tataka voko+ naswona ekhuwaneni leritsongo, ndzi ni mafurhanyana;+ sweswi ndzi rhotela tihunyinyana, ndzi fanele ndzi nghena ndzi endla swo karhi swa mina ni n’wananga, hi ta dya, kutani hi fa.”+ 13  Eliya a ku eka yena: “U nga chavi.+ Nghena, endla hi ku landza rito ra wena. Ntsena eka leswi swi nga kona, sungula hi ku ndzi endlela xinkwanyana xa xirhendzevutana,+ u fanele u xi tisa eka mina, endzhaku ka sweswo u ta endla swo karhi swa wena ni n’wana wa wena. 14  Hikuva Yehovha Xikwembu xa Israyele u te, ‘Khuwana lerikulu ra mapa a ri nge heli, ni khuwana leritsongo ra mafurha a ri nge heli ku fikela siku leri Yehovha a nga ta nyika maboboma ya mpfula evuandlalweni bya misava.’”+ 15  Hiloko a famba a ya endla hi ku landza rito ra Eliya; a ya emahlweni a dya, yena ni vandyangu wa yena swin’we na Eliya, masiku yo karhi.+ 16  Khuwana lerikulu ra mapa a ri helanga ni khuwana leritsongo ra mafurha a ri helanga,+ hi ku landza rito ra Yehovha leri a ri vuleke hi Eliya. 17  Endzhaku ka swilo leswi, n’wana wa wansati loyi, n’wini wa xisati wa yindlu leyi, a vabya, vuvabyi byakwe byi va byikulu lerova a nga ha swi koti ku hefemula.+ 18  Hiloko a ku eka Eliya: “Xana ndzi fanele ndzi endla yini ha wena,+ Wena munhu wa Xikwembu xa ntiyiso? U tile eka mina leswaku u ta ndzi tsundzuxa+ xihoxo xa mina nileswaku u dlaya n’wananga.” 19  Kambe a ku eka yena: “Ndzi nyike n’wana wa wena.” Hiloko a n’wi teka exifuveni xakwe, a n’wi rhwala a n’wi yisa ekamareni ra le henhla ka lwangu laha a a tshama kona,+ a n’wi lata esangwini rakwe.+ 20  Kutani a sungula ku vitana Yehovha, a ku: “Oho Yehovha Xikwembu xanga,+ xana u fanele u tisa swilo swo biha eka noni leyi ndzi luveleke eka yona hi ku dlaya n’wana wa yona?” 21  Hiloko a pavalala ehenhla ka n’wana+ kanharhu, a vitana Yehovha, a ku: “Oho Yehovha Xikwembu xanga, ndzi kombela u endla leswaku moya-xiviri+ wa n’wana loyi wu vuyela endzeni ka yena.” 22  Eku heteleleni Yehovha a yingisa rito+ ra Eliya lerova moya-xiviri wa n’wana wu vuyela endzeni ka yena, kutani a hanya.+ 23  Eliya a teka n’wana a n’wi rhelerisa ku suka ekamareni ra le henhla ka lwangu endlwini, a n’wi nyika mana wakwe; hiloko Eliya a ku: “Waswivo, n’wana wa wena wa hanya.”+ 24  Kutani wansati a ku eka Eliya: “Hakunene, sweswi ndza swi tiva leswaku u munhu wa Xikwembu+ ni leswaku rito ra Yehovha leri ri nga enon’wini wa wena i ntiyiso.”+

Tinhlamuselo ta le hansi