Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Tihosi 14:1-31

14  Hi nkarhi wolowo Abiya n’wana wa Yerobuwamu a vabya.+  Kutani Yerobuwamu a ku eka nsati wakwe: “Ndzi kombela u suka u yima u endla leswaku va nga ku lemuki,+ va nga swi tivi leswaku u nsati wa Yerobuwamu, u fanele u ya eXilo. Waswivo! Hi laha Ahiya+ lowa muprofeta a nga kona. Hi yena la vulavuleke ha mina leswaku ndzi va hosi ya vanhu lava.+  U fanele u khoma swinkwa swa khume+ hi voko ra wena ni swimbundzwa leswi n’wan’waseriweke swin’we ni gula+ ra vulombe, u nghena eka yena.+ Kunene hi yena la nga ta ku byela leswi nga ta endleka eka mufana loyi.”+  Nsati wa Yerobuwamu a endla tano. Kutani a suka a yima a ya eXilo+ ivi a fika endlwini ya Ahiya. Ahiya a a nga voni, hikuva mahlo yakwe a ma ri ni riphume hikwalaho ka malembe yakwe.+  Yehovha a byela Ahiya a ku: “Nsati wa Yerobuwamu wa ta leswaku a ta vutisa rito eka wena malunghana ni n’wana wakwe; hikuva wa vabya. U ta vulavula na yena hi ndlela leyi ni leyi. Hi ku hatlisa loko a fika, u ta tiendla la nga xiyekiki.”+  Hi ku hatlisa loko Ahiya a twa swigingi swa milenge yakwe loko a nghena enyangweni, a ku: “Nghena wena nsati wa Yerobuwamu.+ Ha yini u tiendla la nga xiyekiki kasi mina ndzi rhumiwe eka wena hi rungula ro tika swinene?  Famba u ya byela Yerobuwamu, u ku, ‘Yehovha Xikwembu xa Israyele u te: “Hikwalaho ka leswi ndzi ku yimiseke exikarhi ka varikwenu leswaku ndzi ku endla murhangeri wa vanhu va mina, ku nga Israyele,+  ndzi ye emahlweni ndzi susa+ mfumo endlwini ya Davhida ndzi ku nyika wona, kambe wena a wu fananga ni nandza wa mina Davhida, loyi a hlayiseke swileriso swa mina ni loyi a fambeke endzhaku ka mina hi mbilu yakwe hinkwayo hi ku endla ntsena leswi a swi lulamile ematihlweni ya mina,+  kambe wena u sungule ku endla swo biha ku tlula hinkwavo lava a va ri kona emahlweni ka wena, u fambe u ya tiendlela xikwembu+ xin’wana ni swifaniso+ leswi endliweke hi ku n’okisiwa leswaku u ndzi hlundzukisa,+ hi mina loyi u n’wi hoxeke enhlaneni wa wena;+ 10  hikwalaho ka sweswo ndzi tisa khombo ehenhla ka yindlu ya Yerobuwamu, kunene eka Yerobuwamu ndzi ta susa un’wana ni un’wana la humeselaka mati ekhumbini,+ loyi a nga sirhelelekangiki ni loyi a nga pfuniki nchumu eIsrayele;+ hakunene ndzi ta kukula ku basa endzhaku ka yindlu ya Yerobuwamu,+ hilaha munhu a susaka vulongo hakona ku fikela loko byi lahliwa.+ 11  Loyi a faka a ri wa Yerobuwamu emutini, timbyana ti ta n’wi dya;+ loyi a felaka enhoveni, tinyenyana ta matilo ti ta n’wi dya,+ hikuva Yehovha hi byakwe u swi vurile.”’ 12  “Kutani wena suka u yima u ya endlwini ya wena. Loko milenge ya wena yi fika emutini, hakunene n’wana u ta fa. 13  Kunene tiko hinkwaro ra Israyele ri ta n’wi rilela+ naswona ri ta n’wi lahla, hikuva loyi wa Yerobuwamu a ri yexe u ta fika exilahlweni; hikwalaho ka leswi Yehovha Xikwembu xa Israyele a kumeke leswinene eka yena endlwini ya Yerobuwamu.+ 14  Kunene Yehovha u ta tiyimisela hosi+ ya Israyele leyi nga ta tsema yindlu ya Yerobuwamu hi siku leri vuriweke, xana ku ta endleka yini loko ko va sweswi?+ 15  Hakunene Yehovha u ta dlaya Israyele hilaha rihlanga ri tsekatsekaka hakona ematini;+ kunene u ta simula+ Israyele emisaveni leyi leyinene,+ leyi a yi nyikeke vatata wa vona, kunene u ta va hangalasela+ entsungeni wa Nambu,+ hikwalaho ka leswi va endleke timhandzi ta vona to kwetsima,+ kutani va hlundzukisa+ Yehovha. 16  U ta nyiketa+ Israyele hikwalaho ka swidyoho swa Yerobuwamu leswi a swi endleke, ni leswi a dyohiseke+ Israyele ha swona.” 17  Hiloko nsati wa Yerobuwamu a suka a tifambela a fika eTirisa.+ Loko a fika enyangweni ya yindlu, mufana a fa. 18  Kutani va n’wi lahla, tiko hinkwaro ra Israyele ri n’wi rilela, hi ku landza rito ra Yehovha leri a ri vuleke hi nandza wakwe Ahiya lowa muprofeta. 19  Timhaka letin’wana ta Yerobuwamu, ndlela leyi a lweke+ ha yona ni ndlela leyi a fumeke ha yona, ti tsariwe ebukwini+ ya timhaka ta masiku ya tihosi ta Israyele. 20  Masiku lawa Yerobuwamu a fumeke ha wona a ku ri malembe ya 22, endzhaku ka sweswo a etlela ni vatata wakwe;+ kutani Nadabu+ n’wana wakwe a sungula ku fuma ematshan’weni ya yena. 21  Loko ku ri Rehobuwama+ n’wana wa Solomoni, a va hosi eYuda. Rehobuwama a a ri ni malembe ya 41 hi vukhale loko a sungula ku fuma, naswona u fume malembe ya 17 eYerusalema, muti+ lowu Yehovha a wu hlawuleke eka tinyimba+ hinkwato ta Israyele leswaku a veka vito rakwe kona.+ Vito ra mana wakwe a ku ri Nayama lowa Muamone.+ 22  Yuda ri ya emahlweni ri endla swo biha ematihlweni ya Yehovha+ lerova va n’wi hlohlotela+ leswaku a va ni rilaveta lerikulu ku tlula leri a a ri na rona hi leswi vatata wa vona va swi endleke hi swidyoho+ swa vona. 23  Na vona va tiakele tindhawu leti tlakukeke+ ni tinsika to kwetsima+ ni timhandzi to kwetsima+ ehenhla ka xitsunga xin’wana ni xin’wana+ lexi tlakukeke ni le hansi ka murhi wun’wana ni wun’wana lowukulu.+ 24  Hambi ku ri tinghwavava ta xinuna ta le tempeleni a ti ri kona etikweni.+ Va endle hi ku landza swilo hinkwaswo swo nyenyetsa swa matiko lawa Yehovha a ma hlongoleke emahlweni ka vana va Israyele.+ 25  Hi lembe ra vuntlhanu ra Hosi Rehobuwama, Xixaka+ lowa hosi ya Egipta a fika a ta hlasela Yerusalema. 26  Kutani a teka xuma xa yindlu ya Yehovha ni xuma xa yindlu ya hosi;+ a teka hinkwaswo.+ A ya emahlweni a teka switlhangu hinkwaswo swa nsuku leswi Solomoni a swi endleke.+ 27  Kutani Hosi Rehobuwama a endla switlhangu swa koporo ematshan’weni ya swona, a swi nyiketa leswaku swi lawuriwa hi tindhuna ta lava va tsutsumaka,+ varindzi va nyangwa ya yindlu ya hosi.+ 28  Minkarhi hinkwayo loko hosi yi nghena endlwini ya Yehovha, lava va tsutsumaka a va swi rhwala, va swi tlherisela endlwini yo rindza eka yona ya lava va tsutsumaka.+ 29  Timhaka letin’wana ta Rehobuwama ni hinkwaswo leswi a swi endleke, xana a swi tsariwanga ebukwini+ ya timhaka ta minkarhi ya tihosi ta Yuda? 30  Nkarhi hinkwawo, nyimpi yi va kona exikarhi ka Rehobuwama na Yerobuwamu.+ 31  Eku heteleleni Rehobuwama a etlela ni vatata wakwe kutani a lahliwa ni vatata wakwe eMutini wa Davhida.+ Vito ra mana wakwe a ku ri Nayama lowa Muamone.+ Abiyamu+ n’wana wakwe a sungula ku fuma ematshan’weni ya yena.

Tinhlamuselo ta le hansi