Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Tihosi 10:1-29

10  Kutani hosi ya xisati ya le Xeba+ yi twa xiviko xa Solomoni malunghana ni vito ra Yehovha.+ Hiloko yi fika yi ta n’wi ringa hi swivutiso leswi rharhanganeke.+  Eku heteleleni yi fika eYerusalema yi ri ni nxaxamelo lowukulu ngopfu,+ tikamela+ leti rhwaleke mafurha ya balsama+ ni nsuku wo tala swinene ni maribye ya risima; kutani yi fika eka Solomoni yi sungula ku n’wi byela hinkwaswo leswi a swi ri embilwini ya yona.+  Solomoni na yena a yi byela timhaka ta yona hinkwato.+ A ku vanga ni mhaka leyi a yi tumberile eka hosi leyi a nga yi byelangiki yona.+  Loko hosi ya xisati ya le Xeba yi vona vutlhari hinkwabyo bya Solomoni+ ni yindlu leyi a a yi akile,+  ni swakudya swa tafula+ rakwe ni ndlela leyi malandza yakwe a ma tshama ha yona ni ntirho wa le tafuleni wa vaphameri vakwe, tinguvu ta vona ni swakunwa+ swakwe ni switlhavelo swakwe swo hisiwa leswi a a swi humesela yindlu ya Yehovha nkarhi ni nkarhi, a ka ha vanga na moya eka yona.+  Hiloko yi ku eka hosi: “Rito leri ndzi ri tweke etikweni ra mina malunghana ni timhaka ta wena ni vutlhari+ bya wena i ntiyiso.  A ndzi vanga na ripfumelo emaritweni lawa ku fikela loko ndzi tile leswaku mahlo ya mina ma tivonela; kutani waswivo, a ndzi nga byeriwanga xiphemu xa wona.+ U swi tlula ekule hi vutlhari ni hi ku kateka swilo leswi swi twiweke leswi ndzi swi yingiseke.+  Ku tsaka vavanuna va wena;+ ku tsaka+ malandza lawa ya wena, lawa ma yimaka emahlweni ka wena nkarhi hinkwawo, ma yingisele vutlhari bya wena!+  Onge Yehovha Xikwembu xa wena a nga dzunisiwa,+ loyi a ku tsakeleke+ hi ku ku veka exiluvelweni xa Israyele;+ hikuva Yehovha u rhandza Israyele hilaha ku nga riki na makumu+ lerova u veke wena u va hosi+ leswaku u humesa xiboho xa vuavanyisi+ ni ku lulama.”+ 10  Hiloko yi nyika+ hosi titalenta ta nsuku ta 120+ ni mafurha ya balsama+ yo tala ngopfu ni maribye ya risima. A ka ha tlhelanga ku va ni mafurha ya balsama yo tala ku fana ni lawa hosi ya xisati ya Xeba yi ma nyikeke Hosi Solomoni. 11  Kutani ntlawa wa swikepe+ swa Hiramu leswi swi rhwaleke nsuku ku suka eOfiri+ swi tlhele swi tisa timhandzi to tala ngopfu ta mirhi ya algama+ ni maribye ya risima+ ku suka eOfiri. 12  Hiloko hosi yi tirhisa timhandzi ta murhi wa algama ku endla swiseketelo swa yindlu ya Yehovha+ ni swa yindlu ya hosi, swin’we ni tiharipa+ ni switende+ swa vayimbeleri. Timhandzi ta mirhi ya algama to fana ni leti a ti tlhelanga ti va kona kumbe ti voniwa ku ta fikela esikwini leri. 13  Hosi Solomoni a nyika hosi ya xisati ya le Xeba hinkwaswo leswi swi yi tsakisaka leswi yi swi kombeleke, handle ka leswi a yi nyikeke swona hi ku landza ku hanana+ ka Hosi Solomoni. Endzhaku ka sweswo yona yi hundzuluka yi ya etikweni ra rikwavo, yona ni malandza ya yona.+ 14  Ntiko wa nsuku+ lowu a wu fika eka Solomoni hi lembe rin’we a wu endla titalenta ta nsuku ta 666,+ 15  ku nga hlayiwi leswi a swi tisiwa hi vavanuna lava va endzaka ni vabindzuri ni tihosi+ hinkwato ta Vaarabiya+ ni tindhuna-nkulu ta tiko. 16  Hosi Solomoni a ya emahlweni a endla switlhangu leswikulu swa nsuku lowu pfa-nganisiweke swa 200+ (a nameka tixikele ta 600 ta nsuku ehenhla ka xitlhangu xin’wana ni xin’wana),+ 17  ni switlhangu leswitsongo swa nsuku lowu pfanganisiweke swa 300, (a nameka timayina tinharhu ta nsuku ehenhla ka xitlhangu xin’wana ni xin’wana lexitsongo).+ Hiloko hosi yi swi veka eNdlwini ya Khwati ra le Lebanoni.+ 18  Ku tlula kwalaho, hosi yi endla xiluvelo+ lexikulu hi timhondzo ta tindlopfu+ yi xi nameka nsuku lowu tengisiweke.+ 19  A ku ri ni swikhandziyo swa tsevu leswi yaka exiluvelweni, xiluvelo a xi ri ni xiangamelo xa xirhendzevutana endzhaku ka xona, naswona a ku ri ni swo tshega mavoko eka tlhelo leri ni le ka tlhelo lerin’wana ra ndhawu yo tshama eka yona, kutani tinghala timbirhi+ a ti yime etlhelo ka swo tshega mavoko.+ 20  A ku ri ni tinghala ta 12 leti yimeke kwalaho ehenhla ka swikhandziyo swa tsevu, eka tlhelo leri ni le ka tlhelo lerin’wana. A ku na mfumo wun’wana lowu a wu ri ni leti a ti endliwe ku fana na tona.+ 21  Swibya hinkwaswo swo nwela eka swona swa Hosi Solomoni a swi ri swa nsuku, ni swibya hinkwaswo swa Yindlu ya Khwati ra le Lebanoni+ a swi ri swa nsuku wo tenga.+ A ku nga ri na nchumu lowu a wu ri wa silivhere; emasikwini ya Solomoni a wu tekiwa wu nga ri nchumu nikatsongo. 22  Hosi a yi ri ni ntlawa wa swikepe swa Taraxixi+ elwandle swin’we ni ntlawa wa swikepe wa Hiramu. Ntlawa wa swikepe swa le Tarixixi a wu ta kan’we endzhaku ka malembe man’wana ni man’wana manharhu, wu rhwele nsuku+ ni silivhere, timhondzo ta tindlopfu+ ni tinkawu ni tiphikoko. 23  Hikwalaho Hosi Solomoni a a ri lonkulu hi rifuwo+ ni hi vutlhari+ ku tlula tihosi letin’wana hinkwato ta misava. 24  Vanhu hinkwavo va misava a va lava xikandza xa Solomoni leswaku va twa vutlhari byakwe lebyi Xikwembu xi byi vekeke embilwini yakwe.+ 25  Un’wana ni un’wana a a tisa nyiko yakwe,+ swilo swa silivhere+ ni swilo swa nsuku ni tinguvu ni swihlomo swa nyimpi+ ni mafurha ya balsama, tihanci ni timeyila,+ ku ri mhaka ya lembe ni lembe.+ 26  Solomoni a hambeta a hlengeleta makalichi lama engetelekeke ni tihanci; kutani a va ni makalichi ya 1 400 ni tihanci ta 12 000,+ a swi yimisa emitini ya makalichi ni le kusuhi ni hosi eYerusalema.+ 27  Hiloko hosi yi endla silivhere eYerusalema yi fana ni maribye,+ timhandzi ta mukedari a ti endla ti fana ni swinkuwana leswi nga eXefela hi vunyingi.+ 28  A ku ri ni tihanci leti Solomoni a a ri na tona ti huma aEgipta, ti xavisiwa ematikweni mambe, naswona ntlawa wa vabindzuri va hosi a wu teka ntlhambi wa tihanci hi nxavo.+ 29  Kutani hi ntolovelo kalichi a yi ta yi huma aEgipta, yi xavisiwa hi swiphemu swa silivhere swa 600, naswona hanci a yi xavisiwa hi swiphemu swa 150; hi yona ndlela leyi a swi ri ha yona eka tihosi hinkwato ta Vaheti+ ni tihosi ta Siriya. A va xavisa ha tona ematikweni mambe.

Tinhlamuselo ta le hansi