Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Samuwele 4:1-22

4  Rito ra Samuwele ri ya emahlweni ri fika etikweni hinkwaro ra Israyele. Kutani tiko ra Israyele ri huma ku ya hlangana ni Vafilisita enyimpini; rona ri dzima mixaxa etlhelo ka Ebenezere,+ Vafilisita va dzima mixaxa eAfeke.+  Vafilisita va fola va hlomele+ ku ta hlangana na Israyele, kutani nyimpi a yi fambanga kahle lerova Israyele a hluriwa emahlweni ka Vafilisita,+ lava va nga dlaya vavanuna va 4 000 enxaxamelweni wa nyimpi lowu hlanganeke enhoveni.  Loko vanhu va fika enxaxeni, vakulukumba va Israyele va ku: “Ha yini Yehovha a hi hlurile emahlweni ka Vafilisita namuntlha?+ A hi tekeni areka ya ntwanano wa Yehovha yi suka eXilo,+ leswaku yi va exikarhi ka hina, yi hi ponisa exandleni xa valala va hina.”  Kutani vanhu va rhumela rito eXilo, va rhwala areka ya ntwanano wa Yehovha wa mavuthu la tshamaka ehenhla ka makerubu,+ yi suka kwalaho. Vana vambirhi va Eli a va ri kwalaho ni areka ya ntwanano wa Xikwembu xa ntiyiso, ku nga, Hofini na Finiyasi.+  Hi ku hatlisa loko areka ya ntwanano wa Yehovha yi fika enxaxeni, Vaisrayele hinkwavo va sungula ku huwelela lokukulu,+ lerova ku va ni hasahasa emisaveni.  Vafilisita na vona va twa mpfumawulo wa ku huwelela, kutani va ku: “Xana mpfumawulo wa ku huwelela+ loku lokukulu enxaxeni wa Vaheveru i wa yini?” Eku heteleleni va twa leswaku areka ya Yehovha yi tisiwe enxaxeni.  Vafilisita va chava, hikuva va te: “Xikwembu xi te enxaxeni!”+ Kutani va ku: “Khombo eka hina, hikuva nchumu wo fana ni lowu a wu si tshama wu humelela!  Khombo eka hina! I mani la nga ta hi ponisa evokweni ra Xikwembu lexi lexikulu? Lexi i Xikwembu lexi nga ba Egipta hi ku dlaya ka muxaka wun’wana ni wun’wana emananga.+  N’wina Vafilista, vanani ni xivindzi, tikombiseni mi ri vavanuna, leswaku mi nga tshuki mi tirhela Vaheveru hilaha va mi tirheleke hakona;+ mi fanele mi tikombisa mi ri vavanuna, mi lwa!” 10  Hikwalaho Vafilisita va lwa, tiko ra Israyele ri hluriwa,+ kutani un’wana ni un’wana a balekela entsongeni wakwe;+ ku dlaya ku va lokukulu,+ lerova eIsrayele ku dlayiwa vavanuna va 30 000 lava fambaka hi milenge.+ 11  Areka ya Xikwembu yi tekiwile,+ kutani vana vambirhi va Eli, Hofini na Finiyasi va fa.+ 12  Hiloko munhu wa Benjamini a tsutsuma a suka enxaxamelweni wa nyimpi a ya fika eXilo esikwini rero, tinguvu takwe ti handzuke hi le xikarhi+ naswona a ri ni ritshuri enhlokweni.+ 13  Loko a fika, Eli a a tshame exitshan’weni etlhelo ka gondzo, a langutile, hikuva mbilu yakwe a yi rhurhumela hikwalaho ka areka ya Xikwembu xa ntiyiso.+ Hiloko munhu loyi a nghena emutini a vika, kutani muti hinkwawo wu sungula ku huwelela. 14  Eli a twa mpfumawulo wa xirilo. Kutani a ku: “Xana mpfumawulo wa ku pfilunganyeka loku i wa yini?”+ Munhu loyi a hatlisa leswaku a ta nghena a vikela Eli. 15  (Eli a a ri ni malembe ya 98 hi vukhale, mahlo yakwe a ma phumerile lerova a a nga ha swi koti ku vona.)+ 16  Munhu loyi a byela Eli a ku: “Hi mina loyi a humaka enxaxamelweni wa nyimpi, mina—ndzi baleke enyimpini namuntlha.” Hiloko yena a ku: “N’wananga, ku endleke yini?” 17  Kutani la tisaka mahungu a n’wi hlamula a ku: “Israyele u balekile emahlweni ka Vafilisita, nakambe vanhu va hluriwile swinene;+ naswona vana va wena vambirhi va file—Hofini na Finiyasi+—areka ya Xikwembu xa ntiyiso yi tekiwile.”+ 18  Kuteloko a boxa areka ya Xikwembu xa ntiyiso, yena a wa hi xikosi exitshan’weni etlhelo ka nyangwa, nhamu yakwe yi tshoveka lerova a fa, hikuva wanuna loyi a a dyuhele naswona a a nyuherile swinene; yena u avanyise Israyele malembe ya 40. 19  Nhlomi yakwe, nsati wa Finiyasi a a tikile, a ri ekusuhi ni ku veleka, kutani a twa xiviko xa leswaku areka ya Xikwembu xa ntiyiso yi tekiwile nileswaku mukon’wana wakwe ni nuna wakwe va file. Hiloko a korhama a sungula ku veleka, hikuva switlhavi swakwe swi n’wi tele a nga swi rindzelanga.+ 20  Hi nkarhi wa ku fa ka yena, vavasati lava a va yime ekusuhi na yena, va vulavula va ku: “U nga chavi, hikuva u tswale n’wana wa jaha.”+ Kambe a nga hlamulanga naswona a nga yi vekanga mbilu yakwe eka swona. 21  Kambe a thya mufana a ku i Ikhabodi,+ a vula a ku: “Ku vangama ku fambile eIsrayele ku ye evukhumbini,”+ leswi u swi vule malunghana ni ku tekiwa ka areka ya Xikwembu xa ntiyiso ni mukon’wana wakwe ni nuna wakwe.+ 22  Hiloko a ku: “Ku vangama ku fambile eIsrayele ku ye evukhumbini,+ hikuva areka ya Xikwembu xa ntiyiso yi tekiwile.”+

Tinhlamuselo ta le hansi