Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Samuwele 24:1-22

24  Hi ku hatlisa loko Sawulo a vuyile eku hlongoriseni ka Vafilisita,+ va ta va n’wi vikela, va ku: “Waswivo! Davhida u le mananga ya Eni-gedi.”+  Sawulo a teka vavanuna va 3 000 lava hlawuriweke+ etikweni hinkwaro ra Israyele, va ya lava Davhida+ ni vavanuna vakwe ehenhla ka maribye lama nga erivaleni, ya tinhongo ta le tintshaveni.+  Hi ku famba ka nkarhi a fika ematshangeni ya tinyimpfu lama endliweke hi maribye etlhelo ka gondzo, laha a ku ri ni bako. Kutani Sawulo a nghena a ya tipfuna+ kasi Davhida ni vavanuna vakwe a va ri endzeni ka bako+ endzhaku-ndzhaku, va tshame ehansi.  Vavanuna va Davhida va ku eka yena: “Hi leri siku leri Yehovha a ku byelaka ha rona a ku, ‘Waswivo, ndzi nyiketa nala wa wena evokweni ra wena,+ u fanele u n’wi endla hilaha swi vonakaka swi ri swinene hakona ematihlweni ya wena.’”+ Hiloko Davhida a suka a yima, a nyandlamela a tsema dziva ra nguvu yo pfumala mavoko ya Sawulo.  Kambe endzhaku ka sweswo mbilu ya Davhida yi tshamela ku n’wi ba+ hikwalaho ka leswi a tsemeke dziva ra nguvu yo pfumala mavoko ya Sawulo.  Hikwalaho a byela vavanuna vakwe a ku: “A hi swinene eka mina, hi ku ya hi langutelo ra Yehovha leswaku ndzi endla nchumu lowu eka hosi yanga, mutotiwa+ wa Yehovha, hi ku tshambuluta voko ku lwa na yena, hikuva i mutotiwa wa Yehovha.”+  Kutani Davhida a hangalasa vavanuna vakwe hi marito lawa, a nga va pfumelelanga leswaku  va pfukela Sawulo.+ Loko ku ri Sawulo, a huma ebakweni a ya emahlweni ni ndlela yakwe.  Kutani Davhida a suka a yima endzhaku ka sweswo a huma ebakweni, a huwelela Sawulo a ri endzhaku ka yena, a ku: “Hosi+ yanga leyi nga mufumi!” Hiloko Sawulo a languta endzhaku, Davhida a korhama, xikandza xakwe xi langute emisaveni,+ a tiwisela ehansi.  Davhida a ya emahlweni a ku eka Sawulo: “Ha yini u yingisa marito ya munhu,+ lama nge, ‘Waswivo! Davhida u lava ku ku vavisa’? 10  Sweswi esikwini leri, mahlo ya wena ma vone ndlela leyi Yehovha a ku nyiketeke ha yona namuntlha evokweni ra mina ebakweni; un’wana u vule leswaku u dlayiwa,+  kambe ndzi ve ni nsovo eka wena ndzi ku, ‘A ndzi nge pfuki ndzi tshambulute voko ra mina ndzi lwa ni hosi yanga, hikuva i mutotiwa+ wa Yehovha.’ 11  Tatana,+ vona, ina, vona dziva ra nguvu ya wena yo pfumala mavoko evokweni ra mina, hikuva loko ndzi tsema dziva ra nguvu ya wena yo pfumala mavoko a ndzi ku dlayanga. Swi tive u tlhela u vona leswaku a ku na vubihi+ kumbe xiendlo xa ku pfukela evokweni ra mina, a ndzi ku dyohelanga kasi wena u ndzi tumbelerile leswaku u susa moya-xiviri wa mina.+ 12  Onge Yehovha a nga avanyisa exikarhi ka mina na wena;+ Yehovha u fanele a ndzi rihisela+ eka wena, kambe voko ra mina a ri nge ti ehenhla ka wena.+ 13  Hilaha xivuriso xa khale xi nge, ‘Ku homboloka ku ta huma eka lavo homboloka,’+ kambe voko ra mina a ri nge ti ehenhla ka wena. 14  Xana hosi ya Israyele yi hume yi hlongorisa mani? Xana u hlongorisa mani? Xana u hlongorisa mbyana leyi feke?+ Xana u hlongorisa dzedze rin’we?+ 15  Yehovha u fanele a va muavanyisi, u fanele a avanyisa exikarhi ka mina na wena, u ta swi vona naswona u ta ndzi kambisisela nandzu+ a ndzi avanyisa leswaku a ndzi ntshunxa evokweni ra wena.” 16  Kuteloko Davhida a hete ku vula marito lawa eka Sawulo, Sawulo a ku: “Xana i rito ra wena n’wananga Davhida?”+ Kutani Sawulo a tlakusa rito rakwe a rila.+ 17  A ya emahlweni a ku eka Davhida: “U lulame ku ndzi tlula,+ hikuva hi wena la ndzi endleke leswinene,+ mina ndzi ku endle swo biha. 18  Wena—namuntlha u vule leswinene leswi u ndzi endleleke swona hi ku va Yehovha a a ndzi nyikete evokweni+ ra wena kambe a wu ndzi dlayanga. 19  Loko munhu a kuma nala wakwe, xana a nga n’wi tshika a famba hi gondzo lerinene?+ Kutani Yehovha u ta ku hakela hi leswinene+ hikwalaho ka leswi u swi endleke eka mina esikwini leri. 20  Sweswi waswivo, ndzi swi tiva kahle leswaku hakunene u ta va hosi,+ nileswaku mfumo wa Israyele wu ta tshama wu ri kona hakunene evokweni ra wena. 21  Sweswi, ndzi hlambanyele hi Yehovha+ leswaku u nge yi susi mbewu ya mina endzhaku ka mina nileswaku u nge ri lovisi vito ra mina endlwini ya tatana.”+ 22  Kutani Davhida a hlambanyela Sawulo, endzhaku ka sweswo Sawulo a muka.+ Loko ku ri Davhida ni vavanuna vakwe, va tlhandlukele endhawini leyi swi tikaka ku yi tshinelela.+

Tinhlamuselo ta le hansi