Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Samuwele 22:1-23

22  Kutani Davhida a famba a suka kwalaho,+ a balekela+ ebakweni+ ra Adulamu;+ vamakwavo ni yindlu hinkwayo ya tata wakwe va swi twa, hiloko va rhelela kwalaho eka yena.  Vavanuna hinkwavo lava nga ni maxangu+ ni vavanuna hinkwavo lava a va londziwa+ ni hinkwavo lava a va vavisekile eka mimoya-xiviri+ ya vona, va sungula ku hlengeletana eka yena,+ a va murhangeri wa vona;+ a va ni vavanuna va 400.  Endzhaku Davhida a suka kwalaho a ya le Mizpe eMowabu, a byela hosi ya Mowabu a ku:+ “Ndzi kombela u pfumelela tatana na manana+ va tshama na n’wina kukondza ndzi tiva leswi Xikwembu xi nga ta swi endla eka mina.”  Hikwalaho a va tshamisa emahlweni ka hosi ya Mowabu, va hambeta va tshama na yona masiku hinkwawo lawa Davhida a a ri endhawini leyi nga nghenekiki.+  Hi ku famba ka nkarhi Gadi+ lowa muprofeta a byela Davhida a ku: “A wu fanelanga u ya emahlweni u tshama endhawini leyi nga nghenekiki. Famba, u ya nghena etikweni ra Yuda.”+ Hikwalaho Davhida a famba a ya nghena ekhwatini ra Hereta.  Kutani Sawulo a twa leswaku Davhida ni vavanuna lava a va ri na yena va kumiwile, hi nkarhi lowu Sawulo a a tshame eGibiya ehansi ka murhi wa mutamarisiki+ endhawini leyi tlakukeke, a tamele fumu+ naswona malandza yakwe hinkwawo ma yime ekusuhi na yena.  Hiloko Sawulo a byela malandza yakwe lama yimeke ekusuhi na yena a ku: “Ndzi kombela mi yingisa n’wina va ka Benjamini. Xana n’wana wa Yese+ u ta mi nyika hinkwenu masimu ni masimu ya vhinya?+ Xana u ta mi veka hinkwenu mi va varhangeri ehenhla ka vanhu va magidi+ ni varhangeri ehenhla ka vanhu va madzana?  Hikuva hinkwenu mi endle xikhiri xo lwa na mina; a nga kona ni un’we la paluxeleke ndleve+ ya mina loko n’wananga a endla ntwanano+ ni n’wana wa Yese, naswona a nga kona ni un’we la tshandzaka na mina a paluxela ndleve ya mina leswaku n’wananga u yimise nandza wa mina ku lwa na mina ku fana ni mutumbeleri la nga ta hlasela, hi ndlela leyi swi nga xiswona esikwini leri.”  Hiloko Dowege+ lowa Muedomu, tanihi leswi a a vekiwe leswaku a lawula malandza ya Sawulo, a hlamula a ku: “Ndzi vone n’wana wa Yese a nghena eNobo eka Ahimeleke+ n’wana wa Ahithuba.+ 10  A n’wi vutisela+ eka Yehovha; u n’wi nyike swakudya+ naswona u n’wi nyike banga+ ra Goliyadi lowa Mufilisita.” 11  Xikan’we-kan’we hosi yi rhumela rito leswaku ku ya vitaniwa Ahimeleke n’wana wa Ahithuba lowa muprista ni yindlu hinkwayo ya tata wakwe, vaprista lava a va ri eNobo.+ Kutani hinkwavo va ta eka hosi. 12  Sawulo a ku: “Ndzi kombela u yingisa wena n’wana wa Ahithuba,” hiloko yena a ku: “Hi mina loyi, hosi yanga.” 13  Sawulo a ya emahlweni a ku eka yena: “Ha yini n’wina mi endle xikhiri xo lwa na mina,+ wena ni n’wana wa Yese, hi ku va u n’wi nyike xinkwa ni banga, naswona ku vutisiwe Xikwembu hikwalaho ka yena leswaku ndzi pfukeriwa ku fana ni mutumbeleri la nga ta hlasela, hi ndlela leyi swi nga xiswona esikwini leri?”+ 14  Hiloko Ahimeleke a hlamula hosi a ku: “Xana i mani exikarhi ka malandza ya wena hinkwawo la fanaka na Davhida,+ la tshembekaka+ ni la nga mukon’wana+ wa hosi ni murhangeri wa murindzi wa wena ni la xiximiwaka endlwini ya wena?+ 15  Xana ndzi sungule namuntlha ku vutisisa+ Xikwembu hikwalaho ka yena? A hi swinene eka mina! Hosi yi nga veki nchumu ku lwa ni nandza wa yona ni ku lwa ni yindlu hinkwayo ya tatana, hikuva eka hinkwaswo leswi nandza wa wena a nga tivanga nchumu lowutsongo kumbe lowukulu.”+ 16  Kambe hosi yi ku: “Ahimeleke u ta fa hakunene,+ wena ni yindlu ya tata wa wena hinkwayo.”+ 17  Hiloko hosi yi byela lava tsutsumaka,+ lava a va yime ekusuhi na yona yi ku: “Hundzulukani mi dlaya vaprista va Yehovha, hikwalaho ka leswi voko ra vona ri yimaka na Davhida ni hikwalaho ka leswi a a ri mubaleki kambe a va swi paluxanga endleveni ya mina!”+ Kutani malandza ya hosi a ma swi lavanga ku tshambuluta voko ra wona ma hlasela vaprista va Yehovha.+ 18  Eku heteleleni hosi yi byela Dowege yi ku:+ “Wena, hundzuluka u hlasela vaprista!” Hi ku hatlisa Dowege lowa Muedomu+ a hundzuluka a hlasela vaprista a va dlaya+ esikwini rero, vavanuna va 85 lava tameleke efodi+ ya ntsembyana. 19  Ni muti wa vaprista wa Nobo,+ u wu hlasele hi banga, wanuna swin’we ni wansati, n’wana swin’we ni n’wana la an’waka ni nkunzi ni mbhongolo ni nyimpfu, u swi hlasele hi banga. 20  Hambiswiritano, n’wana un’we wa Ahimeleke n’wana wa Ahithuba, loyi vito rakwe a ku ri Abiyatara+ a baleka a landzela Davhida. 21  Kutani Abiyatara a byela Davhida a ku: “Sawulo u dlaye vaprista va Yehovha.” 22  Hiloko Davhida a ku eka Abiyatara: “Ndzi swi tive kahle esikwini leriya,+ hikuva Dowege lowa Muedomu a a ri kwalaho, leswaku hakunene a a ta byela Sawulo.+ Mina hi ndzexe ndzi wu hoxerile moya-xiviri wun’wana ni wun’wana wa yindlu ya tata wa wena. 23  Tshama na mina. U nga chavi, hikuva un’wana ni un’wana la lavaka moya-xiviri wa mina u lava moya-xiviri wa wena, hikuva hi wena la lavaka nsirhelelo wa mina.”+

Tinhlamuselo ta le hansi