Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Bibele Eka Web Site Leyi

VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Samuwele 16:1-23

16  Eku heteleleni Yehovha a vutisa Samuwele a ku: “Xana u ta rilela Sawulo+ ku fikela rini, loko mina hi tlhelo lerin’wana ndzi n’wi bakanyile leswaku a nga vi hosi ya Israyele?+ Tata rimhondzo ra wena hi mafurha+ u famba. Ndzi ta ku rhuma eka Yese+ lowa le Betlehema, hikuva ndzi tihlawulele hosi exikarhi ka vana vakwe.”+  Kambe Samuwele a ku: “Xana ndzi ta fambisa ku yini? Xikan’we-kan’we loko Sawulo a swi twa, kunene u ta ndzi dlaya.”+ Yehovha a ya emahlweni a ku: “U fanele u teka xihon’wana xa ntlhambi u famba na xona, u ku, ‘Ndzi tele ku ta endlela Yehovha xitlhavelo.’+  U fanele u vitanela Yese exitlhavelweni; kutani loko ku ri mina, ndzi ta ku tivisa leswi u faneleke u swi endla,+ u fanele u ndzi totela+ loyi ndzi nga ta ku komba yena.”  Samuwele a endla leswi Yehovha a swi vuleke. Loko a fika eBetlehema,+ vakulukumba va muti va sungula ku rhurhumela+ loko va hlangana na yena, kutani va ku: “Xana ku ta ka wena ku vula ku rhula?”+  Hiloko a ku: “Ku vula ku rhula. Ndzi tele ku ta endlela Yehovha xitlhavelo. Tihlawulekiseni,+ mi ya na mina exitlhavelweni.” Kutani a hlawulekisa Yese ni vana vakwe, endzhaku ka sweswo a va vitanela exitlhavelweni.  Kuteloko va nghena naswona a vone Eliyabu,+ xikan’we-kan’we a ku: “Hakunene mutotiwa wakwe u le mahlweni ka Yehovha.”  Kambe Yehovha a ku eka Samuwele: “U nga languti ku languteka kakwe ni ku tlakuka ka xiyimo xakwe,+ hikuva ndzi n’wi bakanyile. Hikuva [Xikwembu a xi voni] hi ndlela leyi munhu a vonaka ha yona,+ hikuva munhu u vona ntsena leswi vonakaka ematihlweni;+ kambe loko ku ri Yehovha, u vona leswi mbilu+ yi nga swona.”  Hiloko Yese a vitana Abinadaba,+ a n’wi hundzisa emahlweni ka Samuwele, kambe yena a ku: “Hambi ku ri loyi, Yehovha a nga n’wi hlawulanga.”  Endzhaku ka sweswo, Yese a hundzisa Xamaha,+ kambe yena a ku: “Hambi ku ri loyi, Yehovha a nga n’wi hlawulanga.” 10  Kutani Yese a hundzisa vana vakwe va nkombo emahlweni ka Samuwele; Samuwele a byela Yese nakambe a ku: “Yehovha a nga va hlawulanga lava.” 11  Eku heteleleni Samuwele a byela Yese a ku: “Xana hi vona vafana hinkwavo lava?” Hiloko a ku: “Lontsongo eka hinkwavo u sele ku ta fikela sweswi,+ kutani waswivo, u byisa tinyimpfu.”+ Samuwele a byela Yese a ku: “Rhumela rito leswaku va ya n’wi landza, hikuva a hi nge tshami ehansi hi dya a nga si fika laha.” 12  Hiloko a rhumela rito leswaku a landziwa. Yena a a ri wa ribungwana,+ jaha leri nga ni mahlo yo saseka, ri sasekile. Kutani Yehovha a ku: “Suka u yima, n’wi tote, hikuva loyi hi yena!”+ 13  Hikwalaho Samuwele a teka rimhondzo ra mafurha,+ a n’wi tota exikarhi ka vamakwavo. Kutani moya wa Yehovha wu sungula ku tirha ehenhla ka Davhida ku sukela esikwini rero ku ya emahlweni.+ Endzhaku Samuwele a pfuka a khoma ndlela a ya eRhama.+ 14  Moya wa Yehovha wu suka+ eka Sawulo, kutani moya wo biha+ lowu humaka eka Yehovha wu n’wi hlasela. 15  Malandza ya Sawulo ma ku eka yena: “Waswivo, sweswi moya wo biha wa Xikwembu wa ku hlasela. 16  Hi kombela leswaku hosi ya hina yi lerisa malandza ya wena emahlweni ka wena leswaku va lava munhu la nga ni vuswikoti+ bya ku chaya haripa.+ Kutaku loko moya wo biha wa Xikwembu wu va ehenhla ka wena, yena u ta yi chaya hi voko, kunene swi ta ku fambela kahle.” 17  Kutani Sawulo a byela malandza yakwe a ku: “Ndzi kombela mi ndzi nyika munhu la tivaka ku chaya kahle, mi fanele mi n’wi tisa eka mina.”+ 18  Un’wana wa vatirhi a hlamula a ku: “Waswivo, ndzi vone ndlela leyi n’wana wa Yese lowa le Betlehema a nga ni vuswikoti bya ku chaya ha yona,+ i wanuna wa vurhena ni matimba+ naswona i wanuna wa nyimpi+ ni xivulavuri xo tlhariha,+ wanuna la vumbekeke kahle,+ naswona Yehovha u na yena.”+ 19  Hiloko Sawulo a rhuma varhumiwa eka Yese, a ku: “Ndzi rhumelele Davhida n’wana wa wena, loyi a risaka ntlhambi.”+ 20  Kutani Yese a teka mbhongolo, xinkwa, gula ra dzovo+ ra vhinyo ni ximbutana, a swi rhumela eka Sawulo hi voko ra Davhida n’wana wakwe.+ 21  Hiloko Davhida a fika eka Sawulo a n’wi tirhela;+ kutani a n’wi rhandza swinene, naswona a n’wi endla murhwali wa swihlomo swakwe swa nyimpi.+ 22  Kutani Sawulo a rhumela rito eka Yese, a ku: “Ndzi kombela leswaku Davhida a ya emahlweni a ndzi tirhela, hikuva u kume tintswalo ematihlweni ya mina.” 23  Kutani, loko moya wa Xikwembu wu va ehenhla ka Sawulo, Davhida a teka haripa, a yi chaya; Sawulo a kuma ku wisa naswona a swi n’wi fambela kahle, moya wo biha wu suka ehenhla ka yena.+

Tinhlamuselo ta le hansi