Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Bibele Eka Web Site Leyi | VUHUNDZULUXERI BYA MISAVA LEYINTSHWA BYA MATSALWA YO KWETSIMA

1 Samuwele 13:1-23

13  Sawulo a a ri ni malembe ya [?] hi vukhale loko a sungula ku fuma,+ u fume malembe mambirhi eIsrayele.  Sawulo a tihlawulela vavanuna va 3 000 eIsrayele; vavanuna va 2 000 va va na Sawulo eMikimaxi+ ni le ndhawini ya tintshava ya Bethele, vavanuna va 1 000 va va na Yonathani+ eGibiya+ wa Benjamini, kutani vanhu lavan’wana hinkwavo a va tshika va famba, un’wana ni un’wana a ya entsongeni wakwe.  Hiloko Yonathani a dlaya masocha+ ya Vafilisita+ lawa a ma ri eGeba;+ Vafilisita va swi twa. Loko ku ri Sawulo, u endle leswaku nanga yi yimbiwa+ etikweni hinkwaro, a ku: “Vaheveru a va swi twe!”  Kutani tiko hinkwaro ra Israyele ri twa loko ku vuriwa va ku: “Sawulo u dlaye masocha ya Vafilisita, sweswi Israyele i risema leri nyenyetsaka+ exikarhi ka Vafilisita.” Hiloko vanhu va hlengeletiwa leswaku va landzela Sawulo eGiligala.+  Loko ku ri Vafilisita va hlengeletana ku lwa na Israyele, makalichi+ ya nyimpi ya 30 000 ni vagadi va tihanci va 6 000 ni vanhu lava teleke kukota swiribyana swa sava leswi nga eribuweni ra lwandle;+ va tlhandluka naswona va dzima mixaxa eMikimaxi ku ya evuxeni bya Beta-avheni.+  Vavanuna va Israyele va swi vona leswaku va le mahlomulweni lamakulu,+ hikuva vanhu a va tikeriwa; kutani vanhu va tifihla emabakweni+ ni le magoveni ni le maribyeni ni le migodini ni le makheleni ya mati.  Vaheveru va tlhela va pela na Yordani,+ va pelela etikweni ra Gadi+ na Giliyadi. Kambe Sawulo a a ha ri eGiligala, vanhu hinkwavo va chava loko va ri karhi va n’wi landzela.+  U ye emahlweni a rindza masiku ya nkombo, a rindze nkarhi lowu vekiweke lowu Samuwele a n’wi byeleke ha wona;+ Samuwele a nga tanga eGiligala naswona vanhu a va hangalaka va suka eka yena.  Eku heteleleni Sawulo a ku: “Tshinetani xitlhavelo xo hisiwa ni xitlhavelo xa xinakulobye eka mina.” Hiloko a nyikela xitlhavelo xo hisiwa.+ 10  Hi ku hatlisa loko a heta ku nyikela xitlhavelo xo hisiwa, waswivo, Samuwele a nghena. Kutani Sawulo a huma ku ya n’wi hlanganisa ni ku n’wi katekisa.+ 11  Hiloko Samuwele a ku: “Xana i yini leswi u swi endleke?”+ Sawulo a ku: “Ndzi vone leswaku vanhu va hangalaka va suka eka mina,+ naswona wena—a wu tanga emasikwini lama vekiweke,+ kutani Vafilisita a va hlengeletanile eMikimaxi,+ 12  hiloko ndzi tibyela ndzi ku,+ ‘Sweswi Vafilisita va ta rhelela va ta lwa na mina eGiligala naswona a ndzi n’wi tsakisanga Yehovha.’ Hikwalaho ndzi tisindzisa,+ ndzi nyikela xitlhavelo xo hisiwa.” 13  Hiloko Samuwele a byela Sawulo a ku: “U endle vuphukuphuku.+ A wu xi hlayisanga xileriso+ xa Yehovha Xikwembu xa wena lexi a ku leriseke xona,+ hikuva loko a wu xi hlayisile, Yehovha a a ta tiyisa mfumo wa wena ehenhla ka Israyele hilaha ku nga riki na makumu. 14  Sweswi mfumo wa wena a wu nge khomeleli.+ Kunene Yehovha u ta kuma wanuna la amukelekaka embilwini yakwe;+ Yehovha u ta n’wi lerisa ku va murhangeri wa vanhu vakwe,+ hikuva wena a wu swi hlayisanga leswi Yehovha a ku leriseke swona.”+ 15  Hiloko Samuwele a pfuka a tlhandluka ku suka eGiligala a ya eGibiya wa Benjamini, Sawulo a hlaya vanhu, lava a va ha ri na yena a ku ri vavanuna va kwalomu ka 600.+ 16  Kutani Sawulo na Yonathani n’wana wakwe ni vanhu lava a va ha ri na vona a va tshama eGeba+ wa Benjamini. Loko ku ri Vafilisita a va dzime mixaxa eMikimaxi.+ 17  Vuthu ra vaphangi a ri huma hi rivilo enxaxeni wa Vafilisita hi mavuthu manharhu.+ Vuthu rin’we a ri nghena egondzweni ku ya eOfira,+ etikweni ra Xuwala, 18  vuthu lerin’wana a ri nghena egondzweni ra Beta-horoni,+ kutani vuthu ra vunharhu a ri nghena egondzweni endzilakaneni lowu languteke etlhelo ra nkova wa Seboyimi, etlhelo ra mananga. 19  Kutani a ku nga ri na mufuri etikweni hinkwaro ra Israyele, hikuva Vafilisita va te: “Ku endlela leswaku Vaheveru va nga endli banga kumbe fumu.”+ 20  Vaisrayele hinkwavo a va rhelela va ya eka Vafilisita leswaku un’wana ni un’wana a ya lota xikomu xakwe kumbe xikomu xakwe lexi tlhelo xi nga xihloka kumbe xihloka xakwe kumbe rihwevo rakwe.+ 21  Mali ya ku lota a ku ri pimi eka swikomu ni swikomu leswi tlhelo swi nga swihloka ni switirhisiwa swa meno manharhu ni swihloka, ni ku tiyisa risungunu ra havi.+ 22  Kutani hi siku ra nyimpi a ku kumekanga banga+ kumbe fumu evokweni ra munhu wihi ni wihi, eka lava a va ri na Sawulo na Yonathani; kambe ku kumeke xin’we lexi a xi ri xa Sawulo+ na Yonathani n’wana wakwe. 23  Kutani govela+ ra Vafilista a ri huma hi rivilo ri ya enyimpini hi ndlela ya xinkovana xa Mikimaxi.+

Tinhlamuselo ta le hansi