NEW YORK—Timbhoni ta Yehovha ti sungule ximfumo ku aka ntsindza lowuntshwa wa misava hinkwayo eWarwick, le New York hi Musumbhunuku, July 29, 2013 endzhaku ka loko ti kume mpfumelelo eka vatirhela-mfumo va kwalaho.

Hi Ravunharhu, July 17, Huvo yo Pasisa Tipulani ta Miako ya le Dorobeni ra Warwick yi pasise pulani ya ntsindza lowuntshwa wa misava hinkwayo wa Timbhoni, ku nga mpfumelelo wo hetelela lowu a ti wu lava leswaku ti sungula ku aka. Timbhoni ti kume mpfumelelo lowu endzhaku ka malembe ya mune ti xave ndhawu leyi ya le Warwick hi July 17, 2009. Endzhaku ka loko Timbhoni ti kume mpfumelelo wa tona wo sungula wa leswaku ti aka hi Ravuntlhanu, July 26, ti lo namba ti sungula ku lunghiselela ndhawu yoleyo ti nga ta aka eka yona ni ku cela masungulo ya muako hi Musumbhunuku, July 29.

Ku tiyimisela ka Timbhoni ku aka muako lowu nga ta ka wu nga onhi mbango, hi swona swi endleke leswaku huvo yo pasisa tipulani ta miako ya le dorobeni yi ti nyika mpfumelelo. Hi xikombiso, ku endliwe matshalatshala ya leswaku ku vekeriwa nchumu lowu nga ta sivela nkhukhulo wa misava lowu wu nga ta tlhela wu sirhelela swiharhi swo tanihi tinyoka leswaku ti nga ngheni laha ku akiwaka kona.

Richard Devine, muvulavuleri wa Timbhoni u te: “Swa tsakisa swinene ku hambeta hi tirhisana ni vatirhela-mfumo va le dorobeni ra Warwick ni ku ya emahlweni ni ntirho wo aka. Mpfumelelo lowu hi wu kumeke eka huvo yo pasisa tipulani ta miako ya le dorobeni wu hi pfunile swinene eka makungu yo rhurhisa ntsindza wa hina wa misava hinkwayo eBrooklyn yi ya eWarwick.” Enrique Ford na Nkulukumba Devine, lava nga swirho swa komiti yo aka ya Timbhoni va engetele va ku: “Ku kuma mpfumelelo lowu wo aka hi July a ku ri xiendlakalo xa nkoka lexi fambisanaka kahle ni pakani ya hina ya ku heta ku aka hi malembe ya mune.”

Eku sunguleni, ndhawu leyi a yi ri ya Khampani ya International Nickel leyi a yi yi tirhisela mintirho yo hambana-hambana, yo tanihi hofisi-nkulu, ndhawu yo endla ndzavisiso ni ya nhluvukiso ku sukela hi 1960 ku fikela hi 1987. Endzhaku ka malembe ya mune yi nga ri ku tirhisiweni, King’s College yi yi xavile hi xikongomelo xo yi endla kholichi. Kambe makungu wolawo a ma ha humelelanga, kutani yi tshame malembe lama tlulaka 20 yi nga tirhisiwi ku fikela laha Timbhoni ti nga yi xava hi 2009.

Media Contact(s):

International: J. R. Brown, Office of Public Information, tel. +1 718 560 5000

Afrika-Dzonga: Mzamo Goloda, +27 11-761-1000