Hi January 7, 2025, ku sungule ku va ni ritshwa etindhawini tinharhu leti nga etintshaveni ehandle ka le Los Angeles, California, eU.S.A. Eka masiku mambirhi lama landzeleke, ku tlhele ku sungula ritshwa eka tindhawu tin’wana tinharhu exifundzheni xolexo. a Leswi a ku ri ni dyandza ni moya wa matimba lowu a wu famba hi rivilo ra tikhilomitara ta 160 hi awara, swi endle leswaku ndzilo wu hangalaka hi ku hatlisa.

Mindzilo leyi yi hise ndhawu yo tlula 16 000 wa tihekitara. Miako yin’wana ya 12 000 leyi katsaka makaya ni mabindzu yi onhakile. Vanhu vo tlula 130 000 va lerisiwe ku rhurha naswona madzana ya magidi ya vanhu a va na gezi. Valawuri va vula leswaku vanhu va 24 va file.

Tinhlayo leti landzelaka i ta tindhawu leti khumbekeke.

Vamakwerhu Na Vona Va Khumbekile

• Vamakwerhu a va fanga kumbe ku vaviseka

• Vahuweleri va 1 068 va rhurhisiwile

• Makaya ya 83 ma onhakile

• Makaya manharhu ya vamakwerhu ma onhakile swinene

• Makaya ya 12 ya vamakwerhu a ma onhakanga ngopfu

• Tiholo ta Mfumo a ti onhakanga

Ntirho Wo Phalala

• Valanguteri va miganga ni vakulu va kwalaho va chavelela ni ku seketela lava hlaseriweke hi ritshwa ni ku tlhela va langutela ntirho wo phalala. Ku engetela kwalaho, xirho xa Komiti ya Rhavi xi ye endhawini yoleyo leswaku xi ya khutaza vamakwerhu

• Tiholo timbirhi ta Mfumo ti tirhiseriwa ku va tindhawu to phalala ta xinkadyana

• Komiti yo Phalala yi averiwe ku langutela ntirho wo phalala

Hi ya emahlweni hi khongelela vamakwerhu ni hinkwavo lava hlaseriweke hi ritshwa naswona hi swi langutele hi mahlongati ku vona ku hetiseka ka xitshembiso xa Xikwembu enkarhini lowu taka laha timhangu ta ntumbuluko ni swilo swo biha leswi endlekaka hikwalaho ka tona swi nga ta va swi nga ha ri kona.—Nhlavutelo 21:4.