Hi January 8, 2025, Khoto ya Xifundzha xa Mary yi gweve Makwerhu Arslan Vepayev loyi a nga ni malembe ya 21 malembe mambirhi leswaku a endla mitirho yin’wana hileswi a aleke ku ya enyimpini. Hambileswi Arslan a hatleke a humesiwa ejele, sweswi u fanele a humesa 20 wa tiphesente eka muholo wakwe leswaku a hakela Mfumo ku ringana tin’hweti ta 24.

Loko Arslan a vitaniwa leswaku a ya enyimpini eku sunguleni ka 2024, u ye ehofisini ya mfumo naswona hi xichavo u hlamusele xivangelo lexi endlaka a nga yi enyimpini. U tlhele a hlamusela leswaku u tiyimisele ku endla mitirho yin’wana ku nga ri ku ya enyimpini. Nilokoswiritano, endzhakunyana ka nkarhi, valawuri va n’wi pfulele nandzu. Hi November 2024, Arslan u khomiwile naswona u tshame ejele loko a ha yimele ku ya tenga nandzu wakwe. Hi December 2024, Khoto ya Doroba ra Bayramaly yi gweve Arslan malembe mambirhi hileswi a aleke ku ya enyimpini. Hi ku hatlisa Arslan u endle xikombelo hi xiboho xexo, leswi nga endla leswaku khoto ya kwalaho yi cinca xigwevo xakwe xi va xa malembe mambirhi a ri karhi a tirha mitirho yin’wana.

I ro sungula endzhaku ka malembe ya mune mfumo wa le Turkmen wu vona Mbhoni ya Yehovha nandzu hikwalaho ka leswi a nga laviki ku ya enyimpini. Hi May 2021, mfumo wu teke xiboho xo humesa Timbhoni hinkwato ta Yehovha leti khomiweke hileswi ti aleke ku ya enyimpini. Ku sukela kwalaho, a swi koteka leswaku vamakwerhu vo tala eTurkmenistan va ala ku ya enyimpini handle ko va va langutana ni switandzhaku. Hikwalaho, leswi endlekeke eka Arslan swi kombise leswaku mfumo wu cince ndlela leyi a wu endla swilo hayona swi nga languteriwanga. Ku engetela eka nandzu wa Arslan, valawuri va tivise vamakwerhu van’wana vo tala leswaku milandzu ya vona yo va va nga yi enyimpini yi yisiwe ehofisini ya muchuchisi.

Hi ya emahlweni hi khongelela Arslan ni vamakwerhu hinkwavo vo tshembeka lava ha riki vantshwa eTurkmenistan, hi ri karhi hi tiyiseka leswaku Yehovha a nge ma “fularheli malandza yakwe yo tshembeka.”—Pisalema 37:28.