Hi March ku ta va lembe ku sukela loko valawuri va khotse Bahram Hemdemov hikwalaho ko khoma minhlangano ya vukhongeri ekaya rakwe eTurkmenabad, le Turkmenistan. Hi March 14, 2015, maphorisa ma nghene ekaya rakwe kutani ma n’wi pfalela, endzhaku ka sweswo ma n’wi ba swinene kutani a gweviwa malembe ya mune ivi a yisiwa ekampeni ya mahlonga ya le Seydi.

Nawu wa le Turkmenistan wu nyika lunghelo ro “katseka eka vukhongeri u ri wexe kumbe ni van’wana” ni lunghelo ra leswaku munhu a “dyondza a ntshunxekile ni ku phofula ndlela leyi a titwaka ha yona hi tidyondzo teto.” Hambiswiritano, Bahram wa ha ri ekhotsweni ehansi ka swiyimo swo tika hikwalaho ko endla ntirho wa vukhongeri byakwe. Hi ku titsongahata Timbhoni ta Yehovha ti kombele leswaku a ntshunxiwa.