Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

OCTOBER 04, 2012
UKRAINE

Ku Tekiwe Xiboho Xo Lulama eUkraine

Ku Tekiwe Xiboho Xo Lulama eUkraine

Hi September 26, 2012, Huvo leyi Tlakukeke ya le Ukraine yi herise kungu leri nga riki enawini ro lava ku teka ndhawu leyikulu ya xitandi lexi ku akiweke eka xona rhavi ra Timbhoni ta Yehovha ra le Ukraine.

Timbhoni ti xave xitandi xexo hi nawu hi 1998. Hambiswiritano, hi 2008, khale ka n’wini wa xitandi xexo u xi xavise ra vumbirhi eka Ntsindza wo Hluvukisa ta Mintlango (Sport Development Center LLC [SDC]). EUkraine, swiendlo swo tano swi tiviwa tanihi ku phanga switandi.

Huvo ya kwalaho ya ta mabindzu yi teke xiboho xa leswaku ntwanano wo xavisela SDC xitandi xexo a wu ri enawini naswona yi xi bakanyele etlhelo xikombelo xa Timbhoni xo hundzisela nandzu lowu emahlweni.

Hambiswiritano, ku tekiwe xiboho xo lulama. Hi December 2011, Huvo leyikulu ya ta mabindzu yi teke xiboho lexi yimaka ni Timbhoni naswona hi April 2012 yi xi bakanyele etlhelo xikombelo xa SDC xo hundzisela nandzu lowu emahlweni. Leswi swi tiyisekise ximfumo leswaku xitandi xexo i xa Timbhoni ta Yehovha. Endzhaku ka tin’hweti tinharhu, huvo yo kambela milandzu ya ta mabindzu leyi hundziseriweke emahlweni ya le Lviv yi xi bakanyele etlhelo xiboho lexi nga riki enawini lexi a xi tekiwe hi huvo ya kwalaho xa leswaku SDC hi yona n’wini wa xitandi.

SDC yi ringete ro hetelela ku kuma xitandi hi ku hundzisela xiboho lexi tekiweke hi April eka Huvo leyi Tlakukeke ya Ukraine. Hambiswiritano, hi September 26, huvo yi xi bakanyele etlhelo hi ku hatlisa xikombelo xa yona, xisweswo yi pfala nandzu lowu hi ku helela.

Loko kungu leri ro phanga xitandi a ri lo humelela, Timbhoni ta Yehovha a ti ta lahlekeriwa hi rhavi ra tona swin’we ni xiphemu lexikulu xa xitandi xa tona naswona sweswo a swi ta kavanyeta mintirho ya tona erhavini ra le Ukraine.