Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

JANUARY 14, 2016
RHAXIYA

Vatirhelamfumo Lava Kambelaka Nhundzu Va Ala Leswaku Mphakelo Wa Tibibele Ni Minkandziyiso Leyi Sekeriweke eBibeleni Swi Nga Rhumeriwi

Vatirhelamfumo Lava Kambelaka Nhundzu Va Ala Leswaku Mphakelo Wa Tibibele Ni Minkandziyiso Leyi Sekeriweke eBibeleni Swi Nga Rhumeriwi

Elembeni leri nga hundza, valawuri va le Russia va teke goza rin’wana ra ku sivela ntshunxeko wa vugandzeri hi ku sivela ku rhumeriwa ka Tibibele leti kandziyisiweke hi Timbhoni ta Yehovha. Timbhoni a ti hlamarile loko ti twa leswaku Hofisi ya Ndzilakana ya le Vyborg yi vule leswaku Tibibele ti nga va ni “khombo.” Leswi swi ve ni vuyelo byo biha ku nga ri eka Timbhoni ntsena kambe ni vaaki va le Russia lava tekaka Bibele yi ri ya nkoka evukhongerini bya vona.

Swihehlo Leswi Bibele Yi Hehliweke Ha Swona

Hi July 13, 2015, vatirhelamfumo lava kambelaka nhundzu leyi nghenaka eRussia edorobeni leri nga endzilakaneni ra Vyborg va sivele ku rhumeriwa ka tikopi ta 2 013 ta ririmi ra Xirhaxiya ta Vuhundzuluxeri Bya Misava Leyintshwa Bya Matsalwa Yo Kwetsima. * Valawuri va teke Tibibele tinharhu kutani va ti yisa eka “mukambisisi” leswaku a tiyiseka loko ti nga ri na ririmi “leri nga ni khombo” kutani va ta kota ku yirisa Tibibele hinkwato. Vatirhelamfumo lava kambelaka nhundzu va pfulele rhavi ra Timbhoni ta Yehovha ra le Finland nandzu tanihi leswi ku nga rona ri rhumelaka minkandziyiso eRussia.

Emahlweninyana, hi May 5, 2015, vatirhelamfumo lava kambelaka nhundzu va sivele ku rhumeriwa ka minkandziyiso ya vukhongeri leyi a yi katsa Tibibele ta Xiossetia leti kandziyisiweke hi Timbhoni ta Yehovha. Leswi swi ve ni vuyelo byo vava eka Vakreste lava vulavulaka Xiossetia eRussia hikwalaho ka leswi Vuhundzuluxeri Bya Misava Leyintshwa bya Xiossetia ku nga byona vuhundzuluxeri lebyi heleleke.

Hambileswi vatirhelamfumo lava kambelaka nhundzu va le Russia va nga wu landzelelangiki Nawu wa Tiko wa le Russia lowu Tirhanaka ni Ntirho lowu ku vuriwaka leswaku wu ni Khombo wa minkandziyiso ya Timbhoni ta Yehovha, i ro sungula valawuri va vula leswaku swi nga ha endleka vuhundzuluxeri bya Bibele byi ri ni khombo. * Loko tihuvo to vula leswaku Tibibele leti ti ni khombo, a ti ta yirisiwa leswaku ti nga ha fambisiwi eRussia.

Ku Siveriwa Ka Minkandziyiso Yin’wana Loku Nga Riki eNawini

Yin’wana ya minkandziyiso leyi siveriweke ku rhumeriwa

Ku engetela eka ku sivela ku rhumeriwa ka Tibibele, vatirhelamfumo lava kambelaka nhundzu va sivele ku rhumeriwa ka minkandziyiso ya Timbhoni swi nga ri enawini ku sukela hi March 2015. * Nkarhi na nkarhi vatirhelamfumo a va landzela endlelo leri fanaka loko va yirisa ku rhumeriwa ka minkandziyiso. Va rhange va secha swi nga ri enawini leswaku va ta kuma minkandziyiso ya “swidyondzeki,” * naswona hofisi ya muchuchisi yi ye emahlweni yi vula leswaku minkandziyiso yi na khombo. Tanihi leswi ku rhumeriwa kun’wana ni kun’wana ka minkandziyiso a ku ta endla leswaku va ya eka tihuvo leti tirhanaka ni ku khotsiwa swi nga fanelanga, leswi a swi ta endla leswaku va tshamela ku ya ehubyeni.

Eka kungu rin’wana ro lava ku rhumela yin’wana ya minkandziyiso, Timbhoni ta Yehovha ti nyike vatirhelamfumo lava kambelaka nhundzu swiboho leswinene leswi endliweke hi huvo, leswi swidyondzeki swi swi kumeke ni maphepha man’wana lama kombaka leswaku hulumendhe yi vule leswaku minkandziyiso leyi a yi na khombo. Ematshan’weni ya sweswo, vatirhelamfumo lava kambelaka nhundzu vo honise vumbhoni byebyo naswona va yirise leswaku yi rhumeriwa.

Ku siveriwa ka ku kandziyisiwa ka minkandziyiso ya Timbhoni ku endleke endzhaku ka loko ku yirisiwe leswaku ku nga kopiwi minkandziyiso ya tona leyi nga eka website ya tona. Hi July 21, 2015, Russia ri ve tiko leri nga roxe emisaveni leri nga yirisa jw.org—ku nga website ya le nawini ya Timbhoni ta Yehovha. Lava endlaka leswaku ku va ni Internet etikweni hinkwaro ra Russia va yirise ndlela yo nghena eka website naswona un’wana ni un’wana loyi a ringetaka ku nghena eka yona eRussia a ta hehliwa hi milandzu ya vugevenga.

Ku yirisiwa loku a ku ta endla leswaku Timbhoni ta Yehovha ti tikeriwa ku kuma minkandziyiso ya elektroniki naswona sweswo a swi ta endla leswaku leti nga twiki kumbe leti nga voniki ti lahlekeriwa. Tanihi leswi dyondzo ya Bibele yi nga ya nkoka eka mintirho ya vukhongeri bya Timbhoni, ku yirisiwa ka leswaku ti nga yi kumi minkandziyiso ya tona a swi lwisana ni vugandzeri bya tona.

Timbhoni Ta Yehovha Ti Kombela Leswaku Minkandziyiso Ya Tona Yi Nga Yirisiwi

Tihuvo ta le Russia ti ale swikombelo swo yirisa minkandziyiso yin’wana ya vukhongeri leyi tekiwaka yi ri leyi kwetsimaka. Hi 2011, huvo ya le Russia eTomsk yi ale xikombelo xo yirisa vuhundzuluxeri bya Hindu Bhagavad Gita. Hi 2013, huvo ya swivilelo yi cince xiboho lexi vuleke leswaku vuhundzuluxeri bya Koran a byi ri ni khombo.

Timbhoni ta Yehovha ti ni ntshembo wa leswaku tihuvo ta le Russia ti ta ala xihehlo lexi endliweke hi vatirhelamfumo lava kambelaka nhundzu leswaku vuhundzuluxeri bya Bibele byi ni khombo ni ku lerisa leswaku ku rhumeriwa Tibibele ni minkandziyiso yin’wana leyi kandziyisiwaka hi Timbhoni ta Yehovha.

Ntlhandlamano Wa Minkarhi Leyi Ku Yirisiweke Ku Rhumeriwa

  1. March 1, 2015

    Vatirhelamfumo lava kambelaka nhundzu va yirisa ku rhumeriwa ka minkandziyiso ni ku tlhela va teka tikopi ta yona swi nga ri enawini.

  2. May 4, 2015

    Valawuri va yirisa ku rhumeriwa ka minkandziyiso leyi a yi fanele ku ya eRussia. Va tlhele va secha nhundzu kutani va teka swilo swo hlayanyana—ku katsa ni Tibibele ta ririmi ra Xiossetia leswaku va endla vulavisisi loko ti nga ri na “khombo.”

  3. May 28, 2015

    Huvo yi kombele nhlangano wa le St. Petersburg leswaku wu “kambela” nhundzu ya swilo leswi rhumeriweke hi March 1, 2015.

  4. June 2015

    Vatirhelamfumo lava kambelaka nhundzu va yirisa ku rhumeriwa ka minkandziyiso kambirhi endzilakaneni wa Vyborg.

  5. July 13, 2015

    Vatirhelamfumo lava kambelaka nhundzu va yirisa ku rhumeriwa ka Tibibele ta Xirhaxiya ntsena.

  6. August 13, 2015

    EVyborg, vatirhelamfumo lava kambelaka nhundzu va endle xiboho xo yirisa Tibibele hinkwato ta 2 013 leti a ti rhumeriwe hi July 13, va vula leswaku swi nga ha endleka ti ri ni “khombo.” Vatirhelamfumo va pfulele rhavi ra Timbhoni ta Yehovha ra le Finland nandzu.

  7. September 1, 2015

    Eka ku tenga loku fambisanaka ni ku rhumeriwa ka Tibibele ta Xiossetia ni minkandziyiso yin’wana hi May 4, muavanyisi u alela Timbhoni ni magqweta ya tona leswaku ma vula mavonelo ya vona.

  8. October 30, 2015

    Huvo ya Doroba ra Vyborg yi teka xiboho xa leswaku vatirhelamfumo lava kambelaka nhundzu va seche minkandziyiso leyi rhumeriweke hi May 4 swi nga ri enawini.

  9. November 17, 2015

    Huvo yi tenga malunghana ni ku rhumeriwa ka Tibibele hi July 13 kutani yi tshika ku nga endliwanga xiboho.

^ ndzim. 4 Vuhundzuluxeri Bya Misava Leyintshwa Bya Matsalwa Yo Kwetsima i vuhundzuluxeri bya Bibele lebyi tirhisaka ririmi ra manguva lawa lebyi kandziyisiweke hi Timbhoni ta Yehovha lebyi nga xavisiwiki hi tindzimi to tlula 120.

^ ndzim. 6 Ku sukela hi January 1, 2016, tihuvo ta le Russia ti vule leswaku minkandziyiso ya 82 ya Timbhoni ta Yehovha yi ni khombo. Timbhoni ti yise swivilelo leswi eka tihuvo letitsongo ni le ka Huvo ya Matiko ya Yuropa ya Timfanelo ta Vanhu malunghana ni swiboho sweswo.

^ ndzim. 8 Ku sukela hi December 2015, vatirhelamfumo lava kambelaka nhundzu eVyborg a va yirise ku rhumeriwa ka minkandziyiso leyi a yi fanele yi ya eka Timbhoni ta Yehovha eRussia ka nkombo.

^ ndzim. 8 Nawu wa le Russia wu vula leswaku mpfumelelo wo secha va fanele va wu kuma eka huvo naswona va fanele va secha ku ri ni lava sechiwaka. Eka xiendlakalo xin’wana ni xin’wana, vatirhelamfumo lava kambelaka nhundzu a va wu yingisanga nawu lowu.