Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

JULY 31, 2014
RHAXIYA

Huvo Ya Le Taganrog Yi Vona Timbhoni Ta Yehovha Nandzu Hikwalaho Ka Ripfumelo Ra Tona

Huvo Ya Le Taganrog Yi Vona Timbhoni Ta Yehovha Nandzu Hikwalaho Ka Ripfumelo Ra Tona

Hi July 30, 2014, Huvo ya le Dorobeni ra Taganrog yi vone nandzu ni ku gweva Timbhoni ta 7 eka ta 16 hileswi ti hlanganeke ni ku hlela minhlangano ya tona ya vukhongeri leyi rhuleke. Ti tengisiwile hikwalaho ko khoma minhlangano ya vukhongeri leyi fanaka ni leyi Timbhoni ta Yehovha ti yi khomaka emisaveni hinkwayo. Xiboho lexi tekiweke xi veka ntshunxeko wa vukhongeri bya Timbhoni ta Yehovha ekhombyeni etikweni hinkwaro ra Rhaxiya.

Muavanyisi u hlawule ku tivisa xiboho hi July 28, 2014, kambe u xi tivise hi siku leri landzelaka. Hi July 29, muavanyisi u hete siku hinkwaro a ri karhi a hlaya xiboho lexi leheke matluka ya 100 naswona u ye emahlweni a xi hlaya nimixo hi July 30. U gweve vakulu vamune va vandlha ku tshama ekhotsweni malembe ya ntlhanu ni hafu ha un’we wa vona ni ku hakela mali ya ti-ruble ta 100 000 (R29 900). U gweve Timbhoni tin’wana tinharhu leswaku ha yin’we ya tona yi hakela mali ya ti-ruble ta 50 000 ku ya eka 60 000 (R14 900 ku ya ka R18 100). Muavanyisi u herise tihakelo teto hinkwato hikuva ndzavisiso ni ku tengisiwa a swi nga ri nawini naswona u yimise swa xinkarhana swigwevo swa tona swo tshama ekhotsweni. Timbhoni ta kaye leti a ti sele a ti voniwanga nandzu.

Muavanyisi u teke xiboho lexi fanaka ni lexi tekiweke hi September 2009 hi Huvo ya Xifundzha xa Rostov leyi nga yirisa Nhlangano wa Vukhongeri wa Timbhoni ta Yehovha le Taganrog. Hambileswi xiboho lexi tekiweke hi 2009 a xi sekeriwe ntsena eka vandla ra swa nawu, muavanyisi u teke xiboho xa leswaku mintirho hinkwayo ya vukhongeri bya Timbhoni ta Yehovha eTaganrog ni le tindhawini tin’wana yi yirisiwa.

Hi nkarhi wa ku tengiwa ka nandzu lowu tekeke tin’hweti ta 15, lava a va hehliwa va vule leswaku va nge pfuki va landzule ripfumelo ra vona naswona va ta ya emahlweni ni vugandzeri bya vona tanihi Timbhoni ta Yehovha. Ku tiyimisela ka lava gweviweke ku ya emahlweni ni mintirho ya vona ya vukhongeri swi vula leswaku va nga ha langutana ni ku khotsiwa hikwalaho ko hehliwa hi milandzu yo tala.

Victor Zhenkov, un’wana wa magqweta lama yimelaka nandzu lowu, u te: “Ndzi ni ku chava eka ndlela leyi xiboho lexi xi nga ta khumba Timbhoni ta Yehovha ha yona eRhaxiya. Maphorisa ya le Taganrog ni ya le tindhawini tin’wana ta le Rhaxiya, ma nga ha tirhisa xiboho lexi leswaku ma ya emahlweni ma hehla Timbhoni ta Yehovha ni ku ti xanisa hikwalaho ka leswi ti hanyaka hi ku pfumelelana ni ripfumelo ra tona.”

Timbhoni ta le Taganrog ti yise xivilelo xa tona eka Huvo ya Xifundzha xa Rostov.