Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

SEPTEMBER 8, 2014
UNITED STATES

Lillian Gobitas Klose, Xichudeni Xa Nkoka Swinene Eka Nandzu Lowu Nga Rivalekiki Wa Le Hubyeni Leyi Tlakukeke Hi 1940, U File A Ri Ni Malembe Ya 90

Lillian Gobitas Klose, Xichudeni Xa Nkoka Swinene Eka Nandzu Lowu Nga Rivalekiki Wa Le Hubyeni Leyi Tlakukeke Hi 1940, U File A Ri Ni Malembe Ya 90

ENEW YORK—Lillian Gobitas Klose, loyi xiboho xakwe xa ku nga losi mujeko xi endleke leswaku a va wa nkoka swinene eka nandzu wa le Hubyeni leyi Tlakukeke eUnited States, u file emutini wakwe eFayetteville, le Georgia hi August 22, 2014. A a ri ni malembe ya 90.

William Henry Gobitas (exineneni), Walter Gobitas na Lillian Gobitas endzhaku ka loko vana va hlongoriwe exikolweni hikwalaho ka ku nga losi mujeko hi 1935.

Papila leri Lillian Gobitas a ri tsaleleke Huvo ya Xikolo xa Minersville hi 1935, a hlamusela hi ripfumelo rakwe.

Lillian Gobitas ni ndzisana yakwe William, lava nga Timbhoni ta Yehovha, va titekele xiboho xo tshika ku losa mujeko endzhaku ko yingisela nongonoko lowu haxiweke eka xiya-ni-moya etikweni hinkwaro hi October 6, 1935, lowu vulavuleke hi milawu ya Bibele leyi lwisanaka ni swifaniso. Endzhaku ka mavhiki ma nga ri mangani, va hlongoriwile exikolweni hikwalaho ka xiboho xa vona. Tata wa vona Walter, u mangalele xikolo leswaku a sirhelela malunghelo ya vana vakwe naswona u hlule nandzu wolowo etihubyeni letitsongo. Huvo ya xikolo yi rhumele xivilelo eHubyeni leyi Tlakukeke naswona hi June 3, 1940, nandzu wa Minersville School District v. Gobitis (xivongo xi tsariwe hi ndlela leyi hoxeke emaphepheni ya huvo), wu dye vaka Gobitas. Endzhaku ka malembe manharhu, hi June 14, 1943, ku nga Siku ra Mujeko, Huvo leyi Tlakukeke yi cince xiboho lexi yi xi tekeke eka nandzu wa 1940 wa vaka Gobitis, eka xiboho xa yona xa nandzu wa West Virginia State Board of Education v. Barnette, xisweswo yi pfumelela vana lava nga Timbhoni leswaku va tlhelela exikolweni. A ku ri ro sungula ematin’wini ya United States ku va Huvo leyi Tlakukeke yi cinca xiboho xa yona ku nga si hundza nkarhi wo leha.

Lillian Gobitas u velekiwe eMinersville, le Pennsylvania, hi Walter na Ruth Gobitas hi November 2, 1923. U khuvuriwe tanihi Mbhoni ya Yehovha hi March 14, 1935. Loko a ri ni malembe ya 20, Manana Gobitas u ve mudyondzisi wa nkarhi hinkwawo wa Bibele (ku nga phayona ra nkarhi hinkwawo hilaha Timbhoni ti vulaka hakona) naswona endzhaku ka nkarhi u tirhe entsindza wa Timbhoni ta Yehovha eBrooklyn, le New York, ku sukela hi February 1946 ku ya fika hi April 1953.

Lillian ni nuna wakwe, Erwin Klose, loko va ri varhumiwa eVienna, le Austria, hi 1954.

Loko Manana Gobitas a ye enhlengeletanweni eYuropa hi 1951, u hlangane na Erwin Klose erhavini ra Timbhoni eJarimani. Va hambete va va vanghana loko Nkulukumba Klose a ya eXikolweni xa Bibele xa Giliyadi xa Watchtower, ku nga xikolo xa vurhumiwa xa Timbhoni, lexi nga eSouth Lansing, le New York. U thwasile hi 1952 naswona u amukele xiavelo xo ya eVienna, le Austria. Manana Gobitas na yena u thwasile exikolweni xa vurhumiwa xa Timbhoni hi February 1954.

Hi March 24, 1954, yena na Nkulukumba Klose va tekanile eVienna naswona va hambete va va vurhumiwa eAustria. Va tlhelele eUnited States loko lembe rero ri hela hikwalaho ka ku hohloka ka rihanyo ra Nkulukumba Klose, loyi a ha ri ni swivavi emirini hikwalaho ko xanisiwa ekampeni ya nxaniso ya Manazi hileswi a a ri Mbhoni ya Yehovha. Endzhaku ka nkarhi va ve ni vana vambirhi, Stephen Paul na Judith Deborah. Hi 1967, ndyangu waka Klose wu rhurhele eRiverdale, le Georgia laha ndyangu hinkwawo wu fikeke wu ndlandlamuxa ntirho wa wona wo dyondzisa vanhu Bibele.

Manana Gobitas Klose u siye n’wana wakwe wa nhwanyana, Judith Klose; vasesi vakwe vambirhi, Jeanne Fry na Grace Reinisch; ni makwavo wakwe Paul Gobitas. Nuna wakwe, vatswari vakwe, buti wakwe William Gobitas, sesi wakwe Joy Yubeta ni n’wana wakwe Stephen Paul Klose va fe ku sungula.

Media Contact(s):

International: J. R. Brown, Office of Public Information, tel. +1 718 560 5000