Seta screen reader

Hlawula ririmi

Yana enxaxamelweni wa vumbirhi

Nghena endzeni

Timbhoni Ta Yehovha

Xitsonga

SEPTEMBER 25, 2014
UNITED STATES

Xiviko Xa Tinhlengeletano Ta Matiko: Timbhoni Ti Khoma Tinhlengeletano To Hlawuleka eXitediyamu Xa MetLife

Xiviko Xa Tinhlengeletano Ta Matiko: Timbhoni Ti Khoma Tinhlengeletano To Hlawuleka eXitediyamu Xa MetLife

ENEW YORK—Hi June 20-22 na June 27-29, 2014, Timbhoni ta Yehovha ti hlengeletane eXitediyamu xa MetLife aEast Rutherford, le New Jersey, leswaku ti khoma nxaxamelo wa Tinhlengeletano ta Matiko leti nga ni nhloko-mhaka leyi nge “Hambetani Mi Lava Mfumo Wa Xikwembu Ku Sungula!” naswona leyo sungula yi ta fambisiwa hi Xinghezi ivi leya vumbirhi yi fambisiwa hi Xipaniya.

Nhlayo ya vanhu lava veke kona eka mahelo-vhiki hamambirhi a yi tlula 118 000, naswona tinhlengeletano letimbirhi hi tona letikulu leti Timbhoni ti tshameke ti ti khoma emadorobeni lama nga ehansi ka New York eka makume ya malembe lama hundzeke. Vanhu vo tlula 407 000 emadorobeni man’wana va haxeriwe swiphemu swa nongonoko lowu hi ku tirhisa Internet, leswi endleke leswaku nhlayo hinkwayo ya lava yingiseleke nongonoko lowu yi tlula 525 500.

Swiphemu swo tala swa nongonoko a swi ri ni minkombiso ni tivhidiyo leti kombisaka ndlela leyi milawu ya Bibele yi nga tirhisiwaka ha yona. Siku rin’wana ni rin’wana, tinhlengeletano hatimbirhi a ti gimetiwa hi mbulavulo lowu a wu nyikeriwa hi xirho xa Huvo leyi Fumaka ya Timbhoni ta Yehovha. David Splane u vulavule enhlengeletanweni leyi khomiweke hi June 20-22; kasi Geoffrey Jackson u vulavule eka leyi khomiweke hi June 27-29.

Nakambe nhlengeletano ha yin’we a yi ri ni lunghiselelo ro khuvula vanhu. Vanhu va 1 255 va khuvuriwile exitediyamu naswona va 2 930 va khuvuriwe etindhawini tin’wana. Kutani vanhu hinkwavo lava khuvuriweke a va ri 4 185.

Vapfhumba lava teke a va huma eArgentina, eAustralia, eBelize, eBritain, eChile, eCosta Rica, aEl Salvador, eGreece, eGuatemala, eHonduras, eItaly, eJarimani, eMalaysia, eMexico, eNicaragua, ePanama, ePeru, eSpain ni le Venezuela.

J. R. Brown, muvulavuleri wa Timbhoni ta Yehovha, u te: “Nhlengeletano leyi yi tsundzuxe vo tala va hina hi nhlengeletano yo hlawuleka leyi hi veke na wona eNew York hi 1958. Hinkwavo vanhu lava a va ri kona eXitediyamu xa Yankee ni khale ka Polo Grounds, a ku ri vanhu vo tlula 253 000. Hakunene tinhlengeletano leti khomiweke eXitediyamu xa MetLife lembe leri ti ta tekiwa tanihi leti hlawulekeke swinene ematin’wini ya Timbhoni ta Yehovha.”

Media Contact(s):

International: J. R. Brown, Office of Public Information, tel. +1 718 560 5000