Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

MARCH 3, 2014
RHAXIYA

Xiviko Lexi Yaka Emahlweni: Kungu Ro Yirisa JW.ORG Ri Tsandzekile

Xiviko Lexi Yaka Emahlweni: Kungu Ro Yirisa JW.ORG Ri Tsandzekile

EST. PETERSBURG, le Rhaxiya—Timbhoni ta Yehovha ti hlule nandzu lowukulu hi January 22, 2014, loko huvo leyi ku hundziseriwaka milandzu eka yona yi cince xiboho lexi tekiweke hi huvo ya le hansi xo yirisa jw.org, ku nga website ya le nawini ya Timbhoni ta Yehovha, etikweni hinkwaro ra Rhaxiya.

Huvo ya Xifundzha ya le Tver yi cince xiboho lexi tekiweke hi August 7, 2013, xa Huvo ya Muganga ya Tsentralniy. Huvo ya xifundzha yi vule leswaku huvo ya muganga a yi na xivangelo lexi twalaka xo yirisa website leyi hikuva Timbhoni ta Yehovha, ku nga vini va yona, a va vitaniwanga ku ya yingisela ku tengiwa ka nandzu wa kona. Gqweta ra le Tver ri yise nandzu lowu ehubyeni hikwalaho ka leswi jw.org a yi ri ni minkandziyiso leyi tihuvo ta le Rhaxiya ti tekeke xiboho xa leswaku “yi ni khombo.” Endzhakunyana ka loko Timbhoni ta Yehovha ti twe hi ta xiboho lexi tekiweke hi huvo ya muganga, ti suse minkandziyiso yoleyo eka jw.org eRhaxiya. Huvo ya Xifundzha ya le Tver yi tiyisekise leswaku Timbhoni a ti yingisa milawu ya le Rhaxiya naswona ti herise ku yirisiwa ka website ya tona.

Timbhoni ta Yehovha ti le ku lwisaneni ni swiboho leswi tekiweke hi tihuvo ta le Rhaxiya swa leswaku minkandziyiso yin’wana ya tona “yi ni khombo” naswona ti rhumele swikombelo swo hlayanyana eka Huvo ya Yuropa ya Timfanelo ta Vanhu leswaku ku cinciwa swiboho sweswo.

Grigory Martynov, muvulavuleri wa Timbhoni ta Yehovha eRhaxiya, u te: “Ha tsaka leswi vaavanyisi va voneke ndlela leyi website ya hina yi pfunaka vanhu ha yona ni matshalatshala lawa hi ma endlaka yo yingisa swiboho leswi tekiweke hi tihuvo ta le Rhaxiya. Hi ta hambeta hi lwela ku tshembeka ka minkandziyiso ya hina ni timfanelo ta vanhu va le Rhaxiya to va va pfuniwa hi ku helela hi ntirho wa hina wo dyondzisa Bibele.”

J. R. Brown, muvulavuleri wa ntsindza wa misava hinkwayo wa Timbhoni, u te: “Timbhoni emisaveni hinkwayo ti tsakela ku hlula loku. Hikwalaho ka ku hlula loku, vaaki hinkwavo va le Rhaxiya va ta hambeta va nghena eka website leyi, leyinene ngopfu yo dyondzisa Bibele.”

Media Contact(s):

International: J. R. Brown, Office of Public Information, tel. +1 718 560 5000

Russia: Grigory Martynov, tel. +7 812 702 2691