Nghena endzeni

Yana enxaxamelweni wa vumbirhi

Timbhoni Ta Yehovha

Xitsonga

MARCH 21, 2017
RHAXIYA

Timbhoni Ta Yehovha Ti Hlele Tsima Ro Tsala Mapapila eMisaveni Hinkwayo Hikwalaho Ka Nxungeto Wo Yirisa Vukhongeri Bya Tona eRhaxiya

Timbhoni Ta Yehovha Ti Hlele Tsima Ro Tsala Mapapila eMisaveni Hinkwayo Hikwalaho Ka Nxungeto Wo Yirisa Vukhongeri Bya Tona eRhaxiya

NEW YORK—Hikwalaho ka leswi ku nga ni nxungeto wo herisa vukhongeri bya tona eRhaxiya, Timbhoni ta Yehovha ti endle xikombelo eka Huvo leyi Tlakukeke leswaku ti ntshunxiwa hi ku va ti simeka tsima ro tsala mapapila emisaveni hinkwayo. Huvo leyi Fumaka ya Timbhoni ta Yehovha yi rhamba Timbhoni to tlula 8 000 000 emisaveni hinkwayo leswaku ti katseka eka rona.

Hi March 15, 2017, Ndzawulo ya Vululami ya le Rhaxiya yi yise xihehlo eka Huvo leyi Tlakukeke hi ku vula leswaku Rhavi ra Timbhoni ta Yehovha ra le Rhaxiya ri ni khombo naswona ri fanele ri pfariwa. Xihehlo lexi xi katsa ni ku yirisiwa ka mintirho leyi endliwaka eRhavini. Loko Huvo leyi Tlakukeke yo pfumelelana ni xihehlo lexi, rhavi ra Timbhoni ta Yehovha leri nga ekusuhi ni le St. Petersburg ri ta pfariwa. Endzhaku ka sweswo, Minhlangano ya Kwalaho ya Vukhongeri ya 400 yi ta pfariwa naswona leswi swi ta kavanyeta mintirho leyi endliwaka emavandlheni yo tlula 2 300 ya Timbhoni ta Yehovha eRhaxiya. Nhundzu ya Rhavi ku katsa ni tindhawu ta vugandzeri leti tirhisiwaka hi Timbhoni etikweni hinkwaro ti ta lawuriwa hi Mfumo. Ku engetela kwalaho, Mbhoni yin’wana ni yin’wana ya Yehovha yi ta xanisiwa loko yo kumiwa yi endla mintirho leyi fambisanaka ni vukhongeri bya yona. Hi April 5, Huvo leyi Tlakukeke yi ta teka xiboho malunghana ni xihehlo lexi.

Muvulavuleri wa ntsindza wa Timbhoni ta Yehovha David A. Semonian u ri: “Huvo leyi Fumaka ya Timbhoni ta Yehovha yi lava leswaku un’wana ni un’wana a vona ndlela leyi xiyimo lexi xi nga xa nkoka ha yona. Loko ku xanisiwa vaakatiko lava, lava nga riki na khombo lava xiximaka nawu, ku va ku tluriwa milawu. Va xanisiwa hikwalaho ka mhaka leyi nga riki ntiyiso.” A hi ro sungula ku va Timbhoni ti simeka tsima ra misava hinkwayo. Eka malembe ya kwalomu ka 20 lama hundzuke, Timbhoni ti tsale mapapila leswaku ti yimela vagandzerikulobye hikwalaho ka leswi swirho swa hulumendhe leswi a swi ri ni matimba hi nkarhi wolowo a swi simeke tsima ro ti hlasela. Ku engetela kwalaho, Timbhoni ti simeke matsima ya ku tsariwa ka mapapila leswaku ti susumetela hulumendhe leswaku yi tshika ku xanisa Timbhoni ta le matikweni man’wana lama katsaka Jordan, Korea na Malawi.

Nkulukumba Semonian u engetela a ku: “A hi nandzu ku hlaya Bibele, ku yimbelela ni ku khongela swin’we ni vagandzerikulorhi. Hi tshemba leswaku tsima ra hina ra ku tsariwa ka mapapila emisaveni hinkwayo ri ta susumetela hulumendhe ya le Rhaxiya leswaku yi tshika ku khoma vagandzerikulorhi hi ndlela yo biha.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691